“ Þanne Jeroboam came and al þe puple þe þidde day to Roboam, as he hadde comaundide to hem. And þe kyng answerde hard þingus, þe counseil laft of þe eldre, spokyn aftir þe will of ȝong men; My fadir putte an heuy ȝok to ȝou, and I schal maken heuyar; my fadir beet ȝou wiþ scourgis, I forsoþe schal beeten ȝou wiþ scorpiouns. And he assentide not to þe preyers of þe puple; forsoþe þe wille of God was, þat his word schuld ben fulfild, þat he hadde spoken by þe hond of Achie Sylonyte to Jeroboam, þe sone of Nabaþ. ”

“ Þere came forsoþe to hym a man of God, and seiþ, O! kyng, go not out wiþ þee þe hoost of Irael; forsoþe þe Lord is not wiþ Irael and wiþ alle þe sonus of Effraym; þat ȝif þou weenist in strengþe of hoost batails to stonden, þe Lord schal maken þee to ben ouercommen of enmyes; of God forsoþe is to helpen, and in to fliȝt to turnen. And Amazias seide to þe man of God, What þanne schal be done of þe hundriþ talentis, þat I ȝaf to þe knyȝtis of Irael? And þe man of God answerde, Þe Lord haþ, wherof he may ȝeue to þee many mo þanne þese. ”

“ Þe hous forsoþe, þat I coueite to bilden up, is greet; forsoþe þe Lord oure God is grete vpon alle goddis. Who þan schal mowen ben myȝty, þat he bilde up to hym an worþi hous? Ȝif forsoþe heuen and heuens of heuens mown not taken hym, how myche am I, þat I may to hym bilden up an hous, bot to þes þingis al oonly, þat encense be brent beforn hym? Sende þann to me an tauȝt man, þat kann wirchen in gold, and siluer, brasse, and yren, purpur, cocco, and iacynte ”

“ To whome Hieu, þe sone of Ananye, sear, aȝein came, and seiþ to hym, To þe vnpiteuous man þou ȝeuist helpe, and to hem þat haten þe Lord by frenschip þou ert ioyned; and þerfore þe wraþ forsoþe of þe Lord þou haddist deserued; bot good werkis ben founden in þee, for þi þat þou toke awey þe mawmete wodis fro þe lond of Juda, and haddist maad redy þin hert, þat þou seche aȝein þe Lord God of þi fadirs. Þan Josaphaþ dwellide in Jerusalem; and eft he wente out to þe puple fro Bersabee vnto þe hill of Effraym, and he clepide hem aȝein to þe Lord God of þeir fadirs. ”

“ Now þann ȝe sayn, þat ȝe schul mown wiþstonde to þe rewme of þe Lord, þat he weldiþ by þe sonis of Dauid; and ȝe han a gret multitude of puple, and golden calues, þe whiche Jeroboam haþ made to ȝou in to goddis. And ȝe han þrowen awei þe prestis of þe Lord, þe sonys of Aaron, and Leuytis, and han maad to ȝou prestes, as alle þe puplis of londis; whosoeuer commiþ and sacriþ his hond in bool, in oxen and in seuen weþers, anoon he is maad þe preste of hem þat ben not goddis. Our forsoþe Lord is God, whom we han not forsaken ”

“ Nowe þanne see, sonus of Amon and of Moab and þe hil of Seyr, by whome þou grauntidist not to þe sonus of Irael þat þei schulden passe, whann þey wenten out fro Egipt, bot þei boweden aside fro hem, and þei slowen hem not, aȝeinward þei don, and enforsen to kasten us out fro þe possessyoun, þat þou, oure God, hast taken to us; þanne schalt þou not demen hem? In us forsoþe is not so myche strengþe, þat we mown to þis multitude wiþ stonden, þat falliþ vpon us; bot whanne we vnknowen what we owen to don, þat oonly we han of residue, þat oure eeȝen we dressen up to þee. ”

“ Þe Lord þi God be blessid, þe whiche wolde ordeynen þee vpon his trone kyng of þe puple of þe Lord þi God; forsoþe for God loueþ Yrael, and wille sauyn it in to wiþ outen eend, þerfor he putte þee kyng vpon it, þat þou do domes and riȝtwisnesse. Forsoþe sche ȝaue to þe kyng an hundriþ and twenty talentis of gold, and many swote spices ful myche, and most precyous gemmes; and þer weren not siche swote spices, as þes þat qween Saba ȝaue to kyng Salamon. Bot and þe seruauntis of Yram wiþ þe seruauntis of Salamon brouȝten gold fro Oofer, and tyne trees, and gemmes most precious ”

“ Aza forsoþe hadde in his enuyrown of bereris scheeldis and speris of Juda þre hundriþ þousand, of Beniamyn forsoþe of scheld berers and archers two hundriþ and seuenty þousand; alle þes most stronge men. Forsoþe aȝeinus hem went out Zara Eþiope wiþ his hoost tenn hundriþ þousand, and wiþ chaaris þre hundriþ, and he came vnto Mazara. Forsoþe Aza wente to mete wiþ hym, and maad a scheltrun to bataile in þe valei of Sophata, þat is beside Mazera. And he inwardly clepide þe Lord God, and seiþ, Lord, þer is not anentis þee eny distaunce, wheþer in fewe þou helpist, or in many ”

“ Al forsoþe Juda stood before þe Lord, wiþ litil childre and wijues and þeir free childre. Forsoþe þere was Yaziel, þe sone of Sacharie, sone of Ananye, sone of Hieyel, sone of Machanye, Leuyte, and of þe sonus of Asaph, vpon whome is maad þe Spirit of þe Lord in mydil of þe puple, and seiþ, Takiþ heede, al Juda, and þat dwellen in Jerusalem, and þou, kyng Josaphaþ, þes þingus seiþ þe Lord to ȝou, Williþ not dreeden þis multitude, ne taken ferd, it is not forsoþe ȝour fiȝt, bot of God. ”

“ Oure fadirs synneden, and diden euyl in þe siȝte of þe Lord oure God, forsakyng hym; þei turneden awei þeir faces fro þe tabernacle of þe Lord oure God, and ȝeuen bac. Þei closeden þe dores þat weren in þe ȝate hous, and quencheden þe lanterns; and encense þei brenneden not, and brent sacrifices þei offreden not in þe seyntuarye of God of Irael. ”

“ And he sette princis of fiȝters in þe hoost; and he togider clepide alle in þe strete of þe ȝate of þe citee, and he spac to þe herte of hem, seyinge, Doþ manly, and takiþ coumfort; williþ not taken ferd, ne dreeden þe kyng of Assiries, and al þe multitude þat is wiþ hym; forsoþe many mo ben wiþ us þanne wiþ hym. Wiþ hym is þe fleschely arm; wiþ us þe Lord oure God, þe which is oure help and fiȝter for us. And þe puple is comfortide wiþ siche maner wordis of Ezechie, kyng of Juda. Þe whiche þingus after þat ben don, Senacherub, þe king of Assiries, sente his seruauntis vnto Jerusalem ”

“ Of þe berynge staues forsoþe, wiþ þe whiche þe ark was born, for a litil wiȝt lengere þei weren, þe heuedis weren opene beforn Goddis answerynge place; ȝif forsoþe eny a litil wiȝt were wiþ out forþ, hem he myȝte not seen. And so þe arke was þere vnto þe present day; and noon oþer þing was in þe ark, bot þe two tablis þat Moyses hadde putte in Oreb, whanne he ȝaue þe lawe to þe sonis of Yrael goyng out fro Egipt. ”

“ Kyng forsoþe Salamon ȝaue to þe qween of Saba alle þingus þat sche wolde, and þat sche asked, many mo þan sche brouȝte to hym. Þe whiche turnede aȝein wente into hyre lond wiþ hyre seruauntis. Forsoþe þe weiȝt of gold, þat was offerd to Salamon by ech ȝeer, was sixe hundriþ and sixe and sixty talentis of gold, outaken þat soum þat legatis of dyuerse gentylis, and merchauntis weren wont to bryngen to, and alle þe kyngis of Arabie, and satrapis of londis, þat brouȝten gold and syluer to Salamon. ”