“ Soþli wher we by mynde, or resoun, passen to God, wher we ben sobre to ȝou? Soþli þe charite of Crist dryueþ vs; gessinge, or demynge, þis þing, for if oon is deed for alle, þerfore alle ben deede. And Crist deyde for alle, þat and þei þat lyuen, lyue not now to hem silf, but to him þat deyede for hem, and roos aȝen. And so we fro þis tyme han knowe no man vp þe fleisch; and if we knowen Crist vp þe fleisch, but riȝt now we han not knowen. Þerfore if ony newe creature is in Crist, oolde þingis han passid, and lo! alle þingis ben maad newe. ”

“ Þe which delyuerede vs, and delyuereþ fro so greet perelis, in to whom we hopen, for and ȝit he schal delyuere, helpynge and ȝou in prayere for vs; þat of þe persoones of manye faces of þat ȝyuynge þat is in ȝou, by manye parceneris, graces, or þankyngis, ben don to God for vs. Forwhi oure glorie is þis, þe witnessinge of oure conscience, þat in symplenesse and clennesse of God, and not in fleischly wysdom, but in þe grace of God, we lyuen in þis world, forsoþ more plenteuously to ȝou. ”

“ Forwhi and if I schal glorie ony þing more of oure power, þe which þe Lord ȝaf to vs into edifyinge, and not into ȝoure distruccioun, I schal not schame. Forsoþe þat I be not gessid as for to feere ȝou by epistlis, forwhi þei seyn, Þe epistlis ben heuye, or greuouse, and strong, but þe presence of body sijk, and þe word contemptible, or worþi for to be dispysid. He þat is such maner man, þenke þis, for what maner men we ben absent by epistlis, suche maner men vs present in dede. Soþli we doren not putte vs among, or comparisowne vs to summe, þat comenden hem silf ”

“ Take ȝe vs; we han hurt no man, we han corupt no man, we han bigylid no man. I seye not for ȝoure condempnynge; forsoþ I seide bifore, þat ȝe ben in oure hertis, for to deie to gidere, and lyue to gidere. Moche trist is to me anentis ȝou, moche gloriynge is to me for ȝou. I am fulfillid wiþ comfort, I abounde, or am plenteuous, in ioye in al oure tribulacioun. Forwhi and whanne we hadden comen to Macedonye, oure fleisch hadde no reste, but we suffriden al tribulacioun; forsoþ wiþouteforþ, fiȝtingis, wiþ ynneforþ, dredis. But he þat comfortiþ meeke men, God comfortide vs in þe comynge of Tyte. ”

“ Forsoþ not oonli in þe comynge of him, but also in þe comfort by which he comfortide me in ȝou, tellinge to vs ȝoure desyr, ȝoure wepinge, ȝoure loue for me, so þat I ioyede more. For and if I made ȝou sori in a pistle, now it rewiþ me not; and if it rewide, I seynge þat þouȝ I made ȝou sory in þat pistle at an hour, now haue I ioye; not for ȝe weren maad sorowful, but for ȝe weren maad sorowful to penaunce. Soþli ȝe ben maad sory aftir God, þat in no þing ȝe suffre peirement of vs. Forsoþ þat sorwe þat is aftir God, worchiþ penaunce in to stedefast heelþe ”