“ For grace of þis þing I bowe my knees to þe fadir of oure Lord Jhesu Crist, of whom ech fadirheed in heuenes and in erþe is named, þat he ȝyue to ȝou, vp þe richessis of his glorie, vertu for to be strengþid by his spirit in þe ynnere man, Crist for to dwelle by feiþ in ȝoure hertis; ȝe rootid and groundid in charite, þat ȝe mown comprehende wiþ alle seyntis, which is þe brede, and lengþe, and hiȝnesse, and depnesse; also for to wite þe charite of Crist aboue semynge to science, þat ȝe be fulfillid into al þe plente of God. ”

“ Fornycacioun forsoþ, and al vnclennesse, or auarice, be not named in ȝou, as it bicomeþ hooly men; eþer filþe, or foly speche, or harlotrie, þat perteyneþ not to þing, but more doynge of þankyngis. Forsoþ þis þing wyte ȝe, vndirstondinge þat ech fornycatour, or vnclene man, or coueytous, þat is seruage of ydols, or mawmetis, haþ not heritage in þe kingdom of Crist and God. No man disceyue ȝou by veyne wordis; forsoþ for þes þingis þe wraþþe of God cam into þe sones of vntrist, or vnbileue. ”

“ But as þe chirche is suget to Crist, so and wymmen to her housebondis in alle þingis. Men, loue ȝe ȝoure wyues, as and Crist louede þe chirche, and ȝaf him silf for it, þat he schulde make it hooly; clensynge it wiþ þe waisching stoon of watir, in þe word of lyf; þat he schulde ȝyue þe chirche glorious to him silf, not hauynge wem, or spot, or ryuelyng, or ony such þing, but þat it be hooli and vndefoulid. So and men schulen loue her wyues, as her owne bodies. ”