Jacques de Lescornay

“ Ce consideré (Sire) attendu qu’il n’y va que de l’interest de vostre Majesté, & que la suppliante a esté portée à ceste entreprise par le rapport qu’auoit fait le Curé de l’innocence de son nepueu, & y a esté comme forcée par les mouuements naturels qui se preualants de l’imbecilité de son sexe, violentoient son humeur, d’ailleurs fort esloignée de temerité : Il vous plaise, preferant misericorde à justice, luy donner la vie, & elle sera obligée & tous les siens de continuer leurs vœux & prieres à Dieu pour vostre prosperité & santé. ”

“ Fort prompts à mettre la main aux armes & s’y porter en personne quand il est question de l’aduencement de la Religion & de la gloire de Dieu, mais sans cela fort retenus à faire la guerre, recherchants tous autres moyens d’accomodation, sçachants bien qu’elle ne se peut faire sans vne grande ruyne & oppression des peuples. ”

“ L’Admiral de Grauille ne fut pas plustost seigneur de Dourdan, qu’il s’y engagea d’affection, & en voulut laisser des marques aux siecles à venir : pourquoy faire il ne trouua point de meilleur subiect que de contribuer à l’embellissement de l’Eglise de S. Germain, à l’entrée de laquelle il fit bastir deux hautes tours ou clochers, & au dedans feit refaire la voûte de la nef telle qu’elle se trouue auiourd’huy : Il est bien vray que ie n’ay point de preuue precise de cette proposition : mais i’ay appris des anciens du pays que ces Clochers furent bastis enuiron son temps. ”

“ Et soit ainsi que depuis cinquante ans en ça plusieurs bonnes personnes ayent donné & laissé tant en leurs dernieres volontez & testament, comme autrement, plusieurs terres, vignes, prez, cens, rentes, & autres choses, pour le salut & remede de leurs ames, pour faire certains seruices & prieres pour eux en ladite Eglise, dont partie d’iceux heritages & rentes sont tenuës de nous en fief ou censiue, lesquels Prieur & Freres ont eu & soustenu grandes pertes & dommages, tant pour le faict des guerres, mortalitez & autres pestilences, & n’eussent dequoy viure. ”

“ Il est bien vray que ce tiltre ne parle point des Roys, mais seulement de ce Prince qui sembleroit de prim’ abord auoir esté l’instituteur de ceste garenne : Mais quand on considerera que ce tiltre est de l’an mil trois cens dix, & qu’il n’a esté seigneur de Dourdan qu’en l’an mil trois cens sept, trois ans auparauant, & que dans ce peu de temps (s’il eust esté le premier instituteur de ceste garenne) les bestes n’eussent peu tant multiplier pour incommoder le pays. ”

“ Quelques années apres les ouuriers de la ville plus subtils que les autres s’adonnerent aux bas de soye (en la façon desquels ils ne cedent en rien à Milan) & laisserent la laine aux Beaulcerons, les ouurages desquels toutesfois les marchands de Dourdan vont achepter sur les lieux, pour (après les auoir apprestez) les vendre à ceux de Paris. ”

“ Si la maison d’Eureux a eu vne particuliere inclination pour Dourdan en suite de ses ayeuls Roys de France, ce n’a point esté par habitude ny par autre consideration que de la beauté & bonté du pays : puisque tous ceux qui depuis en ont esté Seigneurs & qui en ont peu joüir ont eu les mesmes affections & l’ont eu en pareil estime : Le Duc de Berry n’en fut pas plustost Seigneur, qu’il y transfera & son habitation & ses affections, comme on peut juger de ce que dés le mois de Feurier 1400. ”

“ Car sans ceste consideration pourquoy achepter pour luy donner ? c’eust esté plustost fait, & l’obliger dauantage de luy bailler l’argent que coustoient ces choses & luy laisser la liberté de l’employer à sa volonté, sans le restraindre en certain lieu. La seconde consequence est tirée de ce qu’en l’année 1255. le Roy rendit aux Religieux de Louye les bois que Philippes Auguste & Louys VIII. leur auoient osté : Car il est à presumer que ce restablissement ne se feit qu’en consideration de l’affection qu’il auoit pour eux, & laquelle s’estoit formée en luy par le sejour qu’il faisoit à Dourdan. ”

“ Supplians que de nostre grace nous leur voulussions les dessusdits heritages, prez, cens & rentes à eux laissez, donnez & aumosnez, ratifier, loüer & approuuer, & aussi admortir, afin qu’ils les puissent tenir paisiblement pour le temps present & à venir, à l’intention, salut & remede des trespassez, fondeurs & donneurs, en telle maniere que lesdits Prieur & Freres presens & à venir puissent auoir leur substantation, & viure en faisant le seruice diuin en ladite Eglise. ”

“ En ceste rencontre Dourdan experimenta à ses despens que les choses du monde ne sont gouuernées que par vicissitudes, & que les plus grandes prosperitez ne seruent que de but aux malheurs qui les abattent à la fin les reduisant comme au premier poinct de leur naissance : car en bien peu de iours il se veit despoüillé de tout ce que les siecles passez & la liberalité de ses Seigneurs y auoient apporté de riche & d’ornement. ”

“ Il n’y a que le Roy qui demeure froid au milieu de ce grand feu, l’interest qu’on dict qu’il y a n’a point d’aiguillon pour l’irriter, Il demeure dans le calme & se reserue de condemner quand il aura entendu l’accusé. ”

“ Louys Comte d’Estampes, sieur de Lunel, à tous ceux qui ces presentes Lettres verront, salut. Sçachent tous que nous ouyë & receuë la supplication de nostre bien amé Messire Robert Ioudoyn Prieur de sainct Germain de nostre ville de Dourdan, faisant mention que comme ledit Prieuré ait esté petitement anciennement doüé de rentes, possessions ou heritages pour l’estat dudit Prieur & Freres qui furent pour lors ordonnez à seruir Dieu continuellement. ”

“ Apres disner on va lancer le cerf, cét animal conduit par le bon genie de Dourdan, au lieu de tirer droit à la forest comme tous les autres, prend sa course vers la Beauce, afin que courant en pleine campagne il soit tousiours veu auec la chasse & donne plus de plaisir au Roy, & par ce moyen luy face recognoistre que ce païs est veritablement destiné pour ses passe-temps, puis que mesmes les brutes essayent de les luy augmenter. ”

“ Il ne l’eut pas plustost recogneu qu’il le feit gardien des choses qui luy estoient les plus cheres, y establissant son escurie, à cause de laquelle il y estoit tousiours presumé demeurer, puis que les Princes guerriers (comme il estoit) n’ont point de tresor plus precieux que leurs cheuaux, ny d’entretien plus charmant que celuy de ces animaux, propres instruments de leurs victoires & triomphes. De cét establissement arriua vn autre bien à Dourdan, lors que par le soin de l’vn des officiers de ceste escurie le traffic de bas d’estame & de soye s’y est introduit, comme i’ay remarqué cy dessus. ”

“ Vne femme auoit esté par arrest de la Cour rẽuoyée à Chastres pour estre executée à mort, & y fut conduite le mesme iour que le Roy arriua à Dourdan, qui donna sujet à sa mere accompagnée de six de ses enfans, de venir toute nuict à Dourdan pour se presenter au Roy & obtenir quelque traict de sa misericorde : Ces pauures affligez s’estans adressez à moy, ie leur feis vne requeste qu’ils luy presenterent à l’issuë de la Messe, & laquelle i’ay icy transcripte, pource qu’elle contient succinctement le faict & les raisons sur lesquelles estoit fondée la grace qu’ils demandoient. ”

“ Mais pour reuenir à Hugues le Grand : il auoit vne si grande passion pour Dourdan, qu’il la voulut eterniser, & en laisser des tesmoignages à la posterité, y rendant les derniers souspirs de la vie, ou soit qu’il s’y fust fait porter estant malade, pour (à l’aide de la pureté de l’air) y recouurer sa santé, ou qu’y estant pour ses plaisirs, la maladie l’y eust surpris. ”

“ A ceste secõde action Dourdan commença à respirer vne plus douce vie & à esperer vne meilleure fortune, il releue son courage, il s’accoustume au nom Royal & se tient desia tout asseuré d’vne parfaite guarison de son mal, par les salutaires influences de son Soleil de Iustice. Toutes choses luy semblent venir à souhait : le sieur du Marais luy est donné pour Gouuerneur, mais plustost pour Pere & Protecteur, car il s’interesse dans sa fortune & s’y monstre si passionné, qu’en toutes occasions il contribuë de sa part à l’augmenter. ”

“ Voulons & nous plaist : De ce auons nous octroyé & octroyons de nostre certaine science, auctorité & grace speciale audit Prieur & Freres, presens & aduenir, qu’ils puissent tenir perpetuellement & paisiblement pour leur propre domaine & propre chose ... les terres, vignes, prez, rentes & heritages, & autres choses qui ensuiuent, &c. Ce fut faict & donné en nostre Chastel de Dourdan, l’an de grace 1381. au mois d’Auril. Admortissement de la rente de quatre-vingts liures parisis, & confirmation du droict de chasse. ”

“ Tous deux fils de meres estrangeres, mais si affectionnées à l’Estat, qu’elles en ont recherché l’aduencement autant qu’elles ont peu.
Delaissez orphelins par leurs peres, mais esleuez & bien instruits par le soin de leurs meres, & particulierement en la Religion, de laquelle ils ont pris la protection & embrassé la defense.
Guerroyez par leurs subjects pendant leur minorité soubs pretexte de mauuais gouuernement, & en ces troubles, ont couru fortune d’estre pris & enleuez d’entre les mains de leurs meres qui gouuernoient soubs leur authorité. ”

“ Sçachent tous que l’assignation faite par nos amez Denys de Charolles, Regnault de Sarguz clercs, & Robert de Charny à ce de par nous deputez, aux Chanoines Prieur Abbé de Dourdan, de dix sols tournois de rente, laquelle rente nostre tres-cher frere le Comte d’Estampes (que Dieu absolue) a laissé en son testament ausdits Religieux & à l’Eglise, pour son anniuersaire tous les ans, si comme il est plus pleinement contenu ez lettres parmy lesquelles ces presẽtes sont annexées, ratifions, loüons & approuuons. En tesmoin de ce nous auons fait mettre nostre scel en ces presentes. ”

“ La ville de Dourdan est bastie dans le fonds de ce vallon, sinon qu’elle s’estend dauantage sur la pente Septentrionale, en telle sorte que la riuiere ne passe dedans que par vn bout, où ayant fait tourner vn moulin qui dépend du Domaine, & trauersé cinq ou six maisons, elle en sort & coule le long des murailles pour seruir à plusieurs Tanneurs & Megissiers. ”

“ Ce qui ne signifie autre chose, sinon que c’estoit vn lieu qu’il cherissoit : car autrement il n’y eust pas entretenu ces oyseaux rares & de delices.
Il joüit de Dourdan jusques en l’an 1446. que le Procureur general qui pretendoit qu’Estampes & Dourdan dependoient de la Couronne, & faisoient partie du Domaine du Roy, les feit saisir, le meit en procez, & en fin obtint Arrest contre luy en l’année 1477. par lequel ces terres luy furent ostées & revnies à la Couronne, d’où veint qu’il fut nommé Iean Sans-terres, pource qu’il ne luy restoit autres biens. ”

“ Dans la remarque que i’ay fait cy deuant des circonstances qui pouuoient seruir pour faire croire qu’il faisoit son sejour ordinaire au chasteau de Dourdan, i’en ay obmis vne qui n’est pas moins considerable que toutes les autres, laquelle ie tire de l’article de ce testament, auquel il est parlé de son Breuiaire à l’vsage de Chartres, qu’il donne au sieur Thorel : Car de là il est aisé de juger que sa principale demeure estoit dans l’Euesché de Chartres, puisque ses prieres en estoient à l’Vsage, & consequemment à Dourdan, puis qu’il n’auoit autre chasteau dans l’estenduë de cét Euesché. ”

“ Nous acertez les choses dessusdites, & chacunes d’icelles voulons, loüons, agreons & approuuons, & de nostre pouuoir & auctorité confirmons & voulons & octroyons de grace speciale, que ledit Prieur & ses successeurs puissent icelles choses tenir, auoir & posseder paisiblement à tousioursmais, sans & qu’il & lesdits successeurs puissent estre contraints de les mettre hors de leur main & de payer à nous & à nos hoirs & successeurs pour ce finance, à nous nostre droict en autres choses, & l’autruy par tout. ”

“ Si donnons en mandement par ces presentes aux Gardes de nostredite forest, presens & à venir, que lesdits Prieur & Freres, & leurs successeurs facent, souffrent & laissent iouïr & vser paisiblement de nostre presente grace & octroy, & contre iceux ne les empescher ou leurs gens en aucune maniere. Et pour que ce soit chose ferme & stable à tousjours, Nous auons fait mettre à ces Lettres nostre seel, sauf en autres choses nostre droict & en toutes l’autruy. ”

“ Il laissa deux enfants masles, Louys & Iean : quant à Iean, apres auoir esté l’vn des ostages en Angleterre pour le Roy Iean, il feit vn voyage à Rome où il mourut, & Louys resta seul heritier.
Il ne se contenta pas d’auoir monstré pendant sa vie quel estat il faisoit de Dourdan, mais encores en voulut-il laisser des preuues apres sa mort, lors que par son testament il fonda dans l’Eglise sainct Germain vn anniuersaire, pour lequel il legua au Prieur dix sols parisis de rente à prendre sur sa Preuosté du lieu. ”

“ Et premierement considerans qu’en seruans les Roys nos souuerains seigneurs, Auons par long temps eu gros estat, grands dons & profits de la chose publique, en quoy a esté ladite chose publique chargée, & dequoy faisons conscience, veu la jeunesse que auions quand premierement commenceasmes à auoir les estats & grosses pensions, combien que pensons auoir seruy lesdits Sieurs & la chose publique loyaument & de tout nostre pouuoir, sans y espargner nostre personne. ”

“ Apres la mort de Iehan Duc de Bourgongne, Philippe 2. son fils & vnique heritier, qui a possedé Dourdan, n’a peu, non plus que luy laisser à la posterité de grands tesmoignages d’affection qu’il en aye eu, d’autant qu’il ne le garda que quinze ans, pendant lesquels il eut assez d’autres occupations serieuses & importantes, qui l’empescherent de s’y arrester, & de songer à ses passe-temps. ”

“ En ceste tour reside toute la Seigneurie de Dourdan, & sont dicts les vassaux releuer du Roy à cause de la grosse tour de son chasteau de Dourdan : Toutes les autres tours furent couuertes de thuille en l’année mil quatre cens cinquante, & ont duré telles jusques en l’année mil cinq cens quatrevingts-vnze, que ceste couuerture fut ruinée par le Mareschal de Biron, lors qu’auec l’Armée Royale il assiegea le chasteau. ”

“ Nous oye leur requeste diligemment & entenduë, considerans & regardans les griefs, les dommages qu’ils auoient & pouuoient auoir en temps à venir pour cause des bestes de nostre garenne, desquels nostre conscience est enformée par bonnes gens dignes de foy, meu en pité, voulans faire grace au commeun desdites parroisses, & encliner à leur requeste & mettre remede conuenable parquoy ils puissent viure paisiblement soubs nous, & leurs heritages soustenir & sauuer. ”

“ Outre cecy la volerie y est tres-belle, tant pour les herons & canars que retiennent les estangs & la pairie, que pour les perdrix, corneilles, & tous autres oyseaux qui y sont en quantité : Mais ce qui rend ce plaisir de chasse plus accomply, est, qu’en quelque temps que ce soit on en peut joüir sans incommodité : car en esté les vallons fournissent de rafraischissement aux coureurs, & en hyuer la course n’est que plus aisée, à cause des sablons qui y sont en abondance ”

“ Ie ne rapporteray en particulier les tesmoignages qu’il en a rendu, seulement diray-ie que pendant les mouuements de l’année 1616. encores qu’il fist profession de la Religion pretenduë reformée, si est-ce qu’il ne voulut pas que le iour de Noël les chefs de la ville feussent diuertis des prieres & de la Messe de my-nuict pour faire leurs rondes ordinaires, luy-mesmes en prit le soin & quitta son chasteau pour passer toute la nuict dans les corps de gardes & le long des courtines de la ville : apres quoy il ne faut plus demander de preuues de sa bonté & de son affection enuers ce peuple. ”