“ Þat if ȝee shul not don, ne here þe vois of þe Lord oure God, to werche to þe king of Babiloyne, ȝoure failing Y shal make fro þe cites of Juda, and fro þe ȝatus of Jerusalem; and Y shal take awei fro ȝou þe vois of merþe, and þe vois of ioȝe, and vois of þe man spouse, and vois of þe womman spouse; and ben shal al þe lond wiþ oute step from þe dwelleres in to it. And þei herden not þy vois, þat þei shulde wrche to þe king of Babiloyne ”

“ For þe synnes þat ȝee synnyden befor God, ȝe shuln be led caitifs in to Babiloyne, of Nabugodonosor, kyng of men of Babiloyne. And so ȝe gon in to Babiloyne shuln be þere ful many ȝeris, and in to longe tyme, vnto seuen generacions; forsoþ after þis I shal lede out ȝou þennis wiþ peese. Now forsoþ ȝe shuln see in Babiloyne golden goddis, and silueren, and stonen, and treen, for to be born in shuldris, shewinge drede to folkis. Þerfor see ȝee, lest and ȝee be maad liche to alien dedis, and ȝee dreede, and þat drede take ȝou in hem. ”

“ Soþeli as a vessel of a man broken is maad vnprofitable, siche ben þe goddis of hem. Hem sett to gidir in an hous, þe eeȝen of hem ben ful of dust of þe feet of men entrynge in. And as to sum man þat offendiþ þe kyng, þe ȝatis ben sette aboute, and as dead man led to sepulcre, so prestes oft kepen þe dores wiþ closingis and lockis, lest þei be robbed of day þeues. ”

“ In þe same manere and in a ȝerd a whijt þorn, vpon whiche eche bridde sittiþ, also and to a dead þing cast in derckenesses, þe treenen godus of hem, and ensiluered, and engoldid, ben lijc. And of þe purpre and marble, þat þei holden aboue hem, ȝee shuln wite also, for þei ben no goddis. Also at þe last þei hem self ben eten, and it shal be in to repreue in þe cuntre. Betir is an iust man, þat haþ not symylacris, for whi he shal be fer fro shenshipes. ”

“ And þei senten in to Jerusalem to Joachym, sone of Elchie, sone of Salen, þe prest, and to þe prestus, and to al þe puple þat ben founde wiþ hym in Jerusalem; whan þei shulde take þe vesseles of þe temple, þat weren take awei fro þe temple, to aȝeen clepe in to þe lond of Juda, þe tenþe dai of þe moneþ Cybam; þe siluer vesselis, þat Sedechie, sone of Josie, king of Juda, made, after þat Nabugodonosor, king of Babiloyne, hadde take Jeconye, and his princes, and alle þe myȝti, and þe puple of þe lond fro Jerusalem, and broȝte þem gyued in to Babiloyne. ”

“ Neþer ȝif þei suffren eny þing of euyl of eny man, neþer ȝif eny þinge of good, þei shuln mowe ȝeelde. Neþer þei mown make a kyng, neþer do aweie. Also neþer þei mown ȝeue ricchessis, neþer ȝeeld euyll þing. ”

“ Soþli ȝee han forȝeeten hym þat nurishide ȝou, and ȝee han maad sorewful Jerusalem, ȝour nurshe. Soþeli it sawe wraþfulnesse of God cummynge to ȝou; and saide, Ȝee niȝ coostis of Syon, heere; forsoþe God brouȝt to me grete mournynge. Forsoþ I seeȝ þe caitifte of my peple, of my sones and douȝtris, whiche þe euerlastynge aboue brouȝte to hem. Soþeli I nurishide hem wiþ mirþe; forsoþe I left hem wiþ weepynge and mournynge. No man haue ioye vp on me, widue and desolate. I am left, or forsaken, of manye, for þe synnes of my sones; for þei bowiden awei fro þe lawe of God. ”