“ Dessoubz son pied y auoit vn Monde painct d’Azur, auec la figure d’vn Coq tiree au vif, y auoit aussi à l’entour d’icelle, beaux guidons, enseignes de taffetas, auec les armoiries des Royaumes & pays, qu’elle auoit conquesté & subiugué par force sur ceulx qui luy auoient faictz la guerre, & autres choses magnifiques, comme Corceletz, Mourions, heaumes, pannaches, coutelatz, harnois, arcs, & flesches, & autres trophees d’armes, dont estoit demouree victorieuse : au dessoubz d’icelle France, estoient ces vers Latins. ”

“ En la grand rue deuant l’hostel de la ville, estoit vne haulte Pyramide dessus vn arc triõphal de couleur rouge, sur le bout de laquelle Pyramide y auoit vne grosse pomme d’or, au dessoubz de laquelle estoient les Colomnes entrelassees, auec la deuise du Roy, assauoir, Pietate & Iustitia, & plus bas vne armoirie de France magnifiquement accoustree d’or. ”

“ Au dessoubz d’icelle y auoit vne statue appuyee contre vne tige d’vn arbre, tenant en la main dextre vne couronne d’or, & en sa main senestre vne branche de fueillage. Au costé senestre de ladicte Pyramide estoit vne statue tenant vn liure à main senestre, & de l’autre main tenoit la Pyramide. De l’autre costé d’icelle Pyramide estoit vne statue d’hõme, lequel tenoit de sa main senestre la Pyramide, & en l’autre main vne couronne d’or fort magnifique. ”

“ A la Sereine pres ledit hostel de la ville, auoit vn braue eschauffaut, sur leq̃l auoit grãd nõbre de petites filles, habillees brauemẽt, pour quand le Roy passeroit crier, Viue le Roy.
Et dessoubz ledit eschauffaut pres d’icelle maison estoit vn petit chariot rouge, tout a petis pilliers tornez faicts d’or, & au millieu d’iceluy estoit posé vn siege ou estoit assise la fille qui presenta vne bague ronde au Roy.
Ledit chariot estoit mõté sur quatre boulles, auec quelques engins qui le faisoient tourner de tous costez sans aucuns cheuaulx. ”

“ Dedans le Cheur de ladicte eglise estoit vn Oratoire faict & preparé pour le Roy, lequel estoit couuert d’vn Ciel d’or, soustenu de quatre pilliers fort magnifiquement faictz & accoustrez.
En vne Table dattente mise dessus la porte de la maison Episcopale ou fut logé le Roy estoit escrit ces vers Francois qui s’ensuyuẽt.
Dieu est au Ciel gouuernant l’vniuers,
Qui a donné par les peuples diuers
Des Roys, portail de son diuin ymage
Ausquelz il fault que l’homme face hommage,
Les cognoissans venus en ce bas lieu
Pour commander, par le vouloir de Dieu. ”

“ Ledict Ciel estoit faict de velours bleu frangé de blanc & rouge, auec les petites crespines d’or tout semé de fleurs de lys d’or, auec les Armoiries de Frãce, & deuise dudict Sieur Roy : ascauoir deux coulomnes entrelassees la couronne dessus, auec Pietate & Iustitia : estoient aussi des C. Courõnez, & par dessoubz ledict ciel vne grande Armoirie de Frãce faicte en Or le tout bien richement.
Suyuoit apres Mõsieur le Duc D’orleãs frere du Roy, habillé tout de Drap d’or, lequel il faisoit fort bon veoir. ”

“ L’hostel de la ville estoit paré d’vne riche tapisserie, & au deuant d’vne petite porte qui estoit assez pres ledit Hostel, estoient les armoiries de messieurs les Duc de Guise, Duc d’Aumalle, & de la Ville.
Et plus bas estoient celles de monsieur de Barbezieux le tout faict en beaux chapeaux de lyerre.
Le derriere de ladicte Pyramide, tirant deuers S. Pierre, estoit semblable au deuãt, fors vne toyson de Brebis, qui estoit fort bien appropriee. Et au chapiteau de mesme l’autre, estoient escris ces vers Latins. ”

“ Quand ledit Te Deum fut chanté, le Roy se leua, alors mõsieur le Duc d’Aumalle le print par le bras pour le mener en son logis, accompaigné de plusieurs cy dessus nommés, auec ses gardes tousiours deuant & derriere luy, habillez de la liuree du Roy. ”

“ D’vn autre costé sur vn fort lieu & plateforme, nõmee la tour boileau, y auoit plusieurs autres grosses pieces d’artillerie, comme doubles canons, entre lesquelles pieces y en auoit vne nommee la grosse Guillemette, dans la gueulle de icelle pourroit entrer vne tonne de harens tout de front, toutes lesquelles pieces furent tirées à l’entrée du Roy. ”

“ Pres les Estuues aux hõmes auoit vn braue portail, dessus lequel estoit la statue du Roy S. Loys assise en vne chaire fort richemẽt paree, tenãt en sa main dextre vn sceptre Royal & à la senestre Iustice. ”