“ To whom answerde Noemy, Blessid be he of þe Lord, for þe same grace þat he haþ ȝeuen to men o lyue, he haþ kept and to þe deed. And eft she seiþ, Oure nyȝ kyn is þe man. And Ruþ, Forsoþe þis he seiþ and comaundide to me, þat so long I shulde be ioyned to þe repers of hym, to þe tyme þat alle þe cornys ben ropen. To whom seide þe moder in lawe, Betere it is, douȝter myn, þat wiþ þe childre wymmen of hym þou goo out to repe, lest in anoþer feeld eny man wiþstoonde to þee. ”

“ Forsoþe Booz takynge ten men of þe eldre of þe citee seide to hem, Sittiþ here. Þe which sittynge, he spak to þe nyȝ kyn, Noemy soolde a parti of þe feeld of oure broþer Elymalech, þe which is turnyd aȝen fro Moabitis regyon, þe which þing Y wold þee to here, and to þee seyn before al men sittynge and þe more men þurȝ birþ of my puple. If þou wolt weeld þe feeld bi ryȝt of niȝ kynrede, bye and weeld; forsoþe if it to þee displese, þat same þing shewe to me, þat I wite what I owe to do; forsoþe no man is nyȝ kyn, out taak þee þat art formere, and me þat am secounde. ”

“ And Booz seide to hir, Whanne our of etynge shal be, com hidre, and eet breed, and weet þi morsel in eysel. And so she sat at þe side of þe repers, and made to hir potage, and she eet, and is fild, and took þe relifes. ”