“ Þese þingus saiþ þe Lord, On þree grete trespassis of Yrael, and on foure, Y shal not conuerte hym, for þat he solde a iust man for syluer, and a poore man for shoone. Whiche breken to gydre on dust of þe erþe þe hedis of pore men, and bowen awey þe waye of meeke men; þe sone and his fadir wente to a wenche, þat þei defouliden myn holy name. And on cloþis leyde to wedde þei eeten bysidis eche auter, and drunken wijn of dampnyd men in þe hous of her God. Forsoþe Y distruyede Ammorey fro þe face of hem, whos hienesse of cedris þe hyenesse of hym, and he strong as an ook ”

“ Wher it is not þus, ȝe sonys of Yrael? saiþ þe Lord. And ȝe ȝauen wijn to Naȝareys, and ȝe comaundiden to prophetis, sayinge, Prophecie ȝe not. Loo! Y shal sowne strongly vndir ȝou, as a wayn chargid wiþ hay sowneþ strongly. And fliȝt shal perische fro þe swift, and a strong man shal not weelde his vertue, and a miȝty man in strengþe shal not saue his soule, or lijf; and a man holdynge bowe shal not stonde, and þe swift in his feet shal not be saued; and þe styer of hors shal not saue his soule, and þe stronge in herte amonge men shal flee nakid in þat day, saiþ þe Lord. ”