“ And þe galle is worþ to eȝen to ben enointid, in þe whiche were rime, and þei shul ben hol. And Tobie seide to hym, Where wilt þou, þat wee dwelle? And þe aungil answerende seiþ, Heer is a man, Raguel bi name, neeȝ of þi linage, and þis haþ a doȝter, Sara bi name; but any oþer he haþ saue hir, neiþer male ne femele. To þee is due al his substaunce; and þee behoueþ to han hir wif. Aske þanne hir of hir fader; and he shal ȝiue to þee hir wif. Þanne answerde Tobie, and seide, I haue herd, for she haþ ben take to seuene men, and þei ben deade; but and þese þingus I haue herd, for a deuel sloȝ hem. ”

“ Þanne þe aungil seide to hym, Opene þis fish, and his herte and galle and mawe lei vp to þee; þese þingus forsoþe ben profitabli necessarie to medicynes. Þe whiche þingus whan he hadde do, he rostide his flesh, and beren wiþ hem in þe weie; þe toþer þei saltiden, þat shulden suffise to þem in þe weie, to þe time þat þei shulden ful come in to Ragis, cite of Medis. Þanne Tobie askide þe aungil, and seide to hym, I beseche, Asarie, broþer, þat þou sei to me, what remedie shuln han þese þingus, þat of þe fish þou hast comaundid to be kept. ”

“ Alle time blesse God, and aske of hym, þat þi weies he make redi, and alle þi counseilis in hym abijde stille. I shewe also to þee, my sone, me to han ȝiue ten talentus of seluer, whil ȝit þou were a litil faunt, to Gabel, in Ragis, cite of Medis; and þe writ of it anent me I haue; and þerfore enserche, what maner to hym þou come, and resceyue of hym þe aboue membrid weiȝte of siluer, and restore to hym his writ. Wile þou not dreden, sone myn; a pore lijf forsoþe wee bern, but manye goodis wee shul han, if wee drede God, and gon awei fro alle synne, and do wel. ”

“ Capitulum XIII. Forsoþe þe eldere Tobie, openende his mouþ, blesside God, and seide, Lord, þou art gret in to wiþ oute ende, and in to alle worldis þi reume; for þou scourgist, and sauest; ledest to hellis, and aȝeen bringist; and þer is not þat ascape þin hond. Knoulecheþ to þe Lord, ȝee sonus of Irael, and in þe siȝte of Jentilis preiseþ hym; for þerfore he scaterede ȝou among Jentilis, þat vnknowen God, þat ȝee tellen out his merueilis, and maken hem to knowen, for þere is noon oþer God almyȝti biside hym. He chastiseþ vs for oure wickednesse ”

“ After whan alle wenten to þe goldene calues, þe whiche Jeroboam, king of Irael, made, þis alone fleiȝ þe cumpanye of alle; and wente to Jerusalem, to þe temple of þe Lord, and þere honourede þe Lord God of Irael, alle his firste frutis and his dymys treuli offrende; so þat in þe þredde ȝer to þe conuertid fro Jentilis and to comelingus he mynystrede alle tiþing. ”

“ Capitulum I. Tobie, of þe linage and of þe cite of Neptalim, þat is in þe ouere partis of Galilee, aboue Nason, after þe weie þat lediþ to þe west, in þe left hauende þe cite of Sofeþ, whan he was caȝt in þe daȝes of Salmanasar, king of Assiries, ner þe latere in caitifte sett, þe weie of treuþe he forsoc not, so þat alle þingus þat he myȝte han, eche dai to þe caityue breþern þat weren of his kinrede he delede. And whan he was alle ȝungere in þe linage of Neptalim, ner þe latere no childli þing he dide in deede. ”

“ And whan wiþ manye woordis Raguel preȝede Tobie, and he hym bi no resoun wolde heren, he toc to hym Sara, and þe half part of al his substaunce, in childer, in hand wymmen, in bestis, in camailis, and in kijn, and myche monee; and saaf and ioȝende he lafte hym fro hym, seiende, Þe holi aungil of þe Lord be in ȝoure weie, and ful bringe ȝou sound, and finde ȝee alle þingus riȝte aboute ȝoure fadris and modris, and see myn eȝen ȝoure sonus, raþere þan I die. ”