“ A tooþ forsoþe if eny man smyte out to his seruaunt, or to his handmayden, liyk maner he shal leeue hem free. If an oxe wiþ þe horn smyte a man, or a womman, and þei weren deed, he shal be þrowun doun to deeþ wiþ stones, and his flesh shal not be etun, and þe lord shal be innocent of þe oxe. And if an oxe be an hornputter fro ȝisterday and þe þridde day hens, and þei han warned þe lord of hym, befor witnes, and þe lord haþ not holdun hym yn, and he slee a man, or womman, þe oxe shal be þrow doun to þe deeþ wiþ stones, and þe lord of it þei shulen slee ”

“ If eny man harme feeld, or vynȝeerd, and leeue his beeste, þat it waste oþer mennus þingis, what euer best þing he haþ in his feeld, or vynȝeerd, he shal restore for estymacioun of þe harm. If fyer goon out fynde eeres, and cacche þe rekes of corn, or þe corn stondynge in feeldis, he shal ȝeeld þe harm þat tyndeþ þe fier. If eny man leene money to a freend, or vessel into kepyng, and fro hym þat tok þei weren takun awey bi þeft, if þe þeef be foundun, he shal ȝeeld þe dowble. ”

“ Þei seiden, Þe God of Ebrews haþ clepid vs, þat we goon þe weie of þre dayes into wildernes, and sacrifye unto þe Lord oure God, lest perauenture falle to us pestilence, or swerd. Þe kyng of Egipte seiþ to hem, Whi, Moyses and Aaron, bisyen ȝe þe puple fro her werkis? Go ȝe to ȝoure charges. And Pharao seide, Mych is þe puple of þe loond; ȝe seyn þat þe folk vudur growiþ; myche more, if ȝe ȝyuen hem reste fro werkis. He comaundide þanne þat day to þe maystris of werkis, and to þe constreyners of þe puple, seiynge, No more ȝe shal ȝyue chaf to þe puple, þat tiles ben maad as before ”

“ Al þe gold þat was spendid in þe werk of þe seyntuarye, and þat was offerd in ȝiftis, was of twenti and nyne talentis, and of seuen hundrid and þretti siclis, at þe mesure of þe seyntuarie. Þere was forsoþe offerd of hem þat camen to þe noumbre, fro twenti ȝeer and aboue, of six hundrid þre þowsynd and of fyue hundrid and fifti men of aarmes. Þere weren forþermore an hundryd talentes of siluer, of þe which ben ȝotun þe footstakis of þe seyntuarye, and of þe entre, where þe veyle hongiþ; an hundred footstakis ben maad of an hundrid talentes, eche talentis countid bi eche footstakis. ”

“ If eny man of auysement sle his neiȝbour and by aspyes, fro myn auteer þow shalt pul hym, þat he be slayn. Who smytiþ his fader, or moder, wiþ deeþ dye he. Who cursiþ his fader, or moder, be he deed. Who steliþ a man, and selliþ hym, conuycte of þe trespas, wiþ deeþ dye he. If men chiden, and þat oon smyte his neiȝbour wiþ stoon, or wiþ fist, and he be not deed, but lye in þe bed, if he aryse and goo out vpon his staf, he shal be ynnocent þat smoot; so neuerþeles þat he restore þe bisy traueils of hym, and þe expensis into leches. ”

“ Þe sone forsoþe and þe douȝter if it smyte wiþ horn, to þe lijk sentence he shal vnderligge. If seruaunt and hondmayden it aseyl, þretti ownces of siluer he shal ȝyue to his lord; þe oxe forsoþe shal be þrowun down wiþ stoons. If eny man open a cystern, and delue, and not coueriþ it, and oxe or asse fal into it, þe lord of þe cistern shal ȝeeld þe prijs of þe beestis, and þat þat is deed shal be his. If an alyen oxe wounde an oxe of anoþer mannus, and he were deed, þe quyk oxe þei shulen selle, and þei shulen dyuyde þe prijs; þe careyn forsoþe of þe deed þei shulen depart bitwix hem. ”

“ Leeue my puple, þat it sacrifie to me; yf forsoþe þow wiþstonde, and wole not leeue it, loo! Y shal leede yn to morwe a locust into þi coostis, þat shal couer þe vttermost of þe erþe, þat eny þing of it shal not apeere, but be etun þat was lafte to þe hawle; forsoþe he shal gnawe alle trees þat buriounen in þe feeldes; and þei shulen fulfille þin howses, and of þi seruauntis, and of alle þe Egipcyens, how many han not seen þi fadris, ne her fadris, siþ þei weren born vpon erþe, vnto þe day þat is now. And he turnede hym a wey, and ȝede out fro Pharao. ”

“ But and þe auteers of hem destrye, brek togidere þe ymages, and þe mawmete woodes hew down; wole þow not anowre an alien God; þe Lord gelows þe name of hym, God is a louer; ne go þow not into couenaunt wiþ men of þat regioun, lest whanne þei han do fornycacioun wiþ her goddes, and anourden þe mawmetis of hem, eny man clepe þee, þat þow eete of þe þingis þat ben offerd. Ne wijf of þe dowȝtris of hem þow shalt tak to þi sones, lest after þat þei han do fornycacioun, þei maken to do fornycaciouns and þi sones into her goddis. ”

“ Lest, Y biseche, þe Egipciens seyn, fellich he haþ ladde hem out, þat he myȝte slee in þe hilles, and doon a wey fro þe erþe, reste þi wraþþe, and be peesyble vpon þe wickidnes of þi puple. Record of Abraham, Ysaac, and of Yrael, þi seruauntis, to whom þow hast sworn bi þi seluen, seiynge, Y shal multiplie ȝoure seed as þe sterres of heuene, and al þis loond of þe which Y haue spokun, Y shal ȝyue to ȝoure seed, and ȝe shulen welde it euermore. And þe Lord was plesid þat he dide not þe harme, þat he spake aȝens his puple. ”

“ And þei shulen take of his bloode, and leggen vpon eiþer post, and in þe þresshwoldes of þe howses, in þe whiche þei shulen eet it; and þei shulen eet flesh þat nyȝt, rostid wiþ fier, and þerf looues wiþ wylde letuse. Ȝe shulen not eten of it eny þing raw, ne soþun wiþ water, but oneli rostid wiþ fier; þe heed wiþ his feet and entrayls ȝe shulen vowre; ne þere shal not leeue of it eny þing to to morwen; and if eny þing be laft, wiþ fier ȝe shulen brenne it. So forsoþe ȝe shulen eten it; ȝe shulen girde about ȝoure reynes, and ȝe shulen haue shoon in ȝoure feet, holdynge staues in hoondis ”