Georges Chastellain

“ Mès ce que je plains et ce qui m'est dur, c'est que je me treuve contraint, se je veuille satisfaire à ce que les temps portent et rendent, que je moulle ma plume en leur honte et opprobre, et en détester leur odieuse mauldite vie toute enténébrée de confuse laidure, acharnés l'ung sur l'aultre, comme tigres ramagés que seule sensualité féroce conduit sans entendement envers le ciel ; et souffrent le divin opprobre multiplier et croistre ; la foy crestienne succomber et cheoir devant leur nez, en pollucion infidèle ”

“ Il aimoit fort l'art et le jeu des échets ; jouoit à sort, et à l'argent : courroit aux barres et hantoit musique ; visoit fort au sien et aimoit profit à ses amis : mais tenoit fort, et en contraire du père se délectoit plus en argent, qu'en pierrerie : estoit coint toutefois en sa vesture, et volontiers riche ; vivoit plus chastement que communément les princes ne font, qui pleins sont de volupté : si estoit-il fort et puissant par nature, mais se rompit par vertu et par cremeur de Dieu, et estoit seigneur de soi-mesme. ”

“ Les fais de guerre sont périlleux et les faveurs de fortune instables ; huy elle rit à l'homme, demain lui fait la moue ; et cely qui plus se confie en sa puissance, c'est cely souvent que le plus elle reboute par estrange voie, et dont nul ne se donne garde. Monseigneur, plus a à garder cely qui a beaucop acquis et beaucop de précieux amas que cely qui est encore tout sore et creux, et n'a riens pour mettre en espargne. Vous avez l'honneur de monseigneur vostre père en vos mains, le plus noble prince de la terre, et lequel est mort vainqueur non oncques vaincu ”

“ Dont, et se de vertu et de bonne haulte renommée en singuliers titres, on peut espérer - en l'omme salutaire mort, de meismes à sa vie. Je me ose fier donc en la miséricorde de Dieu, au moins à y fonder mon espoir de son saulvement ; car avoit vertus et matère en ly sur quoy et pour quoi. Et n'y a qu'une seule chose qui m'en donne peur , ne qui en combatte mon espérance : c'est la très extreme et très abondante mondaine félicité qu'il a eue et obtenue tout son vivant, en toute acquiescence de fortune et de souhait de cuer, plus qu'oncques homme. ”

“ Monseigneur , on souffre beaucop, et dissimule-on de chose , pour ung mieulx, et souverainement pour ung si grand .bien que le vostre, là où vous pencheriez. Si le bien ne meult de vous en la part qui vous compète, le mal pourra redonder en vous très grand, pour avoir persevéré en vostre faulte. Car devez entendre que père indigné contre enfant est une périlleuse attente à qui il touche, quand le père est de hault cuer. Or où estil en la terre, qui cuer ait plus grand que ce duc, ne qui courrouchié feroit plustost ung coup bien fier pour courroucier aultruy ? ”

“ Véez-cy les languages que darrière de vous, et souvent tout au plus près à bas son se faisoient, vous donnant de grandes charges, et de quoi vous devriez avoir hyde de les porter. Et pour dire vrai, se l'effect est tel comme porte la criée, ne le peuple ne les pays de deçà n'ont pas grande cause de vous bien voloir ; moins encore le fils, et surtout moins encore le père, à qui vous avez, ce dient les gens, oslé du col l'escu, lequel, en vertu et en fleur de sa vaillance il avoit conquis chevalereusement sur le plus haut roy du monde ”

“ « Sire, ce dist-il, volez-vous estre bien atrié des Franchois, vos sujets et vassaux, ne quérez nulle amisté aux Anglois ; car d'autant que vous y querrez amour, vous serez hay des Franchois. Faites-vous amer des princes de vostre royaume, vos parens et subgès, et tout le monde ne vous pora nuire, ne Anglois ne autres. Là gist votre salut, et là gist l'amour et l'amisté que vous devez quérir. » Ces languages icy se dirent à Novion, par ledit seigneur, qui mesmes les me raconta; et les ramaine en conte comme qui bien y servent. ”

“ Dont passionné en cuer ne s'en est peu taire, et a osé mettre la campane au chat, pour escrier lésion et foulure en l'innocent. Autres matères me restent assez, auxquelles je n'atouce pour donner lieu à VoLENTÉ de parler, comme celle qui est emperéis en la région de l'ame, et qui moult a grand intérest de monstrer en ceste présente convencion quel chose c'est de sa nature , et comment justement elle se doit exposer à la defence de cestui nostre homme, qui par elle comme par nous est entré en besongne, et par les vertus impériales d'icelle a tissu son œuvre. ”

“ Nous ne touçons point à particulières personnes , ne telles, ne telles. Nous réservons par exprès lamagesté inviolée ; et notons que ceux qui abusent de vertu et de noble condition, repugnent et reboutent celui du monde que plus deussent honourer et chérir après-le souverain. Certes, il me semble que gens de bon voloir, voyans aultrui avoir envie ou despit en leur félicité ,- pevent bien remonstrer ce qui est visible et percevable de lui mesmes et que à eulx touce. Car quoi qu'il soit de toute chose et de toute opinion , veulent gens ou non veulent, la veue descœuvre les fais. ”

“ Donc, pour venir au fait et pour mieux en narrer au vif, je considère cinq ou six singuliers grans poins en ly, que jamais je n'ai veu en ung homme tout ensamble. Premièrement y avoit graces en habondance de toute vertu et noblesse de corrage, plus qu'en prince de la terre : il y avoit don et grâce de nature tele, qu'entre tous les princes du monde ly seul entre tous les autres se monstroit l'estoile et clarté de tous les autres; avoit de fortune tele porcion de famé, tele prestance que lui en fit tourner par le monde jusqu'à assez ”

“ Nous avons gloire, honneur, resplendissance, Qui l'air parvole et les hauts cieux fait fendre, Mais ce n'est pas dehors de cognoissance; Ains tenons tout de la haulte puissance De Dieu là sus, qui nostre est pour deffendre. ”

“ Et comment ! dame, n'entends-tu que haine et envie sont deux tisons de l'ennemi par les quels aultres fois il a fait cheoir ce noble royaume en sa grippe, perdre tout et annichiler jusques à ames innocentes par milions? ”

“ Et sauve tout honneur et révérence à vous deues, il convient que je vous tance un petit, et, que soubs humble et benigne supportance, je vous remonstre ce qu'en vous me desplait ; c'est que vous, non d'accord aveucques monseigneur vostre père, ne regardez ne prevoyez les amères et doloreuses fins qui pourroient issir de vostre estat en ceste manière de vivre, qui tant avez eu d'exemples par livres, et par vifs records, que discord entre père et fils est une que Dieu hayt sur toutes choses, et que nature humaine et raison condampnent, et déturpent griefvement de triste yssue où elle persévère. ”

“ Au second point, là où il démonstre l'amour au il a envers vous par contempler vostre bonne fortune et par avoir soing et paour de vostre stabilité, n'est à reprendre aussi, car lui vient de dilection cordiale et de noble voloir, quand il vous avertist et requiert que vous mettez soing et pourvision que la roe lie tourne ; et le devez en ceste qualité chiérir et amer, quand il vous advertist de vostre salut et de chose - qui est digne d'estre toujours devant l'œil, quand les plus haults aulcunesfois dit monde et les plus eslevés ont esté deceus par non y entendre. ”

“ Dont merveille fut et est que cent fois la guerre ne se commencha par là, comme il sembloit qu'on la quérust par querelle foraine, là où le sens et la pacienche du souffrant duc le menèrent au desseure de cecy, par la mort du roy son traveilleur, qui s'en repentit durement à son derrain ; car avoit esté empeschant de bonne euvre, ceste ici et aultre, par ses soupechons mal fondées, et par avoir traversé le plus léal de ses parens, en volenté méritoire, lorsque ly meisme qui y debvoit vacquer s'amusoit à privée querelle par passion peu excusable. ”

“ Oncques nul si riche en armes que lui ; ne plus lier d'encontre à espée traicte. Vaillant plus qu'homme, et plus mortel que nulglave ; victorieux de nature, et par constellation invincible ; champs et hommes à tous lez luy tenoient lieu ; aymoit plus honneur que sa vie, bonne grace que couronne en chief. Suivoit louange et vaine gloire, mais à bien faire estoit prompt ; requis, pardonnoit volontiers ; prompt estoit et piteux à misericorde, et clément après ire. Aymoit ses parens, et tout ce qui estoit de son sang eslevoit; et portoit à merveilles coustances et sommes. ”

“ Et la muraille du dehors du parc, c'estoient chariots et engins tous estoffés et effustés, et si fièrement et puissamment assis, et si bien gardés et munis de gens deffendeurs à grosses plommées, que de nul effort d'homme n'avoit garde, et n'estoit de nul lez approchable. Parquoy n'est pas de merveilles se le duc s'en partist à envis, quand, par en partir, il délessoit ce qui lui donnoit gloire de haulte fierté, et à àultrui espoentement; qui est chose que ung hault fier prince quiert et désire. ”

“ Par ma foy, monseigneur de Croy, ce poise moy que les choses sont telles, et qu'en temps et heure vous n'avez aultrement pourveu de vous. Aultrefois vous en ai parlé assez, et vous en ai dit ce qui m'en sambloit ; que se vous ne trouvez voie et moyen d'avoir la grasce de monseigneur de Charolois et de le contenter, vous vous perdriez et venriez à povre fin ; car n'y a point de comparaison entre vous deux ; et en ariez le blasme et le tort par tout le monde ; mès vostre aveuglement vous a fait à croire ce qui vous est impossible. Vous vous êtes fondé du père, et trop fié en ly ”

“ Non se confie ung roy en ses cohortes, En ses maintes puissances redoublées Parce que là où Dieu n'est de, ses sortes, Toutes fiertés humaines si sont mortes Et en l'instant ravies et emblées ; Car veult monstrer en toutes assamblées Qu'en lui seul gist plus qu'en cinq cens mil ames La paix des rois et salut des royaumes. ”

“ Parlez, messeigneurs, et par propre cuer jugiez del'aultrui. Monseigneur de Charolois se plaint de moy à tout le monde, et monstre qu'il y a hayne ; plainte et haine sont fondées en mesfait. Se doncques le mesfait y est, qui cause son indignation, je ne me doys point fier de sa grâce, laquelle oncques je n'ai peu atteindre. Et ung roy de France fait-il ainsy à abandonner à ung compaignon tel que moy , pour ung légier promettre, dont la rompiure se peut faire au plesir du prometteur, sans en pooir faire aultre chose. ”

“ Je renye ce, dict l'autre. Ne me chaut qui l'oye ou qui lui rapporte. C'est ung mauvais faulx traictre et non digne qu'il marche sur terre.
Et s'il ne m'apaise et contente, et de brief, je le feray morir de male et honteuse mort; et ne l'en pourroit sauver tout ce qu'il a de vaillant ne d'amis. Et vouldroie bien, Pierre, pour ce que avez grand'privauté aveucques ly, que le meismes que je vous dis lui deissiez, aussi que, par faulte à moy faicte, telle comme il scet, je ne le laisserai point ainsi couler. Qu'il s'avise de non entrer en danger, dont après jamais ne le porra sauver homme. ”

“ Et comme doncques le comte de Sainct Pol ici estoit de grand cuer et de haulte béance, et de hault contendre, et que sa personne aussi le valoit, et l'inclinoit nature congnoissablement et de tout temps à avarice, non merveilles est, quand il vit et percheut les termes à ly tenus devers son maistre, qui n'estoit pas prince encore des pays, s'il béoit ailleurs pour une espasse de temps, là où il pourroit mieulx recouvrer et plus à terme ; car tousjours aroit happé cela, ce lui sambloit, à son avancement et au retour en temps et en lieu; et quand honneur le poroit souffrir, aroit bien remède. ”

“ Et portoit les larmes en chief, comme se dire voloit : que le chief de la joye, qui debvoit estre son seul unique fils, luy surfondoit et faisoit pleuvoir sur ly des larmes de merencolie, par non soy rendre à sa grâce , qui plus l'amoit que soy meismes , et le désiroit veoir et avoir emprès ly, pour le solas de sa vie ; plus encore maintenant qu'oncques, pour cause de son voyage, et que, les affaires de ses pays portoient ainsi oue, sans l'amour et l'union entre eulx deulx, tout demouroit et pendoit en branle de meschief futur. ”

“ Si est ceste fondée en racine d'amour vraie, en ardeur de dilection, comme qui toutes deux ne pevent estre l'une sans l'aultre , ne icelle des deux se desjoindre de sa compagne , que l'aultre ne perde son efficace.
Ceste cy est la cremeur, dame, dont Dieu veult estre cremeu des hommes, quand, par icelle congnoistre en eulx, il y perçoit ce qu'il y quiert : c'est vrai amour. D'amour servile ne cremeur ne tient compte, parce que ceulx qui de ce le servent ne l'aiment ne ne doublent que par paour qu'ils ont de sa puissance, de sa rigueur estroite, de sa vengence droilurière ”

“ Dont se en telles et si faictes ne plaisent à toutes gens, plaisent toutefois à Dieu, qui les congnoit bonnes. Pour ceste cause et que je sens matière droict cy de labeur digne, et que je désire obvier à ce qui est de danger, et à mettre vérité avant par preuve, louer l'homme en ce qu'il a de bon, et l'excuser en accusation faulse, je mettray droict çy les conditions et mœurs de ce duc Charles, la forme et viveté de son viaire et de ses vertus et naturelles inclinations, et les concordances et différences de son père et luy en vertus et en vices. ”

“ Beau sire seneschal, qui est celuy au monde, voire de povre gentilhomme en la maison de son père, qui après avoir aultant attaint au vray son parent ou subgect, avoir emprins en sa personne par sorceries, par sacrifices et invocacions de l'ennemi, pour mort et aultres mauvaises fins, ne fast venu en faire ses doléances audict son père pour en avoir justice, et que là où ledict son père ne lui en feroit raison, ains le rebouteroit par dures parolles et tançons de ce mettre avant, qui n'en fist après son tout extreme povoir pour non en demorer en la bourde. ”

“ Les jugemens divins sont merveilleux, et n'est entendement qui en puist comprendre les voyes ; car si les uns sont en équité vers les bons, aussi sont les autres en miséricorde vers les pécheurs, lesquels Dieu espargne, supporte, réduit à cognoissance par miséricorde et en diverses manières de miséricorde. ”

“ Se voudroie, Charles , qu'ensi en feissiez pour l'amour de moy et pour le bien que je regarde qui vous en avenra. De mon pooir et de mon devoir aussi je vous porterai ; vos ennemis sont les miens ;
et ne se pora riens faire contre vous que ie ne m'en deule. Mès en la présente matère en quoi le roy s'est bouté, et que aultre l'y a attrait, il y faut aller à sens et à longue traite ; et enfin sans que je face grand esclandre de riens, tout venra à congnoissance. Les malvais toujours s'abattent de leur cop, et les bons se font congnoistre par leur prudence. ”

“ Et doncques, puisque Dieu, en tout ce qui sert à perfection d'homme, l'a voit doé et béney de singulière grâce, il besoigne bien aussi qu'il ait une singulière forme et manière d'escripre qui le décore, comme la nature de sa haulte félicité l'expete et demande. ”

“ Si vous usez de conseil et de froideur, vous ferez du peuple ce que vous vouldrez par beles paroles. Vous-meismes aultrefois les avez veus en cest estât, du temps du duc vostre père qui les sçavoit avoir à point et les rapaisier par doulceur. Si en a-il tolléré beaucoup et souffert aultres-fois plus qu'oncques prince, et leur a donné rémission et pardon pour ung mieulx. Envoyez vers eulx, et les faites doulcement interroguer de par vous, quelle chose leur fault, et leur faites promettre que les orrez volentiers en leurs plaintes, et que vous leur ferez bonne raison. Aultre chose ne leur faites ”

“ Tu vois tous les jours vassaulx avec leur princes mener guerre encontre ung aultre plus grand, et iceulx mettre main violente en ung roy, ruer en lui et se joindre au � corps en bataille, le vaincre et occire sous la main de son seigneur. Comme doncques main mise est le dernier exploit d'apétit vindicatif, et que nulle injure n'est si griève que percussion, n'est doncques parole aigre plus supportab'e que main mise , quand main exécute son ire parfait, et cuer passionné tant seulement par parole, qui ne offense que l'oye ? ”

“ Dont entre les aultres luy eschey à tourner sa raison par exprès à la personne dudict chevalier, messire Jehan de Croy, en disant:,, Seigneur de Chimay, qu'est-ce de ce monde, et des adventures que Dieu envoye aux hommes diversement , liuy d'une, demain d'une aultre ? et telle fois que à l'heure quand on cuide estre le plus malheureux de la terre , on est près de son bien, et quand on cuide estre le plus estable en sa fortune, soubitement se reverse la roe. ”

“ Par quoy domine venu à son desseure, et qu'à primes lui convenoit avoir l'œil sur divers dangiers qui naistre lui pooient, et sourdre toujours de ses contraires, mal se pooit desfaire de cely par qui toute sa fortune et sa gloire s'estoient eslevées et conduites, et sans qui riens en son royaume, qui feust grand ne de poix, ne poroit prospérer ne avoir efficace, c'estoit ledict comte de Warwic. Et certes, entre les grans hommes du monde, ce en est ung dont, à mon samblant, on peut grandement et haultement escrire, tant en sens et en vaillance comme en clère fortune. ”

“ Je entre ici en matère de grand charge, et qui fait à doloir et à plaindre durement, en si haut homme que d'un roy, soy consentir en si laide œuvre que de voloir faire tacitement morir ung sien prochain parent, frère jadis par mariage, son pacifié solennellement par veu, par serment, par contract et accord des princes de France et de tout le parlement, et par scellés et instrumens si estrois et si authentiques comme pour tout le monde y estre compris dedens et sauvé. ”