“ Forsoþe, briþeren, we preyen ȝou, þat ȝe habounde more; and ȝyue werk, or bisynesse, þat ȝe be quyet, and do ȝoure nede, þat ȝe worche wiþ ȝoure hondis, as we han comaundid to ȝou; and þat ȝe wandre honestly to hem þat ben wiþouteforþ, þat of no mannis ȝe desyre ony þing. Forsoþ, briþeren, we wolen not ȝou for to vnknowe of men slepynge, or deiynge, þat ȝe ben not sorwful, as and oþere þat han not hope. Soþli if we bileuen, þat Jhesus was deed, and roos aȝen, so and God schal lede wiþ him hem þat slepten, or deieden, by Jhesu. ”

“ God is witnesse; neþir sekinge glorie of men, neþir of ȝou, neþir of oþere, whanne we myȝten be to charge to ȝou, as Cristis apostelis. But we ben maad litle in þe myddil of ȝou, as if a noryse fostre hir sones; so we desyringe ȝou coueityngly, or wiþ greet loue, wolden bitake to ȝou, not oonly þe gospel of God, but also oure soules, or lyues, for ȝe ben maad to vs moost dereworþe. Forsoþe, briþeren, ȝe ben myndeful of oure traueil and werynesse; nyȝt and day we worchinge, þat we schulden not greue ony of ȝou, prechiden in ȝou þe euangelie of God. ”

“ Forsoþ proue ȝe alle þingis, holde ȝe þat þing þat is good. Absteyne ȝou fro al yuel spice, or liknesse. Forsoþe þe same God of pees make ȝou hooly by alle þingis, þat ȝoure spirit be kept hool, and soule, and body, wiþ oute playnt, in þe comynge of oure Lord Jhesu Crist. God is trewe, þat clepide ȝou, þe which also schal do. Briþeren, preie ȝe for vs. Greete ȝe wel alle briþeren in hooly coss. I coniure ȝou by þe Lord, þat þis pistle be rad to alle hooly briþeren. Þe grace of oure Lord Jhesu Crist be wiþ ȝou alle. ”