“ Alle þe premisses of fyue and twenti þousandis, by fyue and twenti þousandis in sqware, shuln be departid in to primisses of þe sayntuarie, and possession of þe citee. Forsoþe þat þat shal be left ouer, shal be of þe prince, on eche part of primissis of þe sayntuarie, and possessioun of þe citee, euen aȝeins fyue and twenti þousandis of primissis, vnto þe eest terme; bot and to þe see euen aȝeinus of fyue and twenti þousandus, vn to þe terme of þe see, also in partis of þe prince shal be; and premissis of þe sayntuarie shuln be, and þe sayntuarie of temple of þe cite, in mydil þerof. ”

“ Þerfor I ȝaue þee shenship to heiþen men, and scornynge to alle loondis þat ben besidis; and þei þat ben fer fro þee shulen haue victorie of þee, þou foule, noble, greet in perishing. Loo! þe princes of Israel, eche in her arm, weren in þee, for to shede out blood. Þei punyshiden wiþ wroongis þe fadir and moder in þee, þei falsly chalengiden a cumlynge in þe mydil of þee, þei maden sorewful fadirles and moderles and widewe anentis þee. Ȝe han dispiside my seyntuaries, and ȝe han defoulide my sabotis. Men bacbiters weren in þee, for to shede out blood, and vpon mounteyns þei eten in þee ”

“ Men of Persis, Eþiopiens, and Libiens wiþ hem, alle sheeldid and helmyd. Gomer, and alle his cumpanyes, þe hous of Togorma, sydis of þe norþ, and al þe strengþe of hym, and many peplis wiþ þee. Diȝte, and make þee redy, and alle þi multitude þat is gadred to þee, be þou to hem in to comaundement. After many dayes þou shalt be visitid, in þe last of ȝeeris þou shalt cum to erþe, whiche is turnyd aȝein fro swerd, and is gadrid of many peplis, to þe hillis of Yrael þat weren desert lastyngly ”

“ Forsoþe if a iust man shal turne hym a wei fro his riȝtwisnes, and shal doo wickidnes, after alle þe abomynaciouns whiche þe vnpytous man is wont for to worche, wheþer he shal lyue? Alle his riȝtwisnessis whiche he dide, shulen not be recordid; in þe trespassynge in which he trespasside, and in þe synne in which he synnede, in hem he shal dye. And ȝe seiden, Þe weie of þe Lord is not euen. Þerfor here ȝe, hous of Israel, wheþer my weye is not euen, and not more ȝoure weies ben shrewid? ”

“ For þe lengþe was of þe tresories of þe vtmer hous of fyfty cubitis, and þe lengþe byfore þe face of þe temple of an hundrid cubitis. And vndir þese tresories was an eentre fro þe eest, of men entrynge in to it, of þe vtmer hous, in þe breede of þe aley of þe hous, þat was aȝeinus þe eest waye, in to þe face of þe departid beeldyng. And byfore þe beeldyng weren tresories, and a waye bifore þe face of hem, after þe licknesse of tresories þat weren in þe waye of þe norþ ”

“ Þese þingis saiþ þe Lord God, Ȝit þe hous of Yrael in þis þing shuln fynde me, þat Y do to hem; Y shal multiplie hem as flockis of men, as an holy floc, as þe floc of Jerusalem in þe solempnitees þerof, so desert citees shuln be ful of flockis of men ”

“ Forsoþe oon hadde foure faces; o face þe face of cherub, and þe secounde face a face of man, and þe þridde face of a lioun, and in þe fourþe a face of an egle; and þe cherubyns ben lift vp. Þe ilk is þe beest, whom Y seeȝ besidis þe flood Cobar. And whanne cherubyns walkiden, and þe wheelis wenten togidir besidis hem; and whanne þe cherubyns liften vp her weengis, þat þei shulden be rerid fro þe erþe, þe wheelis abiden not, but and þei weren besidis hem. Hem stondynge, þei stoden, and wiþ þe lift vp þei weren lift vp; forsoþe þe spirit of lijf was in hem. ”