“ To whom ȝe goynge nyȝe, a quyk stoon, reproued soþeli of men, forsoþe chosen of God, and honourid, and ȝoure silf as quike stoones be aboue bildid spiritual housis, holy presþod, for to offre spiritual hoostes, or offringes, acceptable to God bi Jhesu Crist. For which þing þe scripture holdiþ, Lo! I shal putte in Syon þe hiȝest stoon, corner stoon, chosen, precious; and he þat shal belieue in to him, shal not be confoundid. Þerfore honour to ȝou bileuynge; forsoþe to men not bileuynge, þe stoon whom þei bildynge reproueden, þis is maad in to þe heed of þe corner ”

“ Moost dere, Y beseche ȝou, as comelinges, or gestes, and pilgrimes, for to abstene ȝou fro fleschly desijris, þat fiȝten aȝens þe soule; hauynge ȝoure conuersacioun, or lijf, good among heþen men, þat in þat þing þat þei bacbiten, or yuele treeten, of ȝou, as of mysdoers, þei biholdinge ȝou of good werkis, and glorifie God in þe dai of visitacioun. Be ȝe suget to ech creature of man, for God; oþer to þe kyng, as precellent, or more worþi in staat, oþer to dukis, as sent of him to þe veniaunce of mysdedis, or mysdoeris, forsoþe to þe preysinge of goode dedis, or goode men. ”

“ And so be ȝe prudent, and wake ȝe in preyers; bifore alle þingis forsoþe hauynge charite ech to oþer in ȝou silf algatis lastinge; for charite coueriþ þe multitude of synnes, holdinge hospitalite to gydere wiþ outen grucchinge; ech man as he receyuede grace, mynistringe it in to ech oþer, as goode dispenderes of þe manyfolde grace of God. If ony man spekiþ, speke he as þe wordes of God; if ony man mynistriþ, as of þe vertu which God mynistriþ; þat God be honourid in alle þingis bi Jhesu Crist oure Lord, to whom is glory and lordship in to worldlis of worldlis. ”