François Béroalde de Verville

“ Tant de sages qui estudient aux auantures attribuent tels effects à d’autres causes, comme au retranchement des dix jours, depuis quoy on n’a fait vendanges que par rencontre de saison, aux pullulations d’heresies, depuis lesquelles les bosses n’ont peu estre plattes, aux reuoltes des grands qui sont occasion que fillettes ont hanté les cloistres, & les menagers les tauernes, aux haussements des tailles, durant quoy les vieilles gens ne font que rechigner, & infinitez autres sotises, dont ie ne suis point controlleur, dautant qu’il ne m’appartient pas d’entreprendre sur vous. ”

“ Parquoy nous fusmes tous resolus de nous trouuer chez le bon homme nostre pere spirituel, parce qu’il auoit esté ordonné & iugé en dernier ressort de serrure, d’horloge, de cranequin, de rouet, de routissoir, d’arbaleste, & que les deffaillans seroient mis à la nois, à la noisette, au noyau, & à l’amende. A cet esclat de mandement ie ne faillismes à nous trouuer, aussi auions nous promis de nous bien chercher pour cet effect ”

“ Car est il, que ce fut au temps, au siecle, en l’indiction, en l’Aere, en l’Hegire, en l’hebdomade, au lustre, en l’Olimpiade, en l’an, au terme, au mois, en la sepmaine, au iour, à l’heure, à la minute, & iustement à l’instant, que par l’auis & progrez du Daimon des spheres les esteufs descheurent de credit, & qu’au lieu d’eux furent auancees les molles balles, au preiudice de la noble antiquité, qui se jouoit si joliment. Confuz soient ces inuenteurs de nouueautez, qui gastent la jeunesse, & contre les bonnes coustumes troublent nos jeux. ”