Jean Lemaire de Belges

“ Neantmoins à la belle Deïdamie, fille dudit Roy Lycomedes, ne peut long temps estre occultee la verité de son sexe.
Ainçois luy en monstra Achilles la verité par temps : Car en couchant auecelle, il engendra le cruel Pyrrhus mutilateur de la venerable vieillesse de Priam, et respandeur du sang virginal de la noble Polyxene. Neantmoins la gente Deïdamie pour la commodité du fruit de ses amours cela la feinte du sexe d'Achilles, iusques à ce que apres la coniuration des Princes Grecz contre les Troyens, Apollo donna response : que sans Achilles ne se pouuoit tel chef dœuure parfaire. ”

“ Ainsi admonnestoit la belle Nymphe Pegasis Oenone, par douces paroles, son trescher espoux, Paris Alexandre.
Mais si elle eust sceu le mal qui puis luy en aduiendra, elle fust deslors tombee en desespoir. Toutesfois quelque semblant quelle feist, elle ne se pouuoit bonnement esgayer, comme parauant, ne reduire à resiouissement : ains luy apportoit le cœur occultement tristeur et doleance. Et ne se donnoit garde, que sans y penser, elle iettoit regretz et parfonds souspirs tant de nuict comme de iour, lesquelz luy estoient presage de son infortune. ”

“ Par ainsi le bon Prince Noë se voyant seul Roy, Monarque, Empereur, Patriarche, Maistre et seigneur de toute la terre vniuerselle, quand il apperceut que les fanges se commencèrent à seicher, par la grand ardeur du Soleil, il descendit du haut mont Gordieus en Armenie, luy huitieme seulement : car plus nen y auoit au monde et vint en la plaine qui estoit toute ionchee de corps morts, et illecques graua en vne grand pierre toute Ihistoire de deluge. ”

“ Du temps du dessusdit Roy Romus de Gaule, commença à regner en Phrygie, Erichthonius, filz de Dardanus et de la Royne Candauia sa femme et sœur, comme met Bocace.
Iasoit ce que Diodorus Siculus, comme nous auons dit cy dessus, met que la femme de Dardanus, fille du Prince Teucrus, sappelloit Hatea : comme nous auons dit cy dessus.
De cela ie ny mets point de différence, car il nest pas impossible quil eust deux femmes. Cestuy Erichthonius fut le premier des Roys Troyens qui commença à resplendir, en félicité, et en richesse : comme met ledit acteur Diodorus en son cinquieme liure. ”

“ Or, mon cher espoux et amy, si le cas semblable aduenoit de toy (que les Dieux ne vueillent) soyes seur et certain, que ie qui ne suis pas immortelle, auroye tantost trouué chemin à la mort : car apres ton definement ie ne quiers viure vne seule heure. Parquoy ie te prie, mon tresdoux cœur, que tu nous reserues tous deux en vie, tant que nature ayt fait son droit cours, sans ce que mort violente fasse abreger les iours lun de lautre. ”

“ Tandis que le Dieu Mercure informoit Paris Alexandre de son affaire, Pallas auoit desia prins terre : Venus aussi et Iuno estoient descendues de leurs curres triomphans, ou chariotz, et marchoient de leurs diuins piedz, sur lherbette iolie, et se tiroient vers le iouuenceau Paris. Et luy ce voyant, estoit tout transporté et tout rauy en contemplation, comme vn homme qui songe, et ne sauoit sa contenance.
Neantmoins il sauança, et de tout le corps prosterné en terre les adora deuotement : mais elles le feirent leuer. ”

“ Auecques celuy se festoya le grand Empereur Osiris, comme il est vraysemblable : car il estoit son parent. Et ce temps pendant les peuples d'Italie, oppressez des grans Geans nommez Titans, lesquelz apres la mort de leurs bons Princes successeurs de Noë les molestoient, sans nulle misericorde, enuoyerent leurs embassades au bon Prince Osiris, dit Iupiter le Iuste, luy supplier humblement quil luy pleust les venir deliurer de la miserable seruitude ou ilz estoient, comme il auoit fait les autres prouinces. ”

“ Las, mon doux cher enfant, que peux tu auoir perpetré en si ieune aage, contre la souueraineté des Dieux, quand ilz tont prédestiné à si mauuaise auenture ? Qui pourroit iamais croire que par toy, qui es si beau et de regard si begnin soit vne fois Troye destruite ? Dont lasse moy, dolente, il ha fallu pour ceste crainte que ie me soye obligee, par promesse et serment inhumain, de te deffaire et absconser en tenebres mortelles, ains que à peines ayes eu loisir de voir la lumiere de vie. ”

“ Mais de ladite region nous parlerons plus à plein en nostre œuure de Grece et de Turquie. Quand donques le bon pere Noë, Sem, Cam, et Ia- phet, et leurs femmes Tytea la grande, Pandora, Noëla, et Noëgla, se veirent estre tous seulets au monde, ilz furent ententifz aux œuures de mariage, à fin de reparer la perte du genre humain : Et tant labourerent que dedens peu de temps ilz peuplerent Armenie : car Dieu et Nature, qui ne faillent iamais au besoing, leur faisoient produire à chacun enfantement deux enfans iumeaux, masle et femelle : lesquelz paruenuz en aage competant faisoient le semblable. ”

“ Le genre humain desia grandement multiplié, Noë Ianus, commença à distribuer la terre vniuerselle à ses enfans et neueux : et leur monstra la cosmographie : cestadire, la situation de la terre, comme il lauoit veüe auant le deluge. Et premierement establit la monarchie des Babyloniens en Asie. Mais en Europe il institua quatre Royaumes principaux : dont celuy de Gaule fut lun. Et puis alla visiter sa generation par tout le monde, et fonda plusieurs citez en Asie. ”