“ Þerfore I susteyne alle þingis for þe chosene, þat and þei gete þe heelþe, þat is in Crist Jhesu, wiþ heuenly glorie. A trewe word, forwhi if we ben to gidere deede, and we schulen lyue to gidere; if we schulen susteyne, and we schulen regne to gidere; if we schulen denye, and he schal denye vs; if we bileuen not, he dwelliþ feiþful, he may not denye him silf. Forsoþ þes þingis I moneste, witnessinge bifore God. Nyle þou stryue in wordis; forsoþ to no þing it is profitable, no but to þe subuertyng of men heeringe. ”

“ In my firste defence no man was to me, but alle forsoken me; be it not rettid to hem. Forsoþ þe Lord stood nyȝ to me, and comfortide me, þat þe preching be fulfillid by me, and þat alle folkis heere, and I am delyuered fro mouþ of þe lyoun. Forsoþ þe Lord delyuerede me fro al yuel werk, and schal make saaf into his heuenli kingdom, to whom glorie into worldis of worldis. ”

“ And what þingis þou hast herd of me by many witnessis, bitake þou þese to feiþful men, þe whiche schulen be able and for to teche oþere men. Trauele þou as a good knyȝt of Crist Jhesu. No man holdinge knyȝþod to God, inwlappiþ him silf wiþ worldli nedis, þat he plese to him, to whom he haþ prouyd him silf. Forwhi and he þat stryueþ, or fiȝtiþ, in batel, schal not be crowned, no but he schal fiȝt lawfully. It bihoueþ an erþe tilier for to resceyue first of þe fruytis. Vndirstond þou what þingis I seie. Soþli þe Lord schal ȝyue to þee in alle þingis vndirstondyng. ”