Louise Labé

“ Et si de fortune suruient quelque ialousie, comme il auient le plus souuent, on ne rit, on ne chante plus : on deuient pensif & morne : on connoit ses vices & fautes : on admire celui que l’on pense estre aymé : on parangonne sa beauté, grace, richesse, auec celui duquel on est ialous : puis soudein on le vient à despriser : qu’il n’est possible, estant de si manuaise grâce, qu’il soit aymé : qu’il est impossible qu’il face tant son deuoir que nous, qui languissons, mourons, brulons d’Amour. ”

“ Si tu fais aymer, i’en suis cause le plus souuent. Mais si quelque estrange auenture, ou grand effet en sort, en celà tu n’y as rien : mais en est à moy seule l’honneur. Tu n’as rien que le cœur : le demeurant est gouuerné par moy. Tu ne scez quel moyen faut tenir. Et pour te declarer qu’il faut faire pour complaire, je te meine & condui : & ne te servent tes yeus non plus que la lumiere à un aueugle. Et à fin que tu ne reconnoisses d’orenavant, et que me saches gré quand ie te meneray ou conduiray : regarde si tu vois quelque chose de toymesme ?
Folie tire les yeus à Amour. ”

“ Les fleurs que tu fiz, ô Iupiter, naitre es mois de l’an les plus chaus, sont entre les hommes faites hybernalles : les arbres, plantes, herbages, qu’auois distribuez en diuers païs, sont par l’estude de ceus qui veulent plaire à leurs amies, rassemblez en un verger : & quelquefois suis contreint, pour aider à leur afeccion, leur departir plus de chaleur que le païs ne le requerroit. Et tout le proufit de ce, n’est que se ramenteuoir par ces petis presens en la bonne grace de ces amis & amies. Dirày je que la Musique n’a esté inuentee que par Amour ? ”

“ Plus elles ont resisté à Amour, & plus s’en treuuent prises. Elles ferment la porte à raison. Tout ce qu’elles creingnoient, ne le doutent plus. Elles laissent leurs ocupacions muliebres. Au lieu de filer, coudre, besongner au point, leur estude est se bien parer, promener es Églises, festes, & banquets pour auoir tousiours quelque rencontre de ce qu’elles ayment. Elles prennent la plume & le lut en main : escriuent & chantent leurs passions : & en fin croit tant cette rage, qu’elles abandonnent quelquefois pere, mere, maris, enfans, & se retirent où est leur cœur. ”

“ La femme au contraire ne rit iamais, quand elle n’est en amour auec son mari. Ilz ne sont iamais en repos. Quand l’un veut reposer, l’autre crie. Le bien se dissipe, & vont toutes choses au rebour. Et est preuue certeine, que la seule amitié fait avoir en mariage le contentement, que lon dit s’y trouuer. Qui ne dira bien de l’amour fraternelle, ayant veu Castor & Pollux, l’un mortel estre fait immortel à moitié du don de son frere ? Ce n’est pas estre frere, qui cause cet heur (car peu de freres sont de telle sorte) mais l’amour grande qui estoit entre eus. ”

“ Amour l’a taché naurer de ses armes qu’il portoit, Folie s’est desfendue des siennes, dont elle ne s’estoit chargee pour blesser personne, mais pource que ordinairement elle les porte. Car, comme vous sauez, ainsi qu’Amour tire au cœur, Folie aussi se getté aus yeus & à la teste, & n’a autres armes que ses doits. ”

“ Et pource qu’Amour s’est voulu munir, tant qu’il ha pù, de la faueur d’un chacun, pour faire trouuer mauuais que par moy seule il ait reçu quelque infortune, c’est bien raison, qu’apres auoir ouy toutes ses vanteries, ie lui conte à la verité de mon fait. Le plaisir qui prouient d’Amour, consiste quelquefois ou en une seule personne, ou bien pour le plus, en deus, qui sont, l’amant & l’amie. Mais le plaisir que Folie donne, n’a si petites bornes. D’un mesme passetems elle fera rire une grande compagnie. ”

“ En somme, sans cette bonne Dame l’homme seicheroit & seroit lourd, malplaisant & songeart. Mais Folie lui esueille l’esprit, fait chanter, danser, sauter, habiller en mille façons nouuelles, lesquelles changent de demi an en demi an, auec tousiours quelque aparence de raison, & pour quelque commodité. Si lon inuente un habit joint & rond, on dit qu’il est plus seant & propre : quand il est ample & large, plus honneste. Et pour ces petites folies, & inuencions, qui sont tant en habillemens qu’en contenances & façons de faire, l’homme en est mieux venu, & plus agreable aux Dames. ”

“ Tu lasches l’arc, & gettes les flesches en l’air : mais ie les assois aus cœurs que ie veus. Quand tu te penses plus grand qu’il est possible d’estre, lors par quelque petit despit ie te renge & remets auec le vulgaire. Tu t’adresses contre Iupiter : mais il est si puissant, et grand, que si ie ne dressois ta main, si ie n’avois bien trempé ta flesche, tu n’aurois aucun pouuoir sur lui. Et quand toy seul ferois aymer, quelle seroit ta gloire si ie ne faisois paroitre cet amour par mille inuencions ? ”

“ Lors tu verras en bien seruant & aymant quelque Dame, que sans qu’elle ait egard à richesse ne puissance, de bon gré t’aymera. Lors tu sentiras bien un autre contentement, que ceus que tu as uz par le passé : & au lieu d’un simple plaisir, en receuras un double. Car autant y ha il de plaisir à estre baisé & aymé, que de baiser & aymer. ”

“ Tousiours l’ocasion ne se presente à combatre pour sa Dame, & defendre sa querelle. Du premier abord vous ne vous ofrirez à lui ayder en ses afaires domestiques. Si faut il faire a croire que l’on est passionné. Il faut long tems, & long seruice, ardentes prieres, & conformité de complexions. L’autre point, que l’Amant doit gaigner, c’est se faire aymer : lequel prouient en partie de l’autre. Car le plus grand enchantement, qui soit pour estre aymé, c’est aymer. ”

“ Et quand on aura bien couru, on trouuera que ce n’est rien, & que c’estoit pour aller en compagnie se promener sur l’eau, ou en quelque jardin : où aussi tot un autre aura faueur parler à elle que lui, qui ha esté conuié. Encore ha il occasion de se contenter, à son auis. Car si elle n’ust plaisir de le voir, elle ne l’ust demandé en sa compagnie. Les plus grandes ; & hazardeuses folies suiuent tousiours l’acroissement d’Amour. ”

“ Vous ne trouuerez point mauvais que ie touche en brief en quel honneur & reputation est Amour entre les hommes, & qu’au demeurant de mon oraison ie ne parle guere plus que d’eus. Donques les hommes sont faits l’image & semblance de nous, quant aus esprits : leurs corps sont composez de plusieurs & diverses complexions : & entre eus si diferens tant en figure, couleur & forme, que iamais en tant de siecles, qui ont passé, ne s’en trouua, que deus ou trois pers, qui se ressemblassent : encore leurs seruiteurs & domestiques les connoissoient particulierement l’un d’auec l’autre. ”

“ Car si c’est vray amour, il est grand & vehement, & plus fort que toute raison. Et, comme le cheual ayant la bride sur le col, se plonge si auant dedens cette douce amertume, qu’il ne pense aus autres parties de l’ame, qui demeurent oisiues : & par une repentance tardiue, apres un long tems, témoigne à ceus qui l’oyent, qu’il ha esté fol comme les autres. Or si vous ne trouuez folie en Amour de ce côté là, dites moi entre vous autres Signeurs qui faites tant profession d’Amour, ne confessez vous, que Amour cherche union de soy auec la chose aymee ? ”

“ La premiere chose dont il faut s’enquerir, c’est, s’il y ha quelque Amour imprimee : & s’il n’y en ha, ou qu’elle ne soit encor enracinee, ou qu’elle soit desia toute usee, faut songneusement chercher quel est le naturel de la personne aymee : &, connoissant le notre, auec les commoditez, façons, & qualitez estre semblables, en user : si non, le changer. Les Dames que tu as aymees, vouloient estre louees, entretenues par un long temps, priees, adorees : quell’Amour penses tu qu’elles t’ayent porté, te voyant en foudre, en Satire, en diuerses sortes d’Animaus, & conuerti en choses insensibles ? ”

“ Ie croy auoir satisfait a ce qu’auois promis montrer : que iusques ici Amour n’auoit esté sans Folie, Il faut passer outre, & montrer qu’impossible & d’estre autrement. Et pour y entrer : Apolon, tu me conseilleras, qu’Amour n’est autre chose qu’un desir de iouir, auec une conionccion, & assemblement de la chose aymée. Et estant Amour desir, ou, quoy que ce soit, ne pouuant estre sans desir : il faut confesser qu’incontinent que cette passion vient saisir l’homme, elle l’altere & immue. Car le desir incessamment se demeine dedens l’ame, la poingnant tousiours & resueillant. ”

“ On se compose les yeus à douceur & pitié, on adoucit le front, on amollit le langage, encore que de son naturel l’Amant ust le regard horrible, le front despité, & langage sot & rude : car il ha incessamment au cœur l’obiect de l’amour, qui lui cause un desir d’estre dine d’en receuoir faueur, laquelle il scet bien ne pouuoir avoir sans changer son naturel. Ainsi entre les hommes Amour cause une connoissance de soymesme. Celui qui ne tache complaire à personne, quelque perfeccion qu’il ait, n’en ha non plus de plaisir, que celui qui porte une fleur dedens sa manche. ”

“ S’il m’estoit licite, ie les vous depeindrois, comme ie les voy decrire aus hommes de bon esprit. Et neanmoins il vaut mieus en dire un mot, à fin de connoitre combien est mal plaisante & miserable la vie de ceus, qui se sont exemptez d’Amour. Ils dient que ce sont gens mornes, sans esprit, qui n’ont grace aucune à parler, une voix rude, un aller pensif, un visaige de mauuaise rencontre, un œil baissé, creintifs, auares, impitoyables, ignorans, & n’estimans personne : Loups garous. Quand ils entrent en leur maison, ils creingnent que quelcun les regarde. ”

“ N’est à estimer cette fole curiosité de mesurer le Ciel, les Estoiles, les Mers, la Terre, consumer son tems à conter, getter, aprendre mile petites questions, qui de soy sont foles : mais neantmoins resiouissent l’esprit : le font aparoir grand & subtil autant que si c’estoit en quelque cas d’importance. Ie n’auroy jamais fait, si ie voulois raconter combien d’honneur & de reputacion tous les jours se donne à cette Dame, de laquelle vous dites tant de mal. ”

“ Les parties seront si inegales, que les belles ne rencontreront les beaus, ains seront coniointes le plus souuent avec leurs dissemblables. Grands Dames aymeront quelquefois ceus dont ne daigneroient estre seruies. Les gens d’esprit s’abuseront autour des plus laides. Et quand les poures & loyaus amans auront langui de l’amour de quelque belle : lors Folie fera iouir quelque auolé en moins d’une heure du bien ou l’autre n’aura pù ateindre. ”

“ Et ay belle peur, qu’au lieu, ou Amour ha inuenté tant de sciences, & produit tant de bien, qu’elle n’ameine auec soy quelque grande oisiueté acompagnee d’ignorance : qu’elle n’empesche les jeunes gens de suiure les armes & de faire seruice à leur Prince : ou de vaquer à estudes honorables : qu’elle ne leur mesle leur amour de paroles detestables : chansons trop vileines, iurongnerie & gourmandise : qu’elle ne leur suscite mile maladies, & mette en infiniz dangers de leurs personnes. Car il n’y ha point de plus dangereuse compagnie que de Folie. ”

“ Elle vous demande ce que ne lui pouuez refuser, qu’il soit dit, qu’Amour par sa faute mesme est deuenu aueugle. Le second point qu’Apolon ha touché, c’est qu’il veut estre faites defenses à Folie de n’aprocher dorenauant Amour de cent pas à la ronde. Et ha fondé sa raison sur ce, qu’estant en honneur & reputacion entre les hommes, leur causant beaucoup de bien & plaisirs, si Folie y estoit meslee, tout tourneroit au contraire. Mon intencion sera de montrer qu’en tout celà Folie n’est rien inferieure à Amour, qu’Amour ne seroit rien sans elle : & ne peut estre, & regner sans son ayde. ”

“ En somme quand cette afeccion est imprimee en un cœur genereus d’une Dame, elle y est si forte, qu’à peine se peut elle efacer. Mais le mal est, que le plus souuent elles rencontrent si mal : que plus ayment, & moins sont aymees. Il y aura quelcun, qui sera bien aise leur donner martel en teste & fera semblant d’aymer ailleurs, & n’en tiendra conte. Alors les pourettes entrent en estranges fantasies : ne peuuent si aisément se defaire des hommes, comme les hommes des femmes, n’ayans la commodité de s’eslongner & commencer autre parti, chassans Amour auec autre Amour. ”

“ Quand ils feront quelque assemblee, tousiours donneront charge que les plus fols y soient, n’estimant pouuoir estre bonne compagnie, s’il n’y ha quelque fol pour resueiller les autres. Et combien qu’ils s’excusent sur les femmes & jeunes gens, si ne peuuent ils dissimuler le plaisir qu’ils y prennent, s’adressans tousiours à eus, & leur faisant visage plus riant, qu’aus autres. Que te semble de Folie, Iupiter ? ”

“ Quelle temerité ha un enfant de s’adresser à une femme, & l’iniurier & outrager de paroles : puis de voye de fait tacher à la tuer. Vne autre fois estime ceus que tu ne connois estre, possible, plus grans que toy. Tu as ofensé la Royne des hommes, celle qui leur gouuerne le cerueau, cœur & esprit : à l’ombre de laquelle tous se retirent une fois en leur vie, & y demeurent les uns plus, les autres moins, selon leur merite. ”

“ Amour ha voulu montrer qu’il auoit puissance sur le cœur d’elle. Elle lui ha fait connoitre qu’elle auoit puissance de lui oter les yeus. Il ne se pleingnoit que de la deformité de son visage. Elle esmue de pitié la lui ha couuert d’une bande à ce que lon n’apercust deus trous vuides d’iceus, enlaidissans sa face. On dit que Folie ha fait double injure à Amour : premierement, de lui auoir creué les yeus : secondement, de lui auoir mis ce bandeau. On exaggere le crime fait à une personne aymee d’une personne, dont plusieurs ont afaire. ”

“ Au contraire, les choses sages & bien composees, nous tiennent premierement en admiracion : puis nous soulent & ennuient. Et ne nous feront tant de bien, quelques grandes que soient & cerimonieuses, les assemblees des grans Signeurs & sages, que fera quelque folatre compagnie de jeunes gens deliberez, & qui n’auront ensemble nul respect & consideracion. ”

“ Laisse Amour se resjouir en paix entre les hommes : qu’il soit loisible à un chacun de conuerser priuément & domestiquement les, personnes qu’il aymera, sans que personne en ait crainte ou soupson : que les nuits ne chassent, sous pretexte des mauuaises langues, l’ami de la maison de s’amie : que lon puisse mener la femme de son ami, voisin, parent, ou bon semblera, en telle seureté que l’honneur de l’un ou de l’autre n’en soit en rien ofensé. ”

“ Mais auant iceus estoit Amour, qui les auoit liez & uniz ensemble. Raconter l’opinion, qu’ont les hommes des parens d’Amour, ne seroit hors de propos, pour montrer qu’ils l’estiment autant ou plus, que nul autre des Dieus. ”

“ Pource est il estimé entre les humains, l’honorans & aymans, comme celui qui leur ha procuré tout bien & plaisir. Ce qui lui ha esté bien aisé, tant qu’il ha ù ses yeus. Mais aujourd’hui, qu’il en est priué, si Folie se mesle de ses afaires, il est à creindre, & quasi inéuitable, qu’il ne soit cause dautant de vilenie, incommodité, & desplaisir, comme il ha esté par le passé d’honneur, proufit, & volupté. Les grands qu’Amour contreingnoit aymer les petis & les sugetz qui estoient sous eus, changeront en sorte qu’ils n’aymeront plus que ceus dont ils en penseront tirer seruice. ”

“ Lors il faut connoitre que lon ha failli par bien seruir, par masques magnifiques, par deuises bien inuentees, festins, banquets. Si la commodité se trouue, faut se faire paroitre par dessus celui dont on est ialous. Il faut se montrer liberal : faire present quelquefois de plus que l’on n’a : incontinent qu’on s’aperqoit que lon souhaite quelque chose, l’enuoyer tout soudein, encores qu’on n’en soit requis : & jamais ne confesser que lon soit poure. Car c’est une tresmauuaise compagne d’Amour que Poureté : laquelle estant suruenue, on connoit sa folie, & lon s’en retire à tard. ”