“ Þow shalt not mowe of oþer folk a man kyng make, þat be not þi broþer. And whanne he were ordeyned, he shal not multiplye to hym horses, ne lede aȝen puple into Egipt, bi noumbre of horsynge arered, namelich siþ þe Lord haþ comaundid to ȝow, þat no more bi þe same weie ȝe turnen aȝen. He shal not haue many wyues, þat mysdrawen þe soule of hym, ne of siluer ne of gold greet birþens. And after þat he sittiþ in þe dygnyte of his rewme, he shal discriue to hym a declaracioun of þis lawe in a volym, takynge a saumpler of þe preestis of Leuyte lynage ”

“ Ne þere is oþer nation so greet, þat haþ goddis neiȝynge to hem, as oure God is nyȝ to alle oure holi preiers. What is forsoþe oþer folk of kynde so noble, þat haþ ceremoyns, and ryȝtwis domys, and al þe lawe, þat I purpose to day before ȝoure eyen? Keep þerfor þi silf, and þi soule bisilich; ne forȝeet þow þe wordis þat þin eyen han seen, and ne falle þei out of þin herte, alle þe dayes of þi lijf. Þow shalt teche hem þi sones, and þi sone sones ”

“ And I haue comaundide to hem, seiynge, Here ȝe hem, and þat is riȝtwiȝe demeþ, wheþer he be cyteseyn, or pilgrime. Noon shal be distaunce of persones; so þe litil ȝe shulen here as þe more, ne ȝe shulen accept eny mannus persone, for þe dome of God it is. And if eny þing hard to ȝow were seen, telliþ to me, and I shal here. And I comaundide alle þingis þat ȝe shulden doo. And goon forþ fro Oreb, we passiden bi feerful deseert and moost wildernes, þat ȝe han seen, bi þe weye of þe hil of Amorrei, as þe Lord ȝoure God haþ comaundide to ȝow. ”

“ If a man gete a rebel sone, and a fraward, þat heriþ not þe fadres and modres heest, and clepid to obeyshe, dispise, þei shulen taak hym, and lede to þe aldre men of þe citee of hym, and to þe ȝate of doom; and þei shulen seye to hem, Þis oure sone is fraward, and rebel; oure heestis dispisiþ to here, to glotryes takiþ hede, and to leccherye, and to feestis. Þe puple of þe cytee shal þrow hym down wiþ stonus, and he shal dye, þat ȝe doon awei yuel fro þe myddil of ȝou, and al Israel hering wexe afeerd. ”

“ Lest perauenture þere be among ȝow man or womman, meyne or lynage, whos herte is turned a wey to day fro þe Lord ȝoure God, þat he goo, and serue to goddis of oþer gentils; and be among ȝow a rote burionynge gal and bitternes; and whanne he hadde herd þe wordis of þis ooþ, he blesse to hym in his herte, seiynge, Pees shal be to me, and Y shal go in þe shrewidnes of myn herte; and a dronken take þe þristi, and þe Lord forȝyue not to hym, but þanne moost þe woodnes of hym shal wax feers, and gelows aȝens þat man, and sitten vpon hym alle þe cursid þingis þat ben wryten in þis volym ”

“ Who is a man þat haþ spousid a wijf, and haþ not taak hir? goo he, and turn he aȝen into his hows, lest perauenture he dye in bateil, and anoþer man take hir. Þes þingis seid, þei shulen adde oþer þinges, and spek to þe puple, Who is a man dreedful, and wiþ feerd herte? goo he, and turn aȝen into his hows, lest he make to drede þe hertis of his briþeren, and as he by dreed is gast. And whanne þe duykis of þe oost ben stil, and þe eende of spekynge han doon, echon his companyes shal make redi to fiȝtynge. If eny tyme þow comest nyȝ to a citee to be ouercomen, first þow shalt offre to it pees. ”

“ Forsoþe if afterward she sittiþ not in þin inwit, þow shalt leeue hir free, ne selle þow mayst bi money, ne oppresse bi power, for þow hast mekid hir. If a man haue two wyues, oon loued, and anoþer odyows, and getiþ of hir free chyldren, and þe sone of þe odiows were first goten, and wold þe substaunce among his sones dyuyde, he shal not mowe þe sone of þe loued make first goten, and put before þe sone of þe odiows, but þe sone of þe odyows he shal knowe first goten, and he shal ȝyue to hym of þes þingis þat he haþ alle þingis dowble ”

“ Y sente þerfore messangeris fro þe wildernes of Cademoch to Seon, þe kyng of Esebon, bi pesible wordis, seiynge, We shulen passe bi þi loond, þe comoun weye we shulen goo; we shulen not goo aside, ne to þe ryȝt ne to þe left. Lyuelodis bi prijs sel to vs, þat we eeten; water for money ȝif, and so we shulen drynke. Oonlich is, þat þow graunte to vs passyng forþ, as þe sones of Esau diden, þat dwellen in Seyr, and Moabitis, þat dwellen in Ar, to þe tyme þat we comen to Jordan, and passe to þe loond þat þe Lord oure God is to ȝyuynge to vs. ”

“ If a man sleep wiþ þe wijf of anoþer, eyþer shal die, þat is, þe auowtreer and þe auowtresse; and þow shalt do awey yuel fro Yrael. If a womman mayden a man spowse, and eny man in þe cytee fynde hir, and lye wiþ hir, þow shalt lede eiþer to þe ȝate of þat cytee, and þei shulen be þrowun doun wiþ stonus ”

“ Capitulum I. Thes ben þe wordis þat Moises spak to al Yrael, biȝonde Jordan, in þe wijld feeldi wildernes, aȝens þe Reed See, bytwix Pharan and Tophel and Laban and Asseroþ, where is mych þing of gold, bi enleuen days fro Oreb bi þe wey of þe hil of Seyr, vnto Cades Barne. ”