Jean Passerat

“ Quel heur pourroit plus grand estre donné des Cieus ?
N’ont pas donc les Troïens iuste cause de ioie ?
Voïant l’illustre sang de l’autre ancienne Troïe,
Leur Prince Naturel ? de celui descendu
Qui durant dix hyuers sa ville à deffendu
Encontre mille naufs, que le plusgrand Atride,
Grosses de soldats Grecs, auoit conduit d’Aulide.
O tems fort desiré, iamais ne viendras tu,
Et son âge croissant, & croissant sa vertu,
Que d’Hector son aïeul ensuiuant la vaillance,
Dans le sang ennemi voïons tremper sa lance,
Au plus espais d’un camp qui l’aura outragé ? ”

“ Tu seras nôtre Hector, nous serons tes Troïens,
Tes treshumbles suiets, tes loïaus citoïens,
Et tes vassaus issus de la gent Priamide
Or tout ainsi qu’on voit ferme la Pyramide.
Sans iamais s’esbranler, nous aurons enuers toi
Vn cueur ferme & constant, digne d’vn si bon Roi.
Vers Latins pour la Pyramide.
Non hæc Niliaco moles insana labore
Pyramis extructa est, quæ vertice sidera tangat. ”

“ Quelque fois le voïant, Sire, qu’il vous souuienne
Que son Cœur est tout rond & tel sera trouué.
Mais Muse que fais tu ? veus tu conter l’arene
Que le vent fait voler es chams blons de Cyrene ?
Les Troïens à leur Roi ont porté tout l’honneur
Que lon peut inuenter pour faire à son Seigneur.
Oncques ce Scipion, d’Afrique la tempeste,
Pour le iuste loïer de si grande conqueste,
Du peuple Martien ne fut tant honoré,
Trainé de cheuaus blancs dedans vn char doré.
Bien qu’il eust renuersé & Numance & Carthage,
Et le tiltre acquesté qu’il auoit d’heritage. ”