“ And þe word cam to þe kyng of Nynyue; and he ros of his seete, and castide awey his cloþing fro hym, and is cloþid wiþ sacke, and sate in ashe. And he criede, and saide in Nynyue of þe mouþ of þe kyng and of his princes, sayinge, Men, and werk beestis, and oxen, and sheep taaste not ony þing, neþer be fed, neþer drynke watir. And be men hillid wiþ sackis, and werk beestis crie to þe Lord in strengþe; and be a man conuertid, or al turnyd, fro his yuel waye, and fro wickidnesse þat is in þe hondis of hem. ”

“ And Jonas ros for to fleeȝ in to Tharsis, fro þe face of þe Lord. And he came doun to Joppe, and foonde a ship goynge in to Tharsis, and he ȝaue shiphijre to hem; and he wente doun in to it, for to go wiþ hem in to Tharsis, fro þe face of þe Lord. Forsoþe þe Lord sente a grete wynde in þe se, and a grete tempest is maad in þe se, and þe ship was in peryl for to be broken. And ship men dredden, and men crieden to her god; and senten vessels, þat weren in þe ship, in to þe se, þat it were maad liȝter of hem. And Jonas wente doun to þe ynner þingis of þe ship, and slepte in a greuouse sleep. ”