“ Þes forsoþe among polutid þinges shulen be holde, of hem þat ben meued in erþe; a wesil, and a mouse, and a cokedril, eche after his kynde; þat is a beest of foure feete, hauynge þe neþer cheke lap vnmeuable, and meuynge þe ouere; a mygal, þat is a beeste born trecherows to bigile, and moost gloterous, a camelion, þat is a beeste varyed in to diuerse colours, after diuerse lokingis, and a stellioun, þat is a werme depeyntid as wiþ sterris, and a lacert, þat is a serpent þat is clepid a liserd, and a moldwerp. Alle þes ben vnclene; who toucheþ þe faln to deþ of hem, shal be vnclene vnto þe euen ”

“ Al þat to þe Lord is sacrid, wheþer it were man, or beeste, or feelde, it shal not be soold, ne may be aȝenbouȝt; what euer þing ones were sacrid, holi of halowes it shal be to þe Lord, and eche sacrid þing þat is offryd of man, shal not be bouȝt aȝen, but þurȝ deeþ die. Alle þe dymes of þe erþe, wheþer of þe cornes, or of þe apples of trees, ben of þe Lord, and to hym þei ben halowid; if eny man wole bigge aȝen his dymes, adde he þe fifþe part of hem ”

“ Eche vessel vpon which she sittiþ who so euer towchiþ, shal wasshe his cloþes, and he wasshid wiþ water shal be polut vnto þe euen. If man goþ togidere wiþ hir in þe tyme of hir blood flowynge bi moneþes, he shal be vnclene seuen daies, and al þe bed in which he slepiþ shal be polut. Þe woman þat suffriþ manye daies þe flux of blood, not in tyme of þe flux bi þe moneþ, oþer þat aftir þe flux of blood bi þe moneþ cesiþ not to flowe blood, as longe as she shal vnderligge to þis passioun she shal be vnclene, as it be in tyme of þe flux of blood bi þe moneþ. ”

“ Eche þat haþ a wemme, of þe seed of Aaron þe preest, he shal not goo to offre oostis to þe Lord, ne looues to his God; he shal neuerþelater eete looues þat ben offred in þe seyntuarye, so oonli þat wiþ ynne þe veyle he goo not, ne goo to þe auter, for a wemme he haþ, and he shal not defoule my seyntuarie; I a Lord þat halewe hem. Þanne Moyses spak to Aaron, and his sones, and to al Yrael, alle þat weren comaundid to hym. ”

“ Ȝe shulen teche þerfore þe sones of Yrael, þat þei shonnen vnclennes, and die not in her fluxes, whanne þei defoulen my tabernacle þat is among hem. Þis is þe lawe of hym þat suffreþ flux of seede, and þat is polutid þurȝ goynge togidris, and of hyr þat þurȝ moneþ tymes of flowing of blood is seuerd, and þat flowiþ ful oft blood, and of þe man þat slepiþ wiþ hir. ”

“ But if ȝe heren me not, ne doon alle myn heestis, and if ȝe spurne my lawes, and my domes despisen, þat ȝe doon hem þe whiche ben ordeyned of me, and my couenant ȝe fulli bryngen to nouȝt, I þanne þis þing shal do to ȝow; Y shal visyte ȝow swiftly in nedynes, and in brennynge, þat make fayl ȝoure eyen, and waste ȝoure lyues; in veyn ȝe shulen sowe ȝour seed, þat of þe enemyes shal be deuowryd; I shal putte my face aȝens ȝow, and ȝe shulen falle before ȝoure enemyes, and ȝe shulen be suget to hem þat hatiden ȝow; ȝe shulen flee, no man pursuynge. ”

“ Þat if he is a pore man, and his hoonde may not fynde þat ben seyde, he shal take for þe trespas a lombe to þe offryng, þat þe preest preye for hym, and þe tenþe part of tried flour spreynt wiþ oyle, into sacrifice, and a sextarie of oyle, and two turturs, and two culuer bryddis, of whom þe oon be for synne, and þe oþer into brent sacrifice ”

“ Þanne her holi dayes shulen pleese to þe erþe, alle þe daies of her wildirnes; whanne ȝe weren in enemyes loond, it shal halowe, and rest in þe seuenþe tymes of his wildernes, forþi þat it restide not in ȝoure seuenþe tymes, whanne ȝe dwelten in it. And whiche of ȝow leeuen, Y shal ȝyue drede in þe hertes of hem, in regiouns of þe enemyes; þe sown of a fleynge leef shal fere hem, and so þei shulen flee it as þe swerd; þei shulen falle, no man pursuynge, and eche vpon his briþeren shal falle togidere, as men fleynge batailes; no man of ȝow shal be hardi to wiþstoonde to enemyes ”

“ Y þe Lord ȝoure God, þat haþ seuerde ȝow fro oþer puples. And ȝe þanne seuer a clene beeste from vnclene, and clene bryd fro vnclene, lest ȝe poluten ȝoure soules in beestis, and in bryddis, and in alle þat mouen in erþe, and þat to ȝow Y haue shewid to be polut. Ȝe shulen be holi to me, for Y þe Lord am holy, and haue seuerd ȝow fro oþer puples, þat ȝe ben myne. A man or womman, in þe which is a spirit of wicchecraft, or of dyuynynge, wiþ deþ die þei, and wiþ stonus men shulen ouer-falle hem ”

“ And þow shalt noumbre to þee seuen wekes of ȝeerys, þat is, seuen siþes seuen, þe whiche togidere maken nyn and fourty ȝeer; and þow shalt sowne wiþ trompe þe seuenþe moneþ, þe tenþe day of þe moneþ, in þe tyme of doyng mercy, in al ȝoure loond. And þow shalt halowe þe fyftiþ ȝeer, and clepe it forȝifnesse to alle þe dwellers of þi loond; he is forsoþe þe iubilee; a man shal turne aȝen to his possessioun, and eche shal turne aȝen to his before hadde meyne, for þe iubilee it is, and þe fyfteþe ȝeer. ”