Jacques Du Hamel

“ Car abordé qu’il fust apres vn naufrage tresgrãd au milieu de son voyage, & apres la perte d’vne bataille naualle, ou plustost d’vne surprise que firent les Sauuages de ce pays, conduits a leur Roy Castio, & assistez d’vn ieune Seigneur Frãçois nõmé Pistion, qui auoit depuis peu occupé la place des amours de Fortunie vacante de long tẽs, cuidant auoir gagné vn Royaume nouueau, il perdit le sien, esperãt donner la liberté à vne qui ne la vouloit plus receuoir de sa main, il se mist en seruage, & pẽsant oster la vie à sõ ennemy, il se dõna la mort par sa creance. ”

“ La partie fust facile à remettre de la part de Fortunie, plus facheuse de celle d’Acoubar, toutefois agreable, puis que le salut de tant de mõde, le r’apeloit de la ioüissance de si peu de plaisirs. Les soldats qui auparauant trembloyent de peur furẽt tellement r’asseurez voyãs leur Roy en vie qu’ils n’aspirẽt plus qu’a le suyure quelque part qu’il s’achemine. Ceste cõmune allegresse en causa vne plus grande, car chacun fust d’auis de s’exercer en quelque honneste exercice & de luiter doresnauãt pour l’hõneur, eux qui auoyẽt n’aguere si bien cõbatu pour la victoire. ”