“ Þe vois of þe Chirche to Crist. Cum, my leef, go wee out in to þe feeld; dwelle wee togidere in tounes. Erli rise wee to þe vyne; see wee, if þe vyne flourede, if þe floures frutes bringe forþ, if þe poumgarnetes floureden; þere I shal ȝiue to þee my tetes. Þe mandrages ȝeuen þer smel in oure ȝates; alle appelis, newe and olde, my leef, I kepte to þee.
Capitulum VIII. Þe vois of patriarkis, of Crist. Who to me ȝyueþ þee, my broþer, soukende þe tetes of my moder, þat I finde þee alone wiþoute forþ, and kisse þee, and now me no man dispise? ”

“ Þe vois of þe Chirche, of Crist. Þe vois of my lemman; lo! þis comeþ lepende in mounteynes, and ouer lepende hillis. Lic is my lemman to a capret, and to an hert calf of hertis; lo! he stant bihynde oure wal, biholdende bi þe windowes, aferr lookende þurȝ þe latises. Lo! my lemman spekeþ to me, Ris, go þou, my leef, my culuer, my shapli, and cum; now forsoþe wintre passede, weder ȝide fro, and is gon awei. Floures apereden in oure lond, time of kutting is come; þe vois of þe turtil is herd in oure lond, þe fige tree broȝte forþ his first figus; þe vynes flourende ȝiuen þer smel. ”

“ Hou faire ben þi tetes, my sister, my spouse; fairere ben þi tetes þan win, and þe smel of þin oynemens ouer alle spices. A droppende honycomb þi lippes, spouse; hony and mylc vnder þi tunge, and þe smel of þi cloþingus as þe smel of cens. A closid gardin, my sister spouse; a closid gardyn, a welle selid. Þin outsendingus paradis of poungarnetes, wiþ þe frutis of appilis, of cipre tre, wiþ narde; and narde, and safrun, fistula, and canel, wiþ alle þe trees of Liban, myrre, and aloes, wiþ alle þe firste oynemens. Þe welle of gardynes, þe pit of liuende watris, þat flowen wiþ bire fro Liban. ”