“ No man disseyue ȝou, willinge in mekenesse, and religioun of aungels, þe whiche þingis he haþ not seyn, walkynge veynly; ynblowyn wiþ witt of his fleisch, and not holdynge þe heed, of which al þe body, by bondis and ioynyngis to gidere vndirmynistrid and maad, wexiþ into þe encreessyng of God. Forsoþe if ȝe ben deede wiþ Crist fro þe elementis of þis worlde, what ȝit as men lyuynge to þe world deme ȝe? Neþer ȝe schulen touche, neþer taste, neþer trete wiþ hondis þo þingis, þe which alle ben into deeþ by þe ilke vss, vp preceptis and techingis of men ”

“ Nyle ȝe lyie, or gabbe, to gidere, spulinge þe olde man wiþ his deedis, and cloþinge þe newe man, þat is maad newe aȝen into þe knowynge of God, vp þe ymage of him þat maad hym; wher is not male and female, heþen man and Jew, circumcisioun and prepucie, barbar and Scita, seruaunt, or þral, and fre man, but alle þingis and in alle þingis Crist. Þerfore cloþe ȝou, as þe chosun of God, and hooly, and þe loued of God, þe entrailis of mercy, benygnite, and mekenesse, temperaunce, and pacience; supportinge, or beringe vp to gidere, and ȝyuynge to ȝou silf, if ony man aȝens any haþ querel, or pleynt ”

“ We don þankingis to God, and þe fadir of oure Lord Jhesu Crist, euermore for ȝou preiynge, we heeringe ȝoure feiþ in Crist Jhesu, and þe loue þat ȝe han into alle hooly men, for þe hope þat is kept to ȝou in heuenes. Þe which ȝe herden in þe word of treuþe of þe gospel, þat cam to ȝou, as and it is in al þe world, and makiþ fruyt, and wexiþ, as in ȝou, of þat day in which ȝe herden and knewen þe grace in treuþe. ”