Guillaume Du Bellay

“ Il n'y eut pas sejourné long temps, qu'en donnant ordre et se preparant pour recevoir ou donner la bataille, qu'il luy vint nouvelles, mesme par le capitaine Martin du Bellay, comme l'Empereur et tout son camp estoit deslogé, reprenant le chemin qu'il estoit venu, au long de la marine, laissant derriere luy, outre les morts, qui estoient en nombre infiny, et tel
que l'air en estoit corrompu tout à l'entour, une grande multitude de malades, lesquels ne pouvoient à pied n'à cheval suivre le camp. ”

“ Au sire de Montejean n'estoit point encores abbaissé le cueur et le desir qu'il avoit d'accroistre son honneur et gloire au faict des armes : si se mist encores en avant, et offrit de la tenir et garder en sorte que, tant qu'il fut en vie, jamais l'ennemy n'y mettroit le pied, moyennant qu'il eust autres cent hommes d'armes, outre les cent dont il avoit la charge, et gens de pied jusques à six mille, avecques l'artillerie et l'equippage y appartenant. ”

“ La descente se feit en trois divers lieux tout en un temps, pour tenir la force des ennemis separée : en un costé fut mandé le seigneur Pierre Strosse, pour descendre au dessus d'un petit fort où les ennemis avoyent quelque, artillerie , dont ils battoyent noz galleres par flanc : là dedans s'estoit retiré un nombre de gens de pied du païs, lesquels, ayans veu la hardiesse des nostres, abandonnèrent le fort, et se meirent en fuitte dedans un bois taillis, vers les parties mediterranes : noz gens à la poursuitte en tuerent quelques uns, et bruslerent les maisons circonvoisines. ”

“ Ledit comte luy remonstra les grandes forces qui venoient, avec le grand nombre d'artillerie , et qu'ils estoient envoyez là seulement pour les investir, attendant les forces ; l'asseurant bien que, s'il tardoit tant peu soit de parler, il ne seroit en sa puissance de luy sauver la vie, dont il le vouloit bien advertir, estant son amy. Les choses furent tellement menées, qu'il remist la place entre les mains du gouverneur de Turin, et furent conduits les Imperiaux seurement à Quiers. Ce faict, il fut pourveu à la place, à ce qu'il n'y advint plus d'inconvenient. ”

“ Estans arrivez devant Perpignan, ceux qui estoient ordonnez à ce faire, adviserent, chacun en son endroict, de l'approcher, mais la pleine estoit si rase et la terre si sablonneuse, qu'il estoit mal-aisé de faire trenchées qui valussent, car la terre s'en alloit à vau le vent, et amplissoit les gabions de sablon. Vous pouvez estimer quelle seureté on pouvoit avoir, mesmes que la ville estoit si bien pourveuë de plateformes garnies d'artillerie, qu'il sembloit d'un porc espy, qui de tous costez, estant courroussé, monstre ses poinctes. ”

“ Estant le jour venu, par ce que le payement des lansquenets estoit escheu, ils se mutinerent, et, venans au logis du seigneur de Humieres, par l'enhortement principal de Hans, Ludovic de Landeberg, luy declarerent que, si promptement ils n'estoient payez, ils estoient deliberez de
ployer leurs enseignes et se retirer : pour à quoy obvier, d'autant que nostre principalle force estoit de ceste nation, le seigneur de Humieres emprunta de toutes les bourses du camp, de sorte qu'il leur presta cinq cens escus pour enseigne, attendant leur payement; dont pour l'heure ils se contenterent. ”

“ Le seigneur de Boutieres, qui estoit gouverneur et lieutenant du Roy dedans Turin , s'estoit amusé la pluspart de la nuict à jouer au tablier : sortant de sa salle pour se retirer en sa chambre, ouit l'alarme; parquoy, ayant seulement avecques luy les Suisses de sa garde et quelque petit nombre de gentils hommes qui l'accompagnoient, sortit en la rue, où il trouva le peuple fuyant, qui lui dit : « Monsieur, sauvez vous , « les ennemis sont dedans.» ”

“ Par ce moyen, il fist, sans riens mettre en hazard, telle revenche de Brignolles, que le camp ennemy ne fut oncques un jour, ou sans alarme, ou.
sans nouvelle de quelque rencontre, et ne passa jamais jour que leurs gens et les nostres ne s'assemblassent, les uns contre les autres, en quelque lieu, mais tous les jours et sans aucun en excepter, au desavantage et perte de l'ennemy; et oncques ne fut aux Imperiaux possible de partir si secretement, ne si à heures et temps incertains, ne par chemins si estranges et divers, que du venir ou du retour ils ne feussent rencontrez des nostres. ”

“ Toutesfois, le prieur de Capoue, frere du seigneur Pierre Strosse, ne pouvant plus comporter ceste indignité, se confiant en l'agilité de sa gallere, commença à tourner sur un, lequel, ayant devancé les autres, tenoit presque une de noz galleres par pouppe; mais ce navire, pour estre plus court, tourna plus tost, et redressa son chemin devers son corps de bataille, et depuis, ne luy ny les autres se meirent à suyvre. ”

“ Du costé d'Italie, l'Empereur rendit seulement la ville de Montdevis, et le Roy luy rendit Albe, Queras, Antignan, Sainct Damian, Palezol, Cresentin, Verrue, Montcal, Rarges, Pont d'Esture, Lans Vignal et Sainct Salvadour, Sainct Germain et la plus part du païs des Langues et du marquisat de Seve, et aussi La Valpergue. ”

“ Ce jour mesme, monsieur d'Aumalle, fils aisné du duc de Guise, ayant faict entreprise pour attirer ceux d'Avennes hors de leur ville, quelques uns sortirent, mais ils n'abandonnèrent la faveur de leur artillerie ; monsieur d'Aumalle, esperant les irriter pour sortir plus avant, les chargea jusques sur le bord de leurs fossez, où ils perdirent beaucoup de leurs gens, et de sa part n'y mourut qu'un homme ; toutesfois ils ne s'esmeurent autrement ; et, combien que ledit sieur y fust demouré bien tard en intention de les provoquer d'avantage, si n'eust il moyen de les attraire ”

“ Ce-temps pendant, l'Empereur faisoit diligence d'approcher le chasteau de Ligny, pour y faire breche ; mais, par ce que les assiegez ne se pouvoient tenir à leurs deffences, d'autant que ledit chasteau est commandé de deux ou trois montagnes, la breche faicte, les assiegez furent conseillez de parlamenter, et, durant leur parlement, les ennemis entrerent dedans par la porte du Secours, et prindrent par derriere ceux qui estoient sur la breche pour attendre l'assault, et les firent prisonniers, sans faire grand meurdre. ”

“ Si toutesfois il estoit mis ordre à obvier que ledit seigneur roy de France ne mist ensemble les forces qu'il avoit levées audit païs d'Italie, ledit seigneur Empereur ne doubtoit point qu'il ne remportast de France une si grande et insigne victoire, qu'il asseuroit à perpétuité le repos et tranquilité d'Italie, attendu que autre quelconque ne la troubloit, sinon seulement ledit roy de France. ”

“ A l'heure qu'il avoit délibéré, il partit, ayant en sa compagnie les bandes du comte Guillaume, et mille ou douze cens soldats françois, de ceux qui estoient retournez de Piémont, et deux ou trois mille légionnaires de Dauphiné, par ce que le reste de l'armée, tant de pied que de cheval, n'estoit encores arrivé ; ce qu'il ne voulut attendre, craignant que, temporisant, l'ennemy eust plus grand moyen de se fortifier. ”

“ Journellement estoit le Roy adverty par noz gens qui estoient à la suitte dudit seigneur Empereur, et par espies et prisonniers, comme toutes choses se portoient au camp impérial; si est-ce que doubte, comme dit est, de donner occasion à l'ennemy de faire nouvelle entreprise, retenoit, et non sans cause, le Roy en souspeçon : si ne voulut il ce-pendant perdre le temps, ains donna charge de son camp à monseigneur le mareschal d'Aubigny ”

“ Si est-ce qu'il y fut ordonné ce qu'on veit le plus nécessaire, sçavoir est, une traverse de muraille de bout en bout de la ville, par dedans, pour couvrir ceux qui seroyent à la deffence, et dehors, un grand et profond fossé. ”

“ Desja commençoit le jour à poindre, et s'estoit mondict seigneur de Guise retiré avecques sa trouppe en lieu qu'il estoit hors du danger de l'ennemy, quand ses arquebusiers furent descouvers et furent monstrez ausdits comte de Nansau et du Reu, montans à la file sur la muraille; chose qui merveilleusement leur despleut, car ils ne sçavoyent pas bien quel nombre de gens ne quelle quantité de pouldres on pouvoit avoir mis dedans. ”

“ Ce-pendant , par faulte de payement, le seigneur de Montejean, qui estoit demouré lieutenant pour le Roy en Piémont, fut contrainct de permettre aux soldats de vivre à discrétion ou indiscrétion, et mangerent ce qui estoit demouré. A ceste occasion, le peuple mesme, desesperé de faim, n'avoit semé en ladite année; qui fut cause que la famine survint l'an 1538, telle qu'un sac de bled, à Turin, qui n'avoit accoustumé estre vendu qu'un escu, se vendit dix et douze escus, et s'il y avoit du bled au marché, il falloit y mettre garde, à ce que le peuple ne s'entretuast pour en avoir. ”

“ Là fut encores parlé de ceste entreprise, et déclara le sire de Montejean que pour ce jour il ne passeroit outre, car, au lendemain, il estoit deliberé d'aller donner quelque alarme aux ennemis, priant ledit de Bonneval qu'il luy prestast quelques gens des siens, pource que desja ils avoient cognoissance du païs; ce que finablement il luy accorda, voyant qu'il ne le pouvoit destourner de son opinion ; et luy laissa un homme d'armes et douze archers des siens, le recommandant à Dieu qui luy donnast grâce de bien faire ”

“ Ledict seigneur de Thais, partant de Ville-Destellon, où nous estions campez, s'en alla à Sainct Damian, place du Montferrat, laquelle n'avoit encores obey ny aux François ny aux Espagnols : toutesfois, se voiant sans esperance de secours, elle se rendit, par condition quelle demeureroit en ses anciennes franchises, et n'auroit garnison que de François, et point d'Italiens. Suyvant laquelle transaction, y laissa deux enseignes de gens de pied françois; puis, passant plus outre, print Montcallier par composition, qui est une place forte, au milieu du Montferrat. ”

“ Ledit mareschal, se trouvant en ce hazard, délibéra, par l'advis des capitaines, de passer outre , et les combattre, encores qu'il fust moindre de nombre de deux mille hommes; car, se retirant, il eust perdu son charroy et vivres. Ayant conclud le combat, marcha droit aux ennemis : le combat fut long et furieux, mais en fin les Anglois furent renversez, et se retirerent en un petit fort, lequel ils ne sceurent garder. ”

“ Mais le seigneur de Licque, lieutenant du duc d'Arscot, estant allé rebourser le chemin entre Dourlans et Sainct Paul, rencontra un messager qui estoit sorty de Sainct Paul, envoyé de la part d'un Italien que l'on nommoit messire Francisque, qui avoit charge dedans la place de conduire pionniers, et portant ledit messager lettres de son maistre à un gros personnage estant pres de la personne du Roy, par lesquelles il luy faisoit entendre la debilité de la place ; mais que, si l'ennemy leur donnoit temps de vingt jours, il esperoit que la place meriteroit bien faire recevoir honte à l'ennemy. ”

“ On peult bien dire que jamais si petit nombre de gendarmerie et de gens de pied ne soustint si grand faiz ny si furieux. Le marquis du Guast, voyant la ruine tournée sur ses Allemans, ausquels estoit son esperance, se meit à la guarite sans coup ferir.
Au mesme instant, le sieur de Dampierre, avecques les guidons, chargea les gens de cheval impériaux, conduits par le prince de Sulmonne, lesquels faisoient espaule aux Espagnols, et les rompit. Semblablement le bataillon des Espagnols et vieils Allemans vindrent combatre noz Gruiens et Italiens, desquels ils eurent bon marché ”

“ Leur fuitte fut soudaine et pleine d'éspouventement ; mais il advint une chose qui la leur creut encores grandement : car noz gens, qui s'estoient retirez parmy les arbustes et garrigues, chargèrent si furieusement sur les fuyans, qu'ils furent cause de les mettre en opinion qu'ils fussent avantcoureurs de l'avantgarde de nostre camp, lequel, sur les nouvelles du deslogement de l'Empereur, se fust aussi deslogé d'Avignon, en intention de présenter la bataille. ”

“ Parquoy noz gens coururent de toutes parts, sans trouver personne qui les contredist, et prindrent Poirin, Rive de Quiers, Villeneufve-d'Ast, Montafye, Antignan, et tous les petits forts jusques aux portes d'Ast, de Quieras, d'Albe et de Fossan; et par tous les petits forts meirent gens pour les garder, par - ce que tous les bleds du païs estoient retirez dedans lesdits forts : qui fut un grand soulagement pour envitailler nostre camp et noz places. ”

“ Aussi peu après, Guillaume de Roquendolfe, lieutenant general du Roy Ferdinand, fut deffaict devant Bude, où mourut vingt mille Allemans, par l'armée du Turc, et le Turc en personne marchoit. Quoy voyant, l'Empereur, cognoissant qu'estant en Allemagne, et voisin de ceste grande perte, ne luy seroit honorable de n'aller au devant de ces forces turquesques, parquoy, pour couvrir sa peur,, délibéra de faire l'entreprise d'Arger, ne la sentant si difficile que celle contre le Grand Turc. ”

“ Les capitaines, qui avoient mis des descouvreurs sur les champs,
eurent tantost advis que le capitaine Jacques de Scalenge approchoit avec le nombre (à ce qu'ils en avoient peu juger) environ de deux milles hommes, et bien autant de gens du païs amassez par les villages ; et pource, voyans que force leur estoit de venir au combat , se delibererent faire de nécessité vertu, et en toute diligence rassemblèrent et mirent leurs gens aux champs, bien rengez et serrez ensemble, ceux de cheval des deux costez sur les aisles ”

“ Cecy estoit advenu le jour precedant que lesdits seigneurs Colonne et Bonneval arrivassent à Grasse; lesquels, ayant trouvé, comme j'ay dit, la ville n'estre tenable, delibererent que l'un iroit vers le Roy en faire le raport, qui fut le seigneur Stephe Colonne, etledit Bonneval executeroit sa charge de faire le guast : lequel feit emporter et amener hors tout ce que porter et amener se pouvoit, au demourant mettre le feu, et rompre les murs de la ville par cinq ou six endroits, chacune breche de trente ou quarante pas. ”

“ Le seigneur Rincon congnoissoit bien qu'il y avoit grande apparence au propos dudit sieur de Langey, mais avoit crainte d'alterer l'opinion de Fregose ; ayant doute que, l'altérant et si mal en venoit, on luy pourroit reprocher, veu que Fregose l'avoit pris en sa conduitte, il consentit d'aller
par eau, aussi que c'estoit le plus aisé, non le plus seur. ”

“ Et le capitaine Achau, porteur de l'enseigne colonnelle, y receut trois ou quatre arquebouzades , tant dedans les bras que le corps, et fut renversé, l'enseigne au poing, dedans le fossé; duquel lieu ne pouvant partir, pour ses blesseures et pour le trait de l'arquebouzerie de ceux de la ville, se rengea, son enseigne au poing, contre la muraille, au costé de la breche, dont on ne le pouvoit desloger qu'à coups de pierre, par-ce que laditte ville n'estoit flansquée ; et y demeura jusques au matin, que noz gens se preparoient de faire nouvelle batterie, pour donner nouvel assault. ”

“ Environ quatre cens pas contenoit la longueur de la courtine, qui estoit baillée en garde, avecques ledit bastion, aux susdits du Bellay et Blerencourt ; et n'y -avoit en toute ceste longueur commencement de fossé ny de rempart, et n'avoit point la muraille plus de trois bons pieds d'espoisseur: de sorte que le nombre des pionniers qu'ils avoient estoit fort petit au regard de si grand ouvrage : toutesfois chacun y mettoit la main comme pour soy, et pour sauver sa vie et honneur, et acquerir réputation. ”

“ Le comte Dammartin gardoit la breche du costé de la porte Sainct Nicolas, le seigneur de Sainct Seval celle de la porte de Paris, et le sieur de Sercu avoit la charge de la breche d'au-dessous de Sainct Fourcy; et tellement feirent leur devoir, chacun en son endroict, que les ennemis furent repoussez et y perdirent jusques au nombre de quatre ou cinq cens hommes. De ceux de dedans y eut quelques blessez; mais n'y mourut autre de nom, que le commandeur d'Estrepaigny,
nommé de Humieres, auquel la teste fut emportée d'un coup de canon. ”