“ Nous, prélatz et personnes du clergé, nobles et députez des villes du pays et comté d’Arthois, représentans les trois membres et estatz d’iceluy ; Députez des estatz du pays et comté de Haynnault ; Députez de la ville de Douay, A tous ceulx qui ces présentes voiront ou oiront, salut. ”

“ Dont encores ne sont asseurez, comme ils disent, imposans que, prestement l’évinction de l’ennemy, les catholiques leur couperont la gorge, qui au contraire se doibvent tenir pour asseurez du mesme inconvénient, puisqu’ils voient qu’on a composé une armée et remly tous les pays de gens de guerre estrangers de pareille condition : estant chose par trop clère et manifeste que jamais ne cesseront qu’ilz ne parviennent à leur but ”

“ Soubz la confidence et protection de laquelle, et pour nous acquitter vers Dieu et les hommes de nostre devoir si avant que humainement est possible, ne voulans en riens conniver ou participer au mal d’aultruy ny encourir la note de perfidie et aultres indictes par ladicte union, avons trouvé convenir d’en faire protestation et démonstration publicque, et de nouveau, entre nous et tous aultres qui se vouldront descharger de leur serment et obligation, rafreschir, renouveller et plus estroictement confirmer ladicte union. ”