“ And þou keptist þe heestis of Amry, and al þe werke of þe hous of Achab, and hast walkide in þe voluptees, or lustis, of hem, þat Y shulde ȝeue þee in to perdicioun, and men dwellynge in it in to hissyng, or scornyng, and þou shalt bere þe shenship of my peple.
Capitulum VII. Woo to me, for Y am maad as he þat gadriþ in heruest rasyns of grape tyme; þer is no clustre for to ete; my soule desiride fijgis rijp before oþer. Þe holy perishide of þe erþe, and riȝtful is not in men; alle in blood aspien, a man hunteþ his broþer to deþ. ”

“ And myn enmye shal byholde me, and she shal be hillid wiþ confusioun, whiche saiþ to me, Wher is þe Lord þi God? Myn eeȝen shuln se hir, now she shal be in defoulyng, as clay, or fen, of stretis, day þat þi wallis be beeldid. In þat day law shal be maad afer, in þat day Assur vn to þee shal come, and vn to stronge citees, and fro stronge citees vnto þe flood; and to see of see, and to hill of hill. And þe erþe shal be in to desolacioun for hir dwellers, and for fruyte of þe þouȝtis of hem. Feed þou þi peple in þi ȝerd, þe floc of þin eritage, dwellynge aloone in þe wijld wode ”

“ Ryse ȝe, and go, for here ȝe han not reste; for þe vnclennesse þerof it shal be corrupt wiþ þe warst rott. Y wolde Y were not a man hauynge spirit, and raþer Y spake lesyng. Y shal droppe to þee in to wyn, and in to drunkenesse; and þis peple shal be, on whom it is droppid. Wiþ gadryng Y shal gadre Jacob; Y shal leede to gydre þee al in to oon, þe relikis of Yrael. Y shal putte hym to gydre, as a flok in folde; as sheep in þe mydil of foldis þei shuln make noyse, of multitude of men. ”