“ Forsoþ if ony man loueþ God, þis is knowun of him. Forsoþ of metis þat ben offrid to ydols, we witen, for an ydol is no þing in þe world, and þat þer is no God but oon. Forwhy and if þer ben þat ben seide goddis, eþer in heuene, eþer in erþe, forsoþ þer ben many goddis, and many lordis; neþelees to vs is oo God, þe fadir, of whom alle þingis, and we in him; and oo Lord, Jhesu Crist, by whom alle þingis, and we by him. But not in alle men is kunnynge. Soþli summe wiþ conscience of ydol til now eten as þing offrid to ydols ”

“ Soþly a man schal not veyle, or hyde, his heed, for he is þe ymage and glorie of God; forsoþe a womman is þe glorie of man. Soþli a man is not of þe womman, but þe womman of þe man. And forsoþe þe man is not maad for þe womman, but þe womman for þe man. Þerfore þe womman schal haue a veyle on hir heed, and for aungels. Neþeles neiþir þe man wiþouten womman, neiþer þe womman wiþouten man, in þe Lord. Forwhi as þe womman of man, so and man by woman; forsoþe alle þingis of God. Ȝe ȝou silf deme ”

“ Wymmen in chirchis be stille; soþli it is not suffrid to hem for to speke, but for to be suget, as þe lawe seiþ. Forsoþ if þei wolen ony þing lerne, at hom axe þei her hosebondis; forsoþ it is foul þing to womman for to speke in chirche. Wheþer of ȝou þe word of God cam forþ, or to ȝou aloone it cam? If ony man is seyn for to be a prophete, or spiritual, knowe he þo þingis þat I wryte to ȝou, for þei ben þe comaundementis of þe Lord. Forsoþe if ony man vnknowiþ, he schal be vnknowen. ”

“ Soþli wheþer I, wheþer þei, so we han prechid, and so ȝe han bileuyd. Forsoþ if Crist is prechid, þat he roos aȝen fro deed spiritis, hou summe seyn in ȝou, for þe aȝen rysinge of deed men is not? Forsoþ if þe aȝen rysinge of deed men is not, neþer Crist roos. Soþli if Crist roos not, oure prechinge is veyn, oure feiþ is veyn. Forsoþ and we ben found fals witnessis of God, for we han seyd witnessynge aȝens God, þat he reyside Crist, whom he reiside not, if deed men rysen not aȝen. Forwhy if deede men rysen not aȝen, neþer Crist roos aȝen; þat if Crist roos not aȝen, oure feiþ is veyn ”

“ Soþli he þat is wiþoute wyf is bysy what þingis ben of þe Lord, how he schal plese to God. Forsoþ he þat is wiþ a wyf, is bisy what þingis ben of þe world, how he schal plese þe wyf, and he is departid. And a womman vnweddid and mayden þenkiþ what þingis ben of þe Lord, þat sche be hooly in body and spirit. Forsoþ she þat is weddid, þenkiþ what þingis ben of þe world, how sche schal plese þe hosebonde. Soþeli I seye þes þingis to ȝoure profyt, not þat I caste to ȝou a snare, but to þat þat is honest, and ȝyueþ faculte, or esynesse, wiþ oute letting for to biseche to þe Lord. ”

“ Til into þis hour and we hungren, and þirsten, and ben nakid, and ben smytun wiþ boffatis, and we ben vnstable, and we trauelen worchinge wiþ oure hondis; we ben cursid, and we blessen; we suffren persecucioun, and we susteynen, or abyden longe; we ben blasfemyd, and we bisechen; as clensyngis of þis world we ben maad, þe paringis, or outcastinge, of alle þingis til ȝit. I write not þes þingis, þat I confounde ȝou, but I amoneste, or warne, as my moost dereworþe sones. Forwhi if ȝe han ten þousandis of litle maistris in Crist Jhesu, but not manye fadris ”

“ And so langagis ben in to tokene, not to feiþful men, but to men out of þe feiþ; forsoþ prophesyes not to men out of feiþ, but to feiþful men. Þerfore if al þe chirche come to gidere in to oon, and alle men speke in tungis, soþli if ydiotes entren, or men out of þe feiþ, wher þei seyn not, What ben ȝe wood? Forsoþ if alle men prophecien, forsoþ if ony vnfeiþful man or ydiot entre, he is conuict of alle, he is wyseli demed of alle. Forsoþ þe hid þingis of his herte ben knowen, and so he fallinge doun in to þe face, schal worschipe God, schewinge verily þat God in ȝou is. ”

“ Alle þingis ben leefful to me, but not alle þingis speden. Alle þingis ben leefful, but not alle þingis edifyen. No man seke þat þing þat is his owne, but þat þing þat is of anoþer. Al þing þat comeþ in þe bocherie, ete ȝe, no þing axynge for conscience. Þe erþe and þe plente of it, is þe Lordis. Forsoþ if ony of vnfeiþful, or heþen men, clepiþ ȝou to souper, and ȝe wolen go, al þing þat is sett to ȝou, ete ȝe, noþing axynge for conscience. If ony man soþli schal seie, Þis þing is offrid to ydols, nyle ȝe ete, for him þat schewide, and for conscience ”

“ He þat in þe Lord is clepid seruaunt, is fre man of þe Lord. Also and he þat fre man is clepid, is þe seruaunt of Crist. Wiþ prys ȝe ben bouȝt; nyle ȝe be maad seruauntis of men. Ech man þerfor in what clepinge he is clepid, in þat dwelle he anentis God. Forsoþ of virgyns I haue not precept of God; soþli I ȝyue counceil, as hauynge mercy of þe Lord, þat I be trewe. Þerfor I gesse, or deme, þis þing for to be good for present nede; for it is good to a man for to be so. ”

“ Neiþer þe kynde it silf techiþ vs, forsoþ þat if a man norische long heer, it is yuel fame, or sclaundre, to him; but if a womman norische long heer, it is glorie to hir, for heeris ben ȝouun to hir for veyle, or keueryng. Forsoþ if ony man is seyn for to be ful of stryf among ȝou, we han not such custom, neiþer þe chirche of God haþ sich. Soþli þis þing I comaunde, not preisynge, þat ȝe comen to gidere not in to betere þing, but into worse. ”