Gaston III de Foix-Béarn

“ Les peuples voient, admirent, quand quelqu’un leur raconte la vérité, et ils ne croient pas. Un si grand nombre se sont laissés tellement envahir par la passion qu’ils n’ont aucune convenable connaissance ni de vous ni d’eux-mêmes. ”

“ Celluy qui plus est hardi de touz me court sus, cest vainne gloire qui non seulement en mauvaises euvres tache les gens ainçois es bonnes, sil ne si garde, le fait cheoir, vaine gloire en semblant de faire bien fait eslever en orgueil et orgueil par son mortel conseil oste la vertu davoir la cognoissance de l’amour de nostre seigneur. Car supposé que leuvre que on fait soit bonne, par la vaine gloire que on en a, n’est pas plaisant a nostre seigneur, et que puest estre donc plus mauvaise que soy enorgueillir de faire bonne euvre. ”

“ Ô glorieux Sires, comme tu es veritable, ô ma doulce vie mon Dieu ie te prie pour toy mesmes quil te plaize que tu me faces en toy estre, et sire mon Dieu ne me veuilles retarder de donner pour ce que tu menseignes de demander, car tu promes à chacun, maiz cilz na riens qui bien ne sert. Ceulz qui sesloignent de toy periront, mais ceulz qui ont espérance en toy ne seront pas confondus, ceulz qui te creignent ont en toy espérance et tu leur aides, et es leur protecteur, et par cremir vient-on en amour, comme Seigneur on te doit craindre, et comme piteux père, amer. ”

“ Que donc de ton bien donne à soy meismes fait gloire il est ton robeur et semblant au dyable qui veult ambler ta gloire que du don que tu li donnes veult estre loe et en celluy ne quiert ta gloire, maiz la sienne est tout descognoissant car de ton don ne te rent graces, maiz, tu Sire, le mien formateur du ventre de ma mère, ne laisses moy du tout cheoir. À toy Sire soit gloire duquel tout bien vient et à moy confusion de visaige et de misere du quel vient tout mal se tu ne veulz avoir mercy. Mercy certes as de moy et de tout quant que tu as fait. ”

“ Vérité est sires, que en toutes guises sont très grans et très horribles mes péchiez, maiz trop es plus grant ta misericorde. Diex omnipotent et misericors ie say que tu es souverain esperit et ta vie est vivant, et si scay sires que par ta grant misericorde ie soy ta créature. Mercy sire donc te plaise de moy avoir mercy sires selon ta grant misericorde, plaise toy sires doulx sires de moy ressusciter de mort à vie. ”

“ Moulz est donc merveilleusement male chose pechiez car on en pert corps et arme et toute bonne renommee, car puis que on a perdu la grace de Dieu les fais de lomme ne peuvent riens valoir. Pechiez ie vous puis bien comparer a la morsure d’un chien enragie car la morsure est petite maiz le venim est très grant, car premièrement il emfle, puis après il rent grant douleur et puis vient en fievre et en pert le mangier et le boire, puis vient en frenaisie et en descognoissance de toutes choses et en la fin sensuit la mors. ”

“ Le mien Dieu don de mon salut et mon recepteur ie maleureux tay courroucie et ouvré mal devant toy, et toy promeu a fureur et ay bien deservy ta grant yre, ie ay pechié et tu las souffert, se ie me repens tu me pardonnes, se ie me retourne vers toy tu me recoifz, et se ie demeure en mon pechié encore tu matens. Vecy donc doulx sires mon vray salut, ie ne say que ie te die, ne ie ne say que ie te responde, ne ie ne scay ou ie me pourray mucier car tu as puissance sur tout et mas montré les voyes de bien vivre, donné mas chemin de errer et mas menascié denfer et promise la gloire de paradis. ”

“ Toutes les saintes vierges, et les veuves qui sont en la grace de Dieu empetres a moy pecheur don de pardurable grace, continence de vie, netteté de corps, innocence de cuer, fermeté de foy, charité fraternele ; supplies pour moy touz les sains et toutes les sainctes qui avez pleu à notre Seigneur du commencement du siècle, ordenez moy a acomplir la voulenté de Dieu en bonnes euvres afin que ie vive senz pechié et que ie puisse parvenir à la gloire de paradis. ”

“ La grandesce de mes pechiez te constraint elle a ce que tu ne veulz, et te deffent a ce que tu puez comme tu soyes Dieu omnipotent. Loing soit de toy mon Dieu et mon Seigneur que plus de puissance aigt ma nequisse confessant et doulant que la sentence de toy omnipotent remembre toy droiturier et benigne Dieu que tu es misericors créateur et mon recréateur ; ne te recordes bon Seigneur de ta droiture contre ton pècheur, maiz soyes remembrant de ta benignité envers ta créature. Ne soyes remembrant de yre contre le coulpable, maiz soyes recordant de tes miserations vers le tresmiserable. ”

“ Car tu n’es souffreteux de nul bien, car tu meismes es bien, et par toy est bon ce que bon est, et meilleur tu ne puez estre. À toy mon vray créateur et très miséricors sires tes commandemens ay desprisiez et très orgueilleusement me suis porté, véritablement fermeté ay perdue, et voye de perdition et de mort encourue. ”

“ Il ne fault riens à ceulx qui te aiement, car tes oyelx sont sur eulx et tes oreilles à leurs prières. Ma miséricorde et mon refuge, mon suscepteur et mon libérateur ainsi que donne sil te plaist ta tremeur qui dedans moy metes tamour, et ainsi met en moy tamour et ta tremour que en moy croisse le tien désirer, et ainsi me faces être participant de ceulx qui te creignent et gardent tes commandemens que par timour de servitude ie merisse avenir a grace damour, par laquelle finablement ie vieigne a ta gloire. ”

“ Mon Dieu ma doulce misericorde, ie te pry qu’il te plaize à moy donner à faire les euvres de misericorde, et estude de pitié, compassion es traveillies, aide es souffreteux, secourir es melchiefs, a conseillier les errans, consoler les tristes, relever les oppreins, recréer les povres, nourrir les feibles, pardonner ceulx qui mont fait mal, ceulx qui me heent amer. Rendre bien pour mal et nul ne desprisier, maiz tous honnourer, les bons ressembler, les mauvais eschiver, vertuz embracier, vices hors geter ”

“ Se livres on escript de toy, on ne puet raconter ta grandeur, car tu es inexplicable grant certainnement ; es senz quantité, senz mesure ; tu es bon senz qualité, et nul fors toy seul nest bon ; du quel la voulente est euvre, du quel le vouloir est povoir, car toutes choses as faites par ta seule voulente. Tu gouvernes toutes choses senz travail et senz annuy, tu es par tout et si nas point de lieu. Tu puez faire toutes choses fors que mal, par la bonté du quel sommes faiz, et par la justice du quel plourons les pechiez et par la clemence sommes delivré de ceulz. ”

“ Car quand il cuide essaucier par le bien qu’il fait, il tombe bas par l’orgueil et par la gloire qu’il a. Orgueil certes et vaine gloire naturellement gisent au plus parfont denfer et humilité tousiours habite es cieulx. Je confesse donc, très benigne dieu, pour ce dessus dit, estre abatu et près de la mort mené, et en larme navre et ce ainsi est que ta souverainne misericorde et pitié ne me vueille secourre, ie seray dampné. ”

“ Vray Dieu donne donc toi à moy sil te plaist, rent moy à toy car cest ce que iayme, car à toy seul vray Dieu suy ie tenuz et en ta doulce memoire me délite. Veez cy sires que quant marme pense et souspire à toy et considère ta inexplicable pitié, le visaige de la char li fait granz perturbations et cogitations. Plaize toy sires que le mien cuer arde et se délite, ma pensée et tout mon entendement et tout lesperit par le désirer de ta vision soit enflammée, preigne mon esperit eles comme un aigle et vieigne jusques à la biaultté de ta maison et au treusire de ta gloire. ”

“ Iay ouy Sire et sentu ta misericorde que tu ne veulz ma perdicion par quoy ie te pri que tu ne permetes a avoir seigneurie ce que tu ne fis a ta creature la quele tu fis. Se tu ne veulz de ma perdition qui deffents a toy qui puez tout, de mettre moy a salvation ? Se tu veulz tu me puez sauver, et se ie vueil par moy sanz toy ie ne puis, la voulente est en moy maiz leccomplir ie ne puis trouver ne la voulente ie ne puis avoir se tu ne le fais, et ce que ie vueil et puis ie ne cognais se tu ne le menseignes car en ta voulente sont toutes choses, ne nulz nest qui puisse le contraire faire en moy. ”

“ Sire Dieu ie offre a toy les lermes de ma orphanete, avec moy seront les lermes de jour et de nuyt, ie seray peu de mes plours et marme sera abevree de mes douleurs, defauldra ma vie en douleur, et mes ans en gemissemens, que est a moy du ciel, et senz toy que vueil ie en la terre, rien ne desire, rien ne vueil, fors toy auquel ie suppli et requier par toy meismes que tu me vueillez pardonner mes pechiez et retourner en ta grace. ”

“ Trop de gens ont pechie et apres repenti, et trop de gens ont fait maulx et moult de biens. Maiz ie maleureux et sur tout pecheur entendant et sachant a quante perdicion me tiroit mon pechie, de pechier ne cessay maiz touz iours adioustant pechiez sur pechiez, et ainsi dolent de mon gre ay use toute ma vie en pechiez, ie donc qui en tele maniere ay vescu, et qui tant de maulz ay fais, et qui en toutes iniquitez me suy envelope, en quele maniere oseray avec les autres pecheurs courre à la fontainne de misericorde. ”

“ Sire ie te cry mercy a grant douleur que tu qui es mon createur ay descogneu et deservy de tresgrans maulx senz nombre. Helas que ay ye fait, ha char vil et arme desraisonnable, se pour amour de mon créateur qui ma tant de biens faiz, ne me vueil laissier de mes mauvaises euvres, au moins par la paour ou des peines denfer, ou de la mort qui nul nespargne ou de la punicion en cest monde la quele ie doubte, car ie say sire que tu me pues baillier es mains de mes ennemis et estre en servitude. ”

“ Ta misericorde nest pas faillie ne iamaiz ue fauldra que tu ne me puisses sauver, car tes oreilles ne sont pas assourdies que tu ne moyes, maiz les miens treshorribles pechiez senz nombre et mes cogitations et miseres ont fait division entre toy et moy et entre tenebres et lumiere et entre lymage de mort et de vie er entre vanité et verite et entre ceste défaillant vie et perpetuable gloire, laquelle ie te suppli doulz sires que tu me vueilles octroyer. ”

“ Car mon doulx Dieu et mon Créateur de toutes choses, ia soit que en toutes euvres soyes tu merveilleus, toutes voyes, tu es plus merveilleux en piteuses euvres, dont tu meismes par un ton servant as dit « la misericorde de moy est sur toutes les euvres de moy », car sires tue ne desprises nul, ne as eu horreur, fors le droit fol qui na cognoissance de toy. ”

“ Tu mas aucunefoiz delaissie par quoy ie me cogneusse, car ie cuidoye estre souffisant par moy mesmes, ie ne cuidoye pas que tu me gouvernasses, maiz quant tu fois loing de moy ie tombay en moy, et le cheoir fu par moy, et le relever fu par toy. Tu Sire mas ouvert mes oyeulx tant que ie voy que temptation est la vie de lomme sur la terre et que nul ne se doit glorifier devant toy ne iustifer nul vivant ; car sil y a rien de bien petit ou grant ton propre don est ; de moy nest fors que mal. ”