“ Forsoþ I seie þis, a testament confermyd of God, þe which aftir foure hundrid ȝeeris and þritti is maad lawe, makiþ not voyde for to avoyde þe biheeste. Forwhy if of lawe þe heritage, now not of biheeste. ”

“ Þerfore knowe ȝe, þat þei þat ben of þe feiþ, þei ben sones of Abraham. Forsoþe þe scripture purueyinge, for God iustifieþ of feiþ heþen men, toold bifore to Abraham, For in þee alle folkis, or heþene men, schulen be blessid. Þerfore þei þat ben of þe feiþ, schulen be blessid wiþ feiþful Abraham. Forsoþ who euere ben of þe workis of lawe, ben vndir curs; for it is writun, Cursid ech man, þat schal not dwelle in alle þingis þat ben writun in þe booke of lawe, þat he do hem. Forsoþ for no man is iustified in þe lawe anentis God, it is knowen, for a riȝtful man lyueþ of feiþ. ”

“ As I bifore seide, and now eftsoone I seye, if ony schal euangelise out taken þat þat ȝe han takun, cursid be he. I counceile now to men, or to God? or I seke for to plese to men? If I ȝit pleside to men, I were not þe seruaunt of Crist. Soþeli, briþeren, I make þe gospel knowun to ȝou, þe which is euangelisid, or prechid, of me, for it is not vp man; soþli neþer I took it of man, neþer lernyde, but by þe reuelacioun of Jhesu Crist. Forsoþe ȝe herden my lyuynge sum tyme in þe Juwerie, for ouer manere I pursuwide þe chirche of God, and fauȝte aȝens it. ”