“ I þe Lord, and þer is not more ouer; out of me is not God. I girde þee to, and þou knewe not me; þat þei wite, þat fro þe rising of þe sunne, and þat fro þe west ben, for wiþoute me is not a God. I þe Lord, and þer is not an oþir; foormende liȝt, and shapende dercnesses, makende pes, and shapende euel; I þe Lord, doende alle þese. Deweþ, ȝee heuenus fro aboue, and cloudis reyne þei þe riȝtwis; be opened þe erþe, and burioune it a saueour, and riȝtwisnesse springe togidere; I þe Lord shop hym. Wo þat wiþ seiþ to his makere, þe shord of þe toȝ clei of erþe. ”

“ Wheþer such is þe fasting þat I chese, bi þe dai a man to tormenten his soule? wheþer to binde togidere as a cercle his hed, and sac and asken to araȝen? Wheþer þis I clepede fasting, and an acceptable dai to þe Lord? Wheþer not þis is more fasting þat I ches? Vnbind þou þe togidere bindingus of vnpitousnesse, loose þe bundeles doun berende; lete hem þat ben to-broke, free, and eche charge to-brec. Brec to þe hungri þi bred, and þe helpeles and vagaunt bring in to þin hous; whan þou shalt see þe nakid, couere hym, and þi flesh þou shalt not dispise. ”

“ Wileþ not dreden, ne beþ disturbid; fro þennus to heeren þee I made, and tolde; ȝee ben my witnesses. Wheþer is God wiþoute me, and a foormere, whom I haue not knowe? Þe foormeres of þe mawmet alle noȝt ben, and þe most loued þingus of þem shul not profiten to þem; þei witnesses of hem ben, for þei seen not, ne vnderstonde, þat þei be confoundid. Who foormede God, and a grauen þing ȝetede, to no þing profitable? Lo! alle his parceneres shul be confoundid; þe forgeres forsoþe ben of men. Þei shuln come togidere, alle þei shul stonde, and inwardli dreden, and ben confoundid togidere. ”

“ Capitulum XLV These þingus seiþ þe Lord to my crist, Ciro, whos riȝt hond I toc, þat I soogete bifor his face Jentiles, and þe reggus of kingus I turne; and opene biforn hym þe fyrste entrees, and þe ȝates shuln not be closid. I byfor þee shal go, and þe glorious men of erþe I shal meeken; þe brasene ȝates I shal tobrose, and þe irene barres I shal tobreke. And I shal ȝyuen to þee tresores hid, and þe priue þingus of priuytees, þat þou wite, for I þe Lord, þat clepe þi name, God of Irael, for my seruaunt Jacob, and Irael my chosen, and I clepede þee in þi name ”

“ More precious a ful man shal be þan gold, and a man þan clene most shynende gold. Vp on þis heuene I shal disturben, and shal be moued þe erþe fro his place; for þe indignacioun of þe Lord of ostes, and for þe dai of þe wraþe of his wodnesse. And he shal ben as a foun fleende, and as a sheep, and þer shal not be þat gedere; eche to his puple shal be turned, and a rowe to þer lond þei shul flee. Eche þat were founde, shal be slayn; and eche þat ouer shal come, shal falle in swerd. Þe fauntes of hem shul ben hurtlid doun in þer eȝen ”

“ And wente oute to hym Elyachym, sone of Elchie, þat was vpon þe hous, and Sobna, scribe, and Joae, þe sone of Asaf, chaunceler. And Rapsaces seide to þem, Seiþ to Ezechie, Þese þingus seiþ þe grete king, king of Assiries, What is þis trist, þat þou trostest? or of counseil or strengþe to rebellen þou disposist? vp on whom hast þou trost, for þou hast gon awei fro me? Lo! þou trostist vp on þis staf of reed to-broken, vp on Egipt, to whom if a man shul lene, it shal go in to his hond, and þerlen it; so Farao, king of Egipt, to alle men þat trosten in hym. ”

“ If ȝee shul not leeuen, ȝee shul not abide stylle. And þe Lord leide to to speke to Achaz, seyende, Aske to þee a tokne fro þe Lord þi God, in to þe depþe of helle, or in to heiȝte aboue. And Achaz seide, I shal not aske, and I shal not tempte þe Lord. And he seyde, Hereþ þanne, ȝee þe hous of Dauid; wheþer litil to ȝou is to ben greuous to men, for ȝee ben greuous and to my God? For þat he þe Lord shal ȝyue to ȝou a tocne. Lo! a mayde shal conceyue, and bern a sone; and þou shalt clepe his name Emanuel. Butter and hony he shal ete, þat he kunne repreuen euel, and chesen good. ”

“ And a man shal be, as þat is hid fro þe wynd, and coouereþ hymself fro tempest; as ryueres of watris in þrist, and shadewe of þe ston ouerstondende in þe desert lond. Daswen shul not þe eȝen of men seende, and þe eres of men herende bisily shul herknen; and þe herte of fooles shal vnderstonde kunnyng, and þe tunge of bufferes swiftli shal speke, and pleynly. Þer shal no more be clepid he þat is vnwis a prince, ne þe gylere shal be clepid a meyr. Þe fool forsoþe fool þingus shal speke, and his herte shal do wickidnesse, þat he fulfille feynyng, and speke to þe Lord gilendely ”

“ I shal not be stille, but I shal ȝelde, and quyte in to þe bosum of þem þer wickidnesses, and þe wickidnesses of ȝoure fader togidere, seiþ þe Lord, þat sacrifieden vp on mounteynes, and vp on hilles repreueden to me; and I shal aȝeen mesuren þe werc of hem first in þe bosum of hem. ”

“ Capitulum LXIIII Wolde God þou shuldist to-breke heuenus, and comen doun, fro þi face hillis shulden flowe doun, as out brennyng of fyr þey shulden vanshe awei, watris shulden brenne wiþ fyr; þat knowen were maad þi name to þin enemys, fro þi face Jentilis shulden ben disturbid. Whan þou shalt do merueiles, wee shuln not sustene. Þou descendedest, and fro þi face mounteynes floweden doun. Fro þe world þei herden not, ne wiþ eres parceyueden; þe eȝe saȝ not, þou God, wiþoute þee, what þingus þou hast mad redi to men abidende þee. Þou aȝen came to þe gladere, and to þe doende riȝtwisnesse ”

“ Capitulum LIX Lo! þer is not abreggid þe hond of þe Lord, þat sauen he mai not, ne agreggid is his ere, þat he ful out here not; but ȝoure wickidnesses deuydeden betwe ȝou and ȝoure God, and ȝoure synnes hidden his face fro ȝou, þat he ful out here not. Forsoþe ȝoure hondis ben defoulid wiþ blod, and ȝoure fingris wiþ wickidnesse; ȝoure lippes speeken lesing, and ȝoure tunge wickenesse spekeþ. Þer is not, þat inwardly clepe riȝtwisnesse, ne þer is, þat deme verreli; but þei trosten in þing of noȝt, and speken vanytees; þei conceyueden trauaile, and beeren wickidnesse. ”

“ For þat hereþ þe wrd of þe Lord, ȝee men gileris, þat lordshipen vp on my puple þat is in Jerusalem. Ȝee seiden forsoþe, Wee han smyte pes bond wiþ deþ, and wiþ helle wee han maad couenaunt; scourge flowend whan shal passe, shal not come vp on vs, for wee han set lesyng oure hope, and wiþ lesyng we ben couered. Þerfor þese þyngus seiþ þe Lord God, Lo! I shal senden in þe foundemens of Sion a corner ston precious, proued, in þe foundement foundid; who shal beleeuen, heeȝe he not. And I shal putte in peis dom, and riȝtwisnesse in mesure ”

“ No man, whan þe profetes he shal seen wiþ versis to ben discriued, in metre eyme he hem anent þe Ebrues to ben bounden, and any þing lic to han of Salmes, or of þe werkus of Salomon; but þat in Demostene and Tullio it is wont to ben do, þat bi dyuyseouns, and vnder distincciouns þei ben writen, þe whiche forsoþe in prose, and not in vers wryten. Wee forsoþe, to þe profit of rederes purueyende, þe newe remenyng wiþ a newe maner of writing han distinctly write. ”

“ Þou hast multeplyed þe folc of kinde, not magnefiedist gladnesse; þei shul glade bifor þee, as þei þat gladen in rip, as ful out ioȝen ouercomeres, þe prey taken, whan þei deuyden spoiles. Þe ȝoc forsoþe of his charge, and þe ȝerde of his shulder, and þe kingus power of his wrong asker þou ouercame, as in þe dai of Madian. For eche violent reuyng wiþ noise, and cloþing mengd wiþ blod shal be in to brennyng, and mete of fyr. A litil child forsoþe is born to vs, and a sone is ȝoue to vs, and mad is princehed vp on his shulder ”

“ Capitulum XLII Lo! my seruaunt, I shal vndertaken hym, my chosen, al plesede to hym in hym my soule. I ȝaf my spirit vp on hym, dom to Jentiles he shal bringe forþ. He shal not crien, ne take persone, ne shal ben herd his voys wiþouteforþ. A reed brosid he shal not to-trede, and flax smokende he shal not quenchen; in treuþe he shal bringe out dom. ”

“ In þe lond of tribulacioun and of anguysh, a leounesse, and a leoun, of hem a violent eddere, and a kokatrice fleende; berende vp on þe shuldris of bestes þer richesses, and vp on þe bocche of camailes þer tresores, to þe puple þat to þem myȝte not han profited. ”

“ And bild vp shul ben in þee þe desertes of worldus, þe foundemens of ieneraciouns and of ieneraciouns þou shalt reren; þou shalt ben clepid a bildere vp of hegges, turnende awei þe paþis of wickidnesses. If þou schalt turne awei fro þe sabot þi foot, to do þin owne wil in myn hoely dai, and clepist a delicat sabot, and þe hoely of þe Lord, glorious, and glorifiest hym, whil þou dost not þi weies, and is not founde þin owne wil, þat þou speke a wrd; þanne þou shalt delyten vp on þe Lord, and I shal rere þee vp vp on þe heiȝtus of erþe, and shal fede þee wiþ þe eritage of Jacob, þi fader ”