“ A man double of inwit is vnstable in alle his weyes. Forsoþe a meke broþer glorye in his enhaunsinge, soþeli a riche man in his mekenesse; for as þe flour of hay, or grasse, he shal passe. Soþeli þe sunne is sprungen vp wiþ brennynge, or heete, and driede þe hay, and þe flour of it fel doun, and þe fayrnesse of his cheere perischide; so and a riche man welewiþ in his weies. Blessid is þe man, þat suffriþ temptacioun; for whan he shal be proued, he shal receyue þe crown of lijf, þe which God aȝen bihiȝte to men louynge him. No man whan he is temptid, seie, for he is temptid of God ”

“ Þerfore þou seest, for feiþ wrouȝte wiþ his werkis, and his feiþ is fulfillid of werkis. And þe scripture is fulfillid, seiynge, Abraham bileuede to God, and it is rettid to him to riȝtwisnesse, and he is clepid þe frend of God. Ȝe seen for a man is iustified of werkis, and not of feiþ onely. Also forsoþe and Raab, hoore, wher she was not iustified of werkis, receyuynge þe messageres, and bi an oþer weie doynge out, or sendinge out? Forsoþe as a body wiþ oute spirit is deed, so and feiþ wiþ oute werkis is deed. ”

“ Wite ȝe, my briþeren moost loued, be ech man swift for to here, forsoþe slowe for to speke, and slowe to wraþþe; soþeli þe wraþ of man werchiþ not þe riȝtwisnesse of God. For which þing ȝe castinge awey al vnclennesse, and plente of malice, in myldenesse, or homelynesse, receyue ȝe þe word insent, or ioyned, þat mai saue ȝoure soules. Forsoþe be ȝe doers of þe word, and not herers onely, deceyuynge ȝou silf. For if ony man is an herer of þe word, and not doer, þis shal be comparsound, or likned. to a man biholdinge þe cheere of his birþe in a myrour ”