“ Certeyne, if þow ert of hard bileue, rede Greke bokis and Latyns, and ley togidre wiþ þes litil werkis, þe whiche aboue we han out toold; and where euere þow see bitwix hemself to discorde, ask eny of þe Ebrews, to whom more þou owist to ȝeue feiþ, and if oure þingis he stable, I trowe þat þou shalt not eyme hym a lyer, for in þe same place wiþ me lijk maner he dyuyne. ”

“ Wherfore and fyue bokis, Samuel, Malachym, Dabreiamyn, Esdras, Jeremye wiþ Cynoþ, þat is, his Lamentaciouns, ben eymyd of sum men dowble bookis. What maner wise þerfor two and twenti elymentis ben, bi þe whiche we wryten Ebrewly al þat we speken, and mannus voyce wiþ þe bigynnyngis of hem is takun, so two and twenti volyms ben noumbrid, bi þe whiche as bi lettris and bigynnyngis þe tendre and þe ȝit sowkynge childhod of þe riȝtwise man is tauȝt in þe doctrine of God. ”