“ But perauenture Tullyus is to be wenyd enblowid wiþ þe spirit of retorik, to haue translatid þe boke þat is seid Economyk of Zenofontes, and þe boke þat is seid þe Pictagore of Plato, and þe boke þat is seid Proþesifontes of Demostynes; oþer þe Holi Gost wenyde witnessis of þe same bokis oþre wise bi þe seuenti vndoers of tungis, oþre wise bi þe apostlis, þat þat þei helden þer pees, þes han liȝid to ben writun. ”

“ Þe Faryseus ben stonyed in þe doctryne of þe Lord, and wondren in Petre and Joon, how þei kunnen þe lawe, siþ lettres þei lerneden not. What euer forsoþe to oþer men excersice and ech dai þenkynge in þe lawe was wont to ȝyuen, þat to hem þe Holi Gost tolde, and after þat it is writin, "þei weren Goddis tauȝt men," þat is, able men to liȝtli be tauȝt of God. ”

“ Malachi, apertlich and in þe ende of alle prophetis, of þe castyng out of Israel and þe clepyng of Gentilis seiþ, "Wil is not to me in ȝow, seiþ þe Lord of oostis, and ȝift shal I not take of ȝoure honde; fro þe sunne arysyng vnto þe goyng down greet is my name in Gentilis, and a clene offryng is sacrified, and offrid to my name in alle places." ”

“ Þe þrid haþ bigynnyngis and ende wiþ so feel derknessis enuolued, þat, as anentis þe Ebrewis, þilk partis wiþ þe bigynnyng of Genesis shulde not be rad bifore þretti wynter. Þe ferþe forsoþe, þe which and þe laste among þe foure prophetis, knower of tymes, a louer of stories of al þe world, feer bifore telliþ þe stoon before kit of þe hil wiþ outen hondis, and al rewmes subuertynge, wiþ a clere sermoun. Dauid, oure Symphonydes, Pyndarie, and Alcheus, Flaccus, and Catullus, and Serenus, precheþ Crist wiþ þe harp, and in þe ten cordid sawtri arereþ vp þe ariser fro helle. ”

“ Daniel in þe ende of þe most holi visioun seiþ riȝtwise men to shyne as sterrys, and vndirstonders, þat is, tauȝt men, as þe fermament. Þou seest how myche þei ben atwyn, riȝtwise chirlehede and tauȝt ryȝtwisnesse. Oþer men to sterres, oþer men to heuene ben comparisoned; al be it þat, aftir þe trewþe of Ebrew tung, eiþer may be vndurstondun of lerned men. Þus we reden anentis hem, "þilk forsoþe þat weren tauȝt shulen shyne as þe shynyng of þe firmament, and þoo þat techen many men to rightwisnes as sterres into perpetuel eternytees." ”

“ What þanne? dampne we þe olde? nay, but after þe studies of þe raþer men, in þe hous of þe Lord we traueilen þat þat we may. Þei han undon scripturis before þe coming of Crist; and þat þat þei wisten not, þei han spokin wiþ doutous sentence, we after þe passioun and þe resurreccoun of hym not oonli profesie, but storye wrytun. Oþre weys forsoþe þingis seen, oþer wise þingis herd ben told; þat we beter vndirstonden, beter we tellen. ”

“ Osee often nemneþ Effraym, Samary, Joseph, Jezrael, and þe fornycary wijf, and þe sonis of fornycacoun, and þe auowtres closid in þe bed of þe husbond to setten myche tyme wydow, and vndir þe mornyng cloþ of þe husbond to abide þe comyng aȝen to hir. ”

“ Naum, coumfortour of þe world, blameþ þe citee of blodis, and after his turnyng awey spekiþ, "Loo, vpon þe hillis þe fete of þe euangelisynge and tellynge pees." Abacuc, a strong wristeler and a sharp, stondiþ vpon his waard, and ficcheþ a weie of grees vpon þe strengþe, þat Crijst in cros he biholde, and seie, "Þe glorie of hym coueride heuenes, and of hys preisyng ful is þe erþe; his shynyng shal be as liȝt, and hornes in his hondis, þere his strengþe is hid." ”