Aglatidas

“ Aglatidas surpris de cette action, fit faire ferme aux siens, & s’avança luy troisiesme, pour voir ce que c’estoit : & en mesme temps le Chef de ces pretendus ennemis s’avança seul au devant de luy la Javeline basse, & en action d’un homme qui cherche à parler, & qui ne veut pas combatre. Aglatidas voyant cela, fit arrester les deux qui le suivoient : & baissant aussi sa Javeline, il s’aprocha de celuy qui sembloit le chercher : & vit que c’estoit un homme de la meilleure mine du monde ; couvert des plus belles armes qu’il fust possible de voir ”

“ Jamais personne n’eust pû estre plus propre qu’Aglatidas, à consoler un malheureux : qui ne trouve rien de plus capable d’irriter sa douleur, que la joye qu’il voit sur le visage de ceux qui l’approchent. Un soir donc que cét illustre melancolique, estoit aupres d’Artamene : & qu’apres avoir long temps parlé de l’inconstrance de la Fortune, & de toutes les miseres de la vie, ils eurent observé l’un & l’autre un assez long silence : Aglatidas qui voulut luy donner quelque legere consolation, & qui ne sçavoit rien de son amour, commença de luy parler de cette sorte. ”

“ Car si elle voyoit des Amis d’Aglatidas, son ame estoit à la gehenne : si c’estoient des gens indifferents, ils luy donnoient quelque attaque de la pretenduë jalousie d’Otane qui ne luy plaisoit pas : ou s’ils estoient plus discrets, ils l’entretenoient du moins de choses si opposées à son humeur presente, qu’ils l’ennuyoient infiniment. Si on loüoit quelque honneste homme, l’image d’Aglatidas luy aparoissoit : si on blasmoit quelqu’un, le souvenir d’Otane luy faisoit baisser les yeux de confusion : & il n’estoit point de conversation ou elle ne trouvast quelque chose de fâcheux. ”

“ Mais, Seigneur, Aglatidas fut si respectueux envers Amestris, que quoy que les visites de Megabise luy donnassent une douleur bien sensible, il se resolut de ne luy en parler jamais : neantmoins quoy qu’il pust faire, ses yeux trahirent le secret de son cœur, & luy descouvrirent une partie de l’inquiétude qu’il en avoit. Mais comme elle s’estoit resoluë de vivre avecques luy avec une confiance entiere, elle luy en fit un jour la guerre chez Menaste d’une maniere si obligeante ; qu’elle adoucit du moins le mal qu’il souffroit, si elle ne le guerit pas. ”

“ Si bien que la quittant à l’heure mesme, je fus trouver le Roy, & connoissant sa bonté pour Aglatidas, je ne fis pas de difficulté de luy dire, apres luy avoir apris qu’Otane vivoit, & qu’il n’estoit qu’à une journée de luy ; qu’en punissant un criminel de leze Majesté, il sauveroit peut-estre la vie à la personne du monde qu’Aglatidas aimoit le plus, & qui meritoit aussi le plus d’estre estimée & protegée. ”

“ Et vous croiriez apres cela, malgré toute la subtilité de vostre esprit, que je ne me tiendray pas plus outragée de vous, de sçavoir que vous ne m’avez jamais aimée, que s’il estoit vray que vous ne m’eussiez quittée que par inconstance ! Ha Aglatidas, que vous vous estes trompé si vous l’avez creu ! Il est des inconstants, adjousta-t’elle, dont le souvenir est cher, & à qui on seroit bien aise de pardonner : mais à un fourbe ; mais à un homme qui nous trompe ; il n’est point de vengeance si violente qui ne soit trop douce pour le punir. ”

“ C’est trop, Madame, c’est trop, interrompit Aglatidas, je ne sçaurois vous obeïr, si vous ne m’aprenez à vous oublier, & à ne vous aimer plus. Au contraire, dit-elle, je suis si fort persuadée de l’innocence de vos sentimens, que je ne fais pas de scrupule de desirer que vous m’aimiez jusques à la mort. Cependant Aglatidas, souffrez que je m’en aille : car quand je songe que toute la Ville croit que vous avez tué Otane, & que je vous voy à mes pieds, j’en rougis de confusion ”

“ Mais à peine Aglatidas & moy eusmes nous veu cette Espée, que nous la reconnusmes effectivement pour estre à luy. Aglatidas regarda alors fixement Dinocrate : & ne sçachant que dire pour se justifier, il cherchoit à connoistre dans ses yeux s’il estoit innocent ou coupable : mais il se déguisoit si finement, qu’il estoit impossible de s’aperçevoir de sa malice. ”

“ Non Menaste, luy dit elle, ce que vous me proposez ne seroit pas juste : & ce seroit me vanger sur moy mesme, & ne me vanger pas d’Aglatidas. Car enfin Megabise est assez bien fait, pour faire croire à Aglatidas que je l’aurois aimé : ainsi il acheveroit de se guerir de sa passion, s’il est vray qu’il en ait eu pour moy, & demeureroit en paix avec sa chere Anatise. Ouy, il auroit lieu de croire, que j’aurois aimé un homme, qui en effet est digne de l’estre : mais lors qu’il verra que j’auray choisi pour mary, un homme qu’il sçait de certitude, que je ne sçaurois jamais aimer ”

“ Il en faut toutesfois excepter Anatise, Tharpis, Megabise, & Artemon : car encore que ce soit une chose assez naturelle à un Amant, de ne s’affliger pas de la mort de celuy qui possede sa Maistresse : neantmoins comme ces trois Rivaux sçavoient de certitude, qu’Aglatidas seroit infailliblement choisi à leur préjudice, puis qu’il ne pouvoit plus y avoir d’obstacle à son bon-heur ; ils eussent encore mieux aimé qu’Amestris fust demeurée femme d’Otane, que de la devenir d’Aglatidas. ”

“ Mais pendant cela, il fut aisé à Aglatidas de remarquer, que la joye & l’agitation de l’esprit d’Artamene, avoient une cause plus puissante, que la simple compassion. Il regardoit ce Billet, comme craignant de s’estre trompé : il levoit les yeux au Ciel, comme pour luy rendre grace d’un si grand bonheur : il marchoit sans regarder Aglatidas, & sans luy parler : puis revenant tout d’un coup à luy, & craignant d’en avoir trop fait : Si vous sçaviez, luy dit il, quel est le merite de la Princesse Mandane, vous Vous estonneriez moins de l’excés de ma joye. ”

“ Je m’estimerois bien glorieuse, luy respondit-elle, si je pouvois croire que ce fust à ma consideration, que vous vous fussiez redonné à vos Amis : mais il y a bien plus d’aparence, que les persuasions, de Megabise & d’Aglatidas, ont enfin eu ce pouvoir sur vous : que de croire que j’y aye contribué quelque chose. Megabise & Aglatidas, reprit-il, n’ont pas tant de pouvoir sur moy que la belle Amestris : vous estes donc fort injuste, respondit elle ; car selon mon sens, ils ont bien plus de droit d’y en pretendre qu’Amestris : qui n’en veut avoir sur personne que sur elle mesme. ”

“ Je n’aime peut-estre plus Amestris, luy repliquay-je, mais je haï tout le reste du Monde à la reserve d’Artabane. Et pourquoy le haïssez vous ? me respondit-il ; que vous ont fait tant d’honnestes gens qui vous recherchent & qui vous estiment ? Que vous ont fait tant de belles & aimables personnes qui sont à Ecbatane ? & que vous a fait enfin toute la Nature, pour faire que vous la haïssiez ? Non non, adjousta-t’il, Aglatidas, ne vous y trompez point : vous aimez encore Amestris : & vous l’aimez autant, que vous haïssez tout le reste de la Terre. ”

“ De sorte qu’en cét endroit Menaste cessant de me parler, & se meslant dans leur conversation ; en verité, dit-elle à Amestris, je ne vous comprens pas : car enfin n’est-il pas vray que dans le fond de vostre cœur, vous avez dessein d’espouser Aglatidas ? Que voulez vous donc attendre ? voulez vous qu’il se batte encore deux ou trois fois pour vous ; qu’il tuë encore quelqu’un, qu’il s’en aille en exil ; qu’il revienne deguisé ; qu’il vous retrouve dans quelque jardin avec quelqu’un de vos Amants que vous voudrez bannir ; qu’il devienne jaloux ; qu’il feigne de nouveau d’aimer Anatise ”

“ Tout le monde se taisoit afin qu’il s’ennuyait, mais cela ne servoit à rien : car quoy que l’on pûst dire ou ne dire pas, il estoit tousjours là, & ne s’en alloit qu’avecques les autres, & mesme apres les autres. Ainsi ce n’estoit plus que quelques fois chez Menaste, qu’Aglatidas pouvoit parler un moment en particulier à Amestris : encore estoit-ce rarement qu’il se rencontroit qu’il n’y eust personne que nous. Aglatidas avoit pourtant une telle certitude d’estre aimé d’Amestris, quoy qu’elle ne luy en donnast que de simples assurances ”

“ Cependant durant qu’Aglatidas & Amestris estoient si malheureux, Anatise & Tharpis se resjouissoient de leurs infortunes : Megabise & Artemon en estoient aussi bien aises ; & afin de porter la finesse aussi loing qu’elle pouvoit aller, Anatise fit dire à Amestris par une voye fort destournée, qu’on la loüoit infiniment de la resolution qu’elle sembloit prendre de n’espouser point Aglatidas, & mesme de ne le voir plus : de sorte que cette belle Personne parla si déterminément à Menaste, qu’elle n’espera plus du tout de la pouvoir jamais vaincre. ”

“ Il fut donc resolu qu’Aglatidas partiroit dés le lendemain, pour s’en aller à Ecbatane : qu’il meneroit Artabane aveques luy : & qu’il assureroit aux Peuples de Medie, que Ciaxare s’en retourneroit bientost. Au sortir du Conseil, Cyrus envoya querir Aglatidas, pour luy dire cette bonne nouvelle : qu’il reçeut sans doute avec autant de joye, que Megabise en eut de douleur. Il remercia Cyrus avec des paroles si propres à exprimer sa reconnoissance : qu’il estoit aisé de voir, que la passion qui le possedoit n’estoit pas petite. ”

“ Andramias & Aglatidas apres avoir escouté cét homme, ne douterent presque point non plus que luy, que la Princesse ne fust en vie : mais pour s’en esclaircir mieux, Aglatidas dit à son Parent, que comme Artamene estoit depuis si longtemps à la Cour de Capadoce, il jugeoit qu’il estoit impossible qu’il ne connust pas l’écriture de Mandane : qu’ainsi il faloit luy faire voir ce qu’Ortalque avoit aporté : afin de n’aller pas legerement donner une fausse joye au Roy. ”

“ Pour Artemon, comme il estoit plus sage, quelque amoureux qu’il fust d’Amestris, voyant de quelle façon elle luy avoit parlé d’Aglatidas, & de quelle sorte elle vivoit avecques luy, il n’osoit plus l’entretenir de son amour. Neantmoins comme l’esperance ne quitte les Amants qu’à l’extremité, il voulut auparavant que de faire un grand effort sur luy mesme pour arracher de son cœur l’image d’Amestris, s’esclaircir encore un peu plus precisément de l’estat où estoit Aglatidas avec cette belle Personne. ”

“ Preparez-vous donc à estre puny de vostre crime, & mesme par Amestris ; qui ne vous donnera peut estre guere moins de jalousie qu’à Otane : car enfin Aglatidas, vous n’estes pas seul qui avez des yeux ; d’autres la trouvent belle aussi bien que vous : & apres le choix qu’elle avoit fait d’Otrane, je tiens peu d’Amans en seureté dans son cœur, quelques honnestes gens qu’ils puissent estre. ”

“ Il faut aimer, pour cesser d’aimer : & la haine qui succede à l’amour, n’est pour l’ordinaire qu’une amour déguisée, sous les apparences de la colere : & qui est plus redoutable & plus dangereuse, que si elle paroissoit avec les marques qui luy sont naturelles. Enfin Aglatidas, me dit-il, il faut se guerir d’une passion par une autre passion : & pour n’aimer plus Amestris, il faut aimer une autre beauté. Helas, luy repliquay-je alors, qu’il est aisé à Artabane, de donner un semblable conseil, & qu’il est difficile à Aglatidas de le suivre ! ”

“ Cependant Megabise qui devoit aussi en estre bien aise par la mesme raison, s’en affligea : parce qu’il creut qu’Aglatidas pourroit peut-estre enfin estre heureux. De sorte que luy qui pensoit n’aimer plus Amestris, s’aperçeut qu’il l’aimoit encore, par le renouvellement de la haine secrette qu’il eut en cét instant pour Aglatidas. Il n’osa pourtant la tesmoigner : car Cyrus l’aimoit si tendrement, que ç’eust esté un crime capital, que d’estre son ennemy declaré. Cependant Thrasibule estoit aupres de Tisandre, que les Chirurgiens, apres avoir levé le premier appareil, trouverent un peu mieux ”

“ Aglatidas, luy respondit il, est digne de l’amitié de tout ce qu’il y a de Grand au monde : & c’est ce qui me fait esperer, que les Dieux feront un jour finir ses malheurs. Quand j’aurois quelques bonnes qualitez, reprit il, ce que vous dites ne me donneroit pas grand espoir : & tant qu’Artamene sera malheureux, je ne voy pas que les personnes qui ont de la vertu, doivent fonder leur esperance sur cette raison, qui n’est pas tousjours infaillible. C’estoit de cette sorte qu’Artamene & Aglatidas s’entretenoient, lors qu’Andramias les advertit qu’il estoit temps de se retirer. ”

“ Anatise comme les autres fut aussi visiter Amestris avec d’autres Dames : & comme il y a tousjours dans le monde des gens indiscrets, & qui prennent autant de plaisir à dire des choses fâcheuses, que d’autres en ont à en dire d’agreables : il y eut un homme, qui voulant embarrasser ces deux personnes, commença de parler devant elles d’Aglatidas & de son absence : demandant tout haut si quelqu’un en sçavoit la cause. ”

“ Croyez vous Aglatidas, me dit elle, que ce soit avoir fait peu de chose pour vous, que d’estre venuë dans ce Jardin, que de souffrir que vous me parliez en particulier ; & que d’endurer que vous m’entreteniez d’une passion, qui quelque legitime qu’elle puisse estre, ne laisse pas d’avoir quelque chose de dangereux, quand elle est trop forte ; & qui apres tout, ne peut-estre soufferte par une fille, sans faire beaucoup de violence à sa modestie, si elle est effectivement raisonnable ? ”

“ Pendant qu’Amestris & Menaste parloient de cette sorte, je n’estois pas peu occupé à consoler Aglatidas : qui ne pouvoit assez s’estonner de voir par quelle voye la Fortune traversoit son bon heur. Car disoit il, comment puis-je me justifier, puis qu’il est certain que je ne puis moy-mesme assurer si ce que Dinocrate dit est vray ou faux ? le sçay bien sans doute que je n’ay point connu la voix d’Otane, & que je l’entendis nommer assez loing de moy : mais apres tout, je sçay que l’Espée que l’on me montre m’apartient ”