“ Þese þingus þenkende in myn herte, in God Y shal hope.
Heþ. Þe mercyes of þe Lord manye, forsoþe wee ben not wastid; for his mercyes faileden not. Y kneȝ þe morutid; myche is þi feiþ. My partie þe Lord, seide my soule; þerfore Y shal abiden hym.
Teþ. Good is þe Lord to men hopende in hym, to þe soule sechende hym. Good is to abide wiþ silence þe helþe ȝyuere of God. Good is to þe man, þat haþ born þe ȝoc of þe Lord fro his waxende ȝouþe. ”

“ Fulfilde is þi wickenesse, þou doȝter of Sion; he shal no more adde, þat he ouerpasse þee; he shal visite þi wickenesse, þou doȝter of Edom, discouere he shal þi synnes.
Capitulum V.
Here begynneþ þe Orisoun of Jeremye, þe prophete.
Recorde, Lord, what haþ falle to vs; inwardly looke, and behold oure repref. Oure eretage turned is to alienes, oure houses to straungeres. Faderles childer we ben mad wiþ oute fader; oure moders as widewis. Oure water in monee wee han drunke, oure trees for pris wee han boȝt. Bi oure nollis we were dryue, and to þe weri was not ȝoue reste. ”

“ Of þe mouþ of þe heȝest shul not go out ne goode þingus ne euele. What grucchede a man lyuende, a man for his synnes?
Nun. Serche we oure weies, and seche, and be wee turned aȝeen to þe Lord. Rere wee oure hertus wiþ hondus, to þe Lord in to heuenus. Wee wickeli diden, and to wraþe terreden; þerfore þou art vnpreiable.
Sameþ. Þou coueridist in wodnesse, and smyte vs; þou slowe, and sparedist not. Þou puttest aȝen a cloude to þee, lest passe þe preieer. Pulling vp bi þe roote, and casting awei, þou puttist me, in þe myddel of puplus. ”