“ At þe last endid þe fyue bokis of Moises, as of greet boond delyuered, to Josue, þe sone of Naue, we putten hoond, whom Ebrews clepen Josue Ben Nun, þat is, Josue, þe sone of Nun; and to þe book of Jugis, whom þei clepen Sophyn; and to Ruþ, and to Hester, þe whiche wiþ þe same names þei tellen out. And we moneishen þe reder, þat þe wode of Ebrew names, and distyncciouns bi membris dyuydid þe bisy wryter keep wel, lest and oure traueyl and þe studie of hym peryshe ”

“ Ferþermore after þe deeþ of þe holi womman Paule, whos lijf is saumple of vertue, and þes bokis, þe whiche to þe mayden of Crist, Eustochie, Y myȝte not denye, we han demed, while þe spiryt shal gouern þes lymes, to sitten to þe explanacioun of þe prophetis, and to turnen aȝen to þe now long laft werk, as bi a maner turnynge aȝen after outlawynge; nameli siþ Pawmachie, an hooli man and merueilows, þis same þing askiþ bi lettres, and we, hiynge to þe contre, owen to ouerpasse wiþ a deef eer þe deþ berynge songis of mermynns. ”