“ I come soone, and my mede wiþ me, for to ȝelde to ech man aftir his werkes. I am alpha and oo, þe firste and þe laste, bigynnyng and ende. Blessid þei, þat waschen her stooles in þe blood of þe lomb, þat þe power of hem be in þe book of lijf, bi ȝatis entre in to þe citee. Forsoþe wiþ oute forþ, houndes, and venym doers, or poyseners, and unchaast men, and manquellers, and seruynge to ydoles, and ech þat loueþ and doiþ lesyng. I Jhesus sente myn aungel, for to witnesse to ȝou þes þinges in chirchis. ”

“ Forsoþe caste out þe porche, þat is wiþ out forþe þe temple, and mete it not; for it is ȝouun to heþen men, and þei shulen defoule þe holy citee bi fourty moneþis and two. And I shal ȝiue to my two witnesses, and þei shulen prophecie a þousynd dayes two hundrid and sixty, þei cloþid wiþ sackis. Þes ben two olyues, and two candelstickes, ȝeuynge liȝt, þei stondinge in þe siȝt of þe Lord of erþe. And if ony man shal wolen for to anoiȝe hem, fijr shal go out of þe mouþ of hem, and shal deuoure her enemyes. ”

“ I counseile þee, for to bye of me gold fijrid, and proued, þat þou be maad riche, and be cloþid wiþ whijt cloþis, þat þe confusioun of þi nakidnesse appere not; and anoynte þin iȝen wiþ a colirie, þat is, medicynal for iȝen, maad of diuerse erbis, þat þou se. I whom I loue, reproue, and chastise; þerfore sue, or loue, and do penaunce. Lo! I stonde at þe dore, and knocke; if ony man shal here my voys, and opene þe ȝat, I shal entre to hym, and soupe wiþ hym, and he wiþ me. ”

“ Lo! I come, as a niȝt þeef. Blessid he þat wakiþ, and kepiþ his cloþes, þat he wandre not nakid, and þei seen his filþhed. And he gederide hem in to a place, þat is clepid in Ebru Hermagedon. And þe seuenþe aungel shedde out his viole in to þe eyr, and a greet voys wente out of heuen fro þe trone, seiynge, It is don. And leytinges ben maad, and voyces, and þundres; and greet erþe mouyng is maad, which manere neuere was, siþ men weren vpon erþe, sich erþe mouyng so greet. And þe greet citee is brokun in to þre parties, and þe citees of heþene men fellen doun ”

“ And ech crafty man, and ech craft, shal not be foundun in it. And þe voys of mylne stoon shal no more be herd in þee, and þe liȝt of lanterne shal no more shijne to þee, and þe voys of þe husbonde and of wijf shal not ȝit more be herd in þee; for þi marchauntes weren princes of erþe. For in þi venemous dedis alle folkes erreden. And þe blood of prophetis and seyntis is founden in it, and of alle men þat ben slayn in erþe.
Capitulum XIX. Aftir þes þinges I herde as a greet voys of many trumpis in heuen, seiynge, Alleluya; heriynge, and glory, and vertu is to oure God ”

“ Forsoþe to proude men, and vnbileueful, and cursid, and manquellers, and fornicatours, and to men doynge venym, or sleynge men by venym, and worschipers of ydolis, and to alle liȝeris, þe paart of hem shal be in þe pool brennynge wiþ fijr and brunston, þat is þe secounde deeþ. ”