“ Forsoþe God is a witnesse to me, hou I coueite ȝou alle in þe bowelis of Jhesu Crist. And þis þing I preye, þat ȝoure charite be plenteuous more and more in science, or kunnynge, and in al witt; þat ȝe proue bettere þingis, þat ȝe be clene and wiþoute offence in þe day of Crist; fulfillid wiþ þe fruyt of riȝtwysnesse by Jhesu Crist, into þe heriynge and glorie of God. Forsoþ, briþeren, I wole ȝow for to wite, þat þe þingis þat ben aboute me han comyn more to þe profyte of þe gospel, so þat my boondis weren maad knowun in Crist, in ech moot halle, and in alle oþere placis ”

“ I preie Eucodiam, and I bisech Syntesem, for to vndirstonde þe same þing in þe Lord. Also and I preie þee, german felowe, helpe þou þe ilke wymmen þat traueliden wiþ me in þe gospel, wiþ Clement and oþere my helperis, whos names ben in þe book of lyf. Ioye ȝe in þe Lord euer more; eft I seie, ioye ȝe. Be ȝoure temperaunce, or pacience, knowun to alle men; þe Lord is nyȝ. Be ȝe no þing bisy, but in al preier and biseching, wiþ doynge of þankingis, be ȝoure axingis knowun at God. And þe pees of God, þat passiþ al witt, kepe ȝoure hertis and vndirstondingis in Crist Jhesu oure Lord. ”

“ For to write to ȝou þe same þingis, forsoþ to me not slow, forsoþ to ȝou necessarie. Se ȝe houndis, se ȝe yuel workmen, se ȝe dyuisioun. Soþli we ben circumcisioun, þat bi spirit seruen to God, and glorien in Crist Jhesu, and not hauynge trist in þe fleisch, þouȝ I haue trist and in þe fleisch. If ony oþer man is seyn for to triste in fleisch, I more, circumsidid in þe eiȝtiþ day, of þe kyn of Israel, of þe lynage of Beniamyn, an Ebrew of Ebrews, vp þe lawe a Pharise, vp loue pursuwinge þe chirche of God, vp riȝtwysnesse þat is in þe lawe lyuynge wiþoute pleynt. ”