“ Jhesus answeringe seiþ, Treuli I seie to ȝou, þer is no man þat schal leeue hous, or breþeren, or sistris, or fadir, or modir, or sones, or feeldis for me and for þe gospel, þe which schal not taken an hundridfold so moche now in þis tyme, housis, and breþeren, and sistris, and modris, and sones, and feldis, wiþ persecuciouns, and in þe world to comynge euerlasting lyf. Forsoþ many schulen be, þe firste þe laste, and þe laste þe firste. Forsoþe þei weren in þe weye stiȝynge to Jerusalem; and Jhesus wente bifore hem, and þei wondriden, and folowinge dredden. ”

“ Forsoþe þere weren summe of þe scribis sittynge, and þenkynge in her hertis, What spekiþ he þus? He blasfemeþ; who may forȝeue synnes, no but God alone? Þe whiche þing anoon knowen by þe Holy Goost, for þei þouȝten so wiþ inne hem self, Jhesus seiþ to hem, What þenken ȝee þese þingis in ȝoure hertis? What is liȝtere for to seie to þe sike man in palasie, Synnes ben forȝouen to þee, or for to seie, Ryse, take þi bed, and walke? Soþely þat ȝee wite þat mannes sone haþ powere in erþe to forȝeue synnes, he seiþ to þe sike man in palasie, I seie to þee, ryse vp, take þi bed, and go in to þin hous. ”

“ And he sente him in to his hous, seyinge, Go in to þi hous; and if þou schalt go in to þe streete, seye to no man. And Jhesus entride yn and his disciplis in to þe castels of Sezarie of Philip. And in þe weye he axide his disciplis, seiynge to hem, Whom seyn men me for to be? Þe whiche answeriden to hym, seiynge, Summe, John Baptist; oþere seyn, Helye; but oþere seyn, as oon of þe prophetis. Þanne he seiþ to hem, But whom seye ȝe me for to be? Petre answeringe, seiþ to him, Þou ert Crist. And he þretenyde hem, þat þei schulden nat seie to ony man of him. ”

“ Forsoþe þer is no þing hid, þat shal not be maad opyn; neþer ony þing is preuy, þe whiche shal not come in to apert. If ony man haue eeris of heryng, heere he. And he seide to hem, Se ȝee what ȝee heeren. In what mesure ȝee meten, it shal be meten to ȝou, and be kast to ȝou. Soþely it shal be ȝouen to hym þat haþ, and it shal be taken awey from hym þat haþ not, also þat þat he haþ. And he seide, So þe kingdom of God is, as if a man caste seed in to þe erþe, and it slepe, and ryse vp in niȝt and day, and brynge forþ seed, and wexe faste, þe while he wote not. ”

“ Forsoþe þe disciplis weren stoneyed in his wordis. And Jhesus eftsoone answeringe seiþ to hem, Ȝe litle sones, how hard þing it is, men tristynge in richessis for to entre in to þe kyngdom of God. It is liȝter, or esyer, a camel for to passe þorw a nedlis yȝe, þan a riche man for to entre in to þe kyngdom of God. Whiche wondriden more, seyinge at hem selue, And who may be maad saf? And Jhesus biholdinge hem, seiþ to hem, Anentis men it is impossible, but not anemptis God; for alle þingis ben possible anemptis God. And aftirward Petre bigan for to seye to him, Loo! ”

“ Capitulum IX. And he seide to hem, Treuly I seie to ȝou, for þer ben summe of men stondinge here, þe whiche schulen not taste deeþ, til þei sen þe rewme of God comynge in vertu. And aftir sixe dayes Jhesus took Petre, and James, and John, and lediþ hem by hem selue aloone in to an hiȝ hil; and he is transfigurid byfore hem. And his cloþis ben maad schynynge and white ful moche as snow, and which maner cloþis a fullere, or walkere of cloþ, may not make white on erþe. And Helye wiþ Moyses apperide to hem, and þei weren spekynge wiþ Jhesu. ”

“ And disciplis of Joon and þe Pharisees weren fastynge; and þei camen, and seien to hym, Whi disciplis of Joon and of Pharisees fasten, but þi disciplis fasten nat? And Jhesus seiþ to hem, Wheþer þe sonnys of weddyngis mown faste, as long as þe spouse is wiþ hem? Hou longe tyme þei han þe spouse wiþ hem, þei mowe nat faste. Forsoþe dayes shulen come, whenne þe spouse shal be taken awey from hem, and þanne þei shulen faste in þoo days. No man seweþ a pacche of rude, or newe, cloþe to an old cloþe, ellis he takiþ awey þe newe supplement, or pacche, and a more brekynge is maad. ”

“ But go ȝe, seye ȝe to his disciplis, and to Petre, for he schal go byfore ȝou in to Galilee; þere ȝe schulen se him, as he seide to ȝou. And þei goynge out fledden fro þe sepulcre; forsoþe drede and quakynge hadde assaylid hem, or gon in to hem, and to no man þei seiden ony þing, forsoþ þei dredden. Soþly Jhesus, rysinge erly in þe first day of þe wouke, apperide firste to Mary Mawdeleyn, of whom he hadde cast out seuene deuelis. She goynge tolde to hem þat weren wiþ him, hem weylinge and wepynge. And þei heeringe þat he lyuede, and was seyn of hir, bileueden not. ”

“ And þe title of his cause was writun, Jhesus of Nazareþ, kyng of Jewis. And þei crucifien wiþ him twey þeues, oon at þe riȝþalf, and oon at his lefþalf. And þe prophecie is fulfild þat seiþ, And he is gesside, or ordeyned, wiþ wickide men. And passinge forþ þei blasfemyden him, mouynge her heedis, and seyinge, Fyȝ! þou þat distroyest þe temple of God, and in þre dayes aȝen bildest it; þou comynge down fro þe cros, make þi self saf. Also and þe hiȝeste prestes scornynge him, ech to oþer, wiþ scribis, seiden, Crist, kyng of Yrael, maade oþere men saf, he maye not saue him silue. ”

“ I haue bifore seid to ȝou alle þingis. But in þo dayes, aftir þat tribulacioun, þe sunne schal be maad derk, and þe mone schal not ȝyue hir schynyng, and sterris of heuenes schal be fallinge doun, and vertues þat be in heuenes, schulen be mouyd. And þanne þei schulen se mannis sone comynge in cloudis of heuene, wiþ greet vertu and glorie. And þanne he schal sende his aungels, and schal gedre his chosene fro foure wyndis, fro þe loweste þing of erþe vnto þe hiȝeste þing of heuene. Forsoþe of þe fyge tree lerne ȝe þe parable. ”

“ I haue baptisid ȝou in water; forsoþe he shal baptise ȝou in þe Holy Goost. And it is don in þoo dayes, Jhesus came fro Nazareþ of Galilee, and was baptisid of Joon in Jordan. And anoon he styinge vp of þe water, sayȝ heuenes openyd, and þe Holy Goost cummynge doun as a culuere, and dwellynge in hym. And a voys is maad fro heuenes, Þou art my sone loued, in þee I haue plesid. And anon þe Spirit puttide hym in to desert. And he was in desert fourty dayes and fourty niȝtis, and was temptid of Saþanas, and was wiþ beestis, and angelis mynystriden to hym. ”

“ And if ony man schal seie ony þing to ȝou, seie ȝe, þat he is nedeful to þe Lord, and anon he schal leeue him hidur. And þei goynge forþ, founden a colt bounden byfore þe ȝate wiþ outeforþ, in þe meeting of tweye weyes; and þei vnbounden him. And summe of men stondinge þere seiden to hem, What don ȝe, vnbyndinge þe colt? And þei seiden to hem, as Jhesus comaundide to hem; and þei leften hem. And þei brouȝten þe colt to Jhesu, and þei puttiden to him her cloþis, and Jhesus sat vpon him. ”

“ Forsoþ Jhesus holdynge his hond, lifte vp him; and he roos. And whanne he hadde entrid in to an hous, his disciplis axiden him priuely, Whi myȝten not we caste hym out? And he seyde to hem, Þis kynde in no þing may go out, no but in preier and fastinge. And þei gon fro þennis, wenten forþ in to Galile; and he wolde no man wite. He tauȝte his disciplis, and seide to hem, For mannus sone schal be bitrayed in to þe hondis of men, and þei schulen sle him, and he slayn, on þe þridde day schal rise aȝen. And þei knewen not þe word, and dredden for to axe him. And þei camen to Cafarnaum. ”

“ Forsoþe þe ilke Eroude sente, and held Joon, and bond him in to prisoun, for Erodias, þe wyf of Philip, his broþer; for he hadde weddid hir. Soþly Johne seide to Eroude, It is not leefful to þee, for to haue þe wyf of þi broþer. ”

“ And he bigan for to teche hem, for it bihoueþ mannis sone suffre manye þingis, and to be reproued of þe hiȝeste prestis, and of eldere men, and scribis, and to be slayn, and aftir þre dayes, for to rise aȝen. And he spak playnli þe word. And Petre takynge him, bygan for to blame him. ”