Michel de L'Hospital

“ La liberté brutale du corps, & des actions humaines, est vile, & indigne de cette exellente marque, qui est proprement deuë à l’esprit, & à la plus digne partie d’iceluy, & à la plus excellente de toutes ses actions, cest à sçauoir, à la pieté. ”

“ Si on combat contre l’orage & contre le ciel, sera-ce pas se precipiter aueuglément, & chercher éperduëment la mort ? Le sage enfant ne s’endurcit point contre le courroux de son pere, mais s’humilie & l’appaise : & tantost apres le pere le couronne de sa benediction, & de son heritage. Aussi Dieu nostre Pere, ayãt d’une main visité notre Roy, de l’autre l’éleuera plus haut que iamais, & le couronnera de graces nouuelles, & de biens non esperés. ”

“ Telles gens sont de mauuais augure à cette couronne, & semblent vouloir auancer le destin d’icelle, c’est à dire le iugement de Dieu, qui humilie souuent les choses éleuees, & aneantit souuent les plus grandes & plus fermes, liant les esprits & abrutissant les entendemens & les discours des plus sages. ”

“ Certes cest embrasement est si ardent & vniuersel par tout ce Royaume, que la longueur est l’entiere ruyne, subuersion, & aneantissement d’iceluy : voire (quand mesme on estancheroit ce mal des auiourd’huy,) il se trouueroit merueilleusement apauuri par les degasts extremes, pernicieux ruinements, demolitions, larrecins, pillages, & autres choses semblables, qui ia ont esté commises, & qui ne sont que coups d’essay, au regard de ce qui est à craindre : c’est à sçauoir, que sans espoir de paix les cœurs s’embrasent d’auantage en fureur, car ce n’est que le premier acte de la Tragedie. ”

“ Quelqu’vn dira soudain que ce n’est point liberté, ains vne licence pernicieuse. Mais il y a ia longtemps que le Conseil du Roy a congnu & iugé que c’estoit liberté, & qu’il estoit necessaire de laisser en paix les esprits de ses sugets, apres auoir longuement éprouué qu’ils ne pourroyẽt estre pleyés, ne par le fer, ne par la flãme, ains seulement par la viue persuasion, & par la raison qui domine sur les hommes. Ce qui n’a point esté fait sans exemple, mesmes du plus grand Empereur, qui ayt esté il y a trois cents ans. ”

“ Dieu ne me face tant viure, que ie voye cette desolation. Mais s’il est licite de preuoir les inconueniens, ie puis hardiment asseurer que la perte d’vne bataille feroit (ce que i’abomine) la perte de l’Estat. Car (quelque doux langage que les autres tiennent maintenant) ie ne sçay à quoy l’insolence d’vne victoire pousseroit ceux, qui mesmes en leurs miseres sont si éleués, & remplis de courage : & pour ne flatter point, c’est chose que mal volõtiers & mal-aisement, on fait de se rassugetir à celuy qu’on a vaincu. ”

“ De les deffaire tous, cela ne peut estre sinon par vne longueur extréme : qui remplira ce Royaume de feu, de sang, de cruauté, de ruyne, de deformité, de peste, de famine, de pauureté, de solitude, de voleurs, de brigands, & d’estrangers, qui occuperont le nid vuide. La pauure Champagne nous serue d’exemple, qui est déchiree si miserablement qu’à veüe d’œil, il faut que les habitans meurent de male faim, & de rage. ”

“ Donques la longueur de la guerre, ne peut que remplir de rauage & de massacres cette France, la rendre farouche & sauuage, sans pieté, sans reuerence, ne respect aucun, & accroistre, irriter & appesantir de plus en plus l’ire de Dieu sur icelle. Mais si au rebours ils gaignoyent la bataille il en iroit bien autrement. Car la perdant, ils ne sont point en danger d’estre abandonnés de leurs associés : d’autant que la cause leur est cõmune, le fruict, l’issue, & le peril commun, & en vn mot, ils sont tous embarqués. ”

“ Mais sa Maiesté ne leur donne par ce traicté, ny estat, ny terres, ny ne les allege d’aucũs tributs ou subsides, ny ne leur quite aucuns deuoirs, ou charges : il laisse seulement leur conscience en liberté. Cela s’appele-il capituler, de promettre pour toute conuention, que le Roy demeurera leur Prince, & ils demeureront ses sugets ? Si le Roy leur ostoit la liberté, ils seroyent ses esclaues, & non pas ses sugets. Il seroit leur oppresseur, & non pas leur Prince. Car la principauté est sur les hommes libres. ”

“ C’est à sçauoir, que la tuition de la vie & de la liberté cõtre l’oppression, est non seulement licite, ains aussi, iuste, equitable & saincte. Cette loy n’est point donnee, ou enseignee aux hommes, mais est empreinte en leur cœur, & nee auec eux. ”

“ D’auantage, si ceux qui sont auiourd’huy en armes, apres vne bataille se voyẽt inferieurs à force ouuerte, il ne faut douter qu’à l’extrémité leur fureur ne soit extréme, & qu’ils ne tẽtent tous moyens, bons & sinistres, pour se garentir : & Dieu sçait s’il est mal-aisé (veu le bigarremẽt & le meslinge qui est entre nous, & les phantastiques persuasions dont les hommes se laissent enyurer & transporter) d’exploiter vn mauuais dessein. Le mal & la fureur a ses degrés, comme la vertu. ”

“ Qui monstre qu’ils seruẽt plustost à leur ambition & auarice que non pas au Roy : & est la frenesie des hommes si aueuglee, que iusques aux plus chetifs qui portent les armes dedans vn poullailler, chascun se vante d’auoir maintenu la couronne au Roy, & (ce que plus ie trouue estrange) certaines Cours & autres compagnies (où les hommes deuroyent estre plus moderés & mieux aduisés) ne rougissent nõ plus que l’autrefois, d’vsurper les plus magnifiques titres, qu’ils peuuent imaginer, ne pouuans celer la maladie de leur esprit. ”

“ Si quelque boutefeu enuenimé, veut estriuer sur le mot de Capitulation & de Paix, ie maintien que c’est signe de victoire de demeurer Seigneurs, & dõner Loy à ceux, contre lesquels on a combatu. Cette victoire non sanglante sera de plus grand prix & proffit, & plus glorieuse à sa Maiesté, que mille autres victoires : desquelles le Roy n’auroit ny honneur, ny grace, ains seulemẽt les Capitaines & gens de guerre, qui s’amplifieroyent à son detriment, luy soustrayans la deuotion de ses sugets, & l’honneur de la deffense de l’Estat. ”

“ Car donner la loy a ses sugets, leur prescrire vne forme de viure, leur imposer peine & supplice, s’ils outrepassent sa volonté, les desarmer, leuer tribut sur eux, & receuoir d’eux l’hommage, est-ce capituler auec eux ? Capituler, est démesler la dispute du droit d’vn chascun par egal respect, & prẽdre & donner la Loy tout ensemble, baillant gage à chascun de son costé, ou par ostage ou par autre asseurance. Mais quãd vn seul reçoit la loy, & vn seul la donne, qu’est-ce autre chose que le fruict de la victoire ? ”

“ Nous ne liurerõs iamais la bataille qu’à si bõnes enseignes, que le Roy tiendra la victoire au poing, ou par le colet. Certes les hommes discourent, & batissent leurs progrés, mais Dieu besongne par dessus. Il seroit superflu d’amener des exemples en vne chose si claire : c’est que la moindre faute, & la plus legere occasion peut faire perdre vne bataille : de sorte que les Anciens, pour signifier la bataille, disoyẽt : Le hasard & la puissance de fortune, combien qu’ils fussent merueilleusement bien disciplinés. ”

“ Le vray moyen donc de les raquoiser & rompre leurs intelligences, est de leur oster la necessité, d’y entendre & y entrer plus auãt, les traitant, non pas durement comme ennemis, mais benignement comme enfans, sugets iustitiables, membres de la Republique, & comme partie du corps, dont le Roy est le chef. Car en examinant les choses de près, on trouuera, qu’ils ont esté cy deuant traités en rebelles. Ce qui leur a faict chercher tous moyens & remuer toutes pierres pour se conseruer. ”

“ À la uerité nous sommes bien malades : puisque ny la guerre ny la paix ne nous est propre, & que nous ne pouuons porter ny le mal ny le remede.
Plusieurs penseront que, puisque le Roy est ordonné pour rendre iustice, maintenir les bons & punir les mauuais, & qu’à cette fin il est armé de l’autorité souueraine, il ne peut faillir suyuant sa vocation de poursuyure iustement par le glaiue, ceux qui iniustemẽt se sont sousleués, troublans l’Estat & violans les loix, & en ce faisant il obeïra à Dieu, qui est le Seigneur des armees, & qui ne peut faillir à la iustice. ”

“ Rien n’est plus loüable à vn sage Prince, congnoissant q̃ les dissensiõs & fureurs ciuiles sont les maladies des grãs estats, que d’y appliquer par sa prudence, le remede conuenable, & si dextrement manier les esprits, qu’il guerisse les playes maintenant ensemblement ses sugets, & sa Seigneurie. Nos Roys predecesseurs de sa Maiesté, ont conserué & agrandy cest Estat, autant ou plus par prudence, que par armes. La vraye & naturelle prudẽce, est de ceder quelquefois au temps, & tousiours à la necessité. ”

“ Elle n’est point escrite, mais diuinement engrauee en l’esprit de toutes creatures humaines. C’est la cause de leurs menees : qui ont esté depuis tournees, contre leurs premiers desseins, en hostilité, & qui meritẽt d’estre reprimees, les considerant à part : mais les conferant auec le salut du Royaume, la conseruation de l’Estat, le repos du peuple & la fin de ce perilleux embrasement, qui est ce qui sera tãt ennemy du Roy & de son Royaume, qu’il luy dissuade quitter son offence pour la Republique ? ”

“ Ainsi comme les estançons mis contre la paroy ruineuse & panchante, en luy resistant, la soutiennent & sortifient, ainsi ont ils fait par leurs aueugles efforts & discours. Ils deuoyent plustost leur soustraire, peu à peu, les estayes de leur puissance, & apprendre de la nature, qu’il est plus aisé de pleyer que de rompre. ”

“ Les Chefs que tant on redoute, n’ont point ou peu de source : & les ruisseaux, qui les enflent, sont aisés à diuertir, pource que ce n’est pas leur droit & naturel cours : ains est par vn accident estrange, qu’ils ont incliné à ce parti, c’est à sçauoir, pour se conseruer de violence & d’oppression. ”

“ Et ie ne sçay s’il y a homme si parfait, qui, se voyant reduit à la derniere anchre, & voyant quelque moyen de se preseruer, ne l’embraçast viuement : estant la defense & la conseruation de soy vne loy inuiolable de nature, plus forte que toutes autres loix. ”

“ Qui est cause, qu’ils ne se laissent point pratiquer, s’endurcissans tousiours plus fort : iaçoit qu’aux autres guerres ciuiles, ce seroit le plus exquis & ordinaire moyen de les distraire. Leurs ennemis aussi ne sauroyent croistre : mais au contraire, le Roy a plusieurs alliés & seruiteurs, qui lui tourneroyent le dos, si mal bastoit, c’est à sçauoir tous ceux qui ne suyuent son party sinon comme du plus fort, & redoutans sa puissance. ”

“ Le Bourguignon est en petit nombre, & l’Allemant à bõ droict nous est suspect, tant pour la diuersité de sa religion à celle du Roy, ou conforme & affine auec celle des aduersaires, que pource qu’ils sçauent qu’il y a à butiner sur nous : dont ils sont friands. ”

“ Car les menees, qu’on batissoit contre eux de toutes pars, estoyent si peu secretement conduites, la defaueur tant euidente, le desdaing si apparent, les menaces de la rompure de l’Edict de pacification, de la publication du Concile, & autres semblables, tant ouuertes, & l’iniustice tant manifeste, qu’ils eussent esté par trop lourds & stupides, s’ils n’en eussent esté à bon escient touchés & esmeuz : & eussent bien merité le traitement qu’on leur apprestoit, s’ils n’eussent de tout leur pouuoir & entendement euité le reste. ”

“ La necessité, & le desespoir, les rend dociles & disciplinables à merueilles : auec la bonne opinion, qu’ils ont conceuë de leurs Chefs, desquels l’ambitiõ est retenuë, & l’union estroictement conseruee par la mesme necessité, que les Anciens ont appelee le Lien de concorde. ”

“ Vray est qu’il faut retrãcher le mẽbre pourri, quand il n’y a plus d’esperance de guerison : mais tandis qu’il y a, tant soit peu de lumière d’amendement, le Medecin seroit meurtrier, si laissant les remedes propres, il vsoit des extrémes. Il faut donc premierement enquerir si le mal des sugets du Roy est incurable, pour vser des remedes selon le besoin : autrement ce seroit comme qui enterreroit vif son enfant malade, sans essayer le moyen de le guerir. Entre tous ceux qui sont en armes de l’autre costé, pas vn ne tend à escourre le ioug de la domination du Roy. ”

“ Plusieurs s’en sont ia débandés : & tous en general sont lassés & ennuyés du trait de temps qu’ils ont estés inutilement en campagne : dont iusques au bas peuple chacun murmure, entrant en mécontentement, soupçons & imaginatiõs estranges, selon les hummeurs d’vn chacun : & l’infelicité du temps en fornit la matière, ioinct que l’inquietude & patience est naturelle à cette nation : si elle n’est viuement reprimee par telles barres que nous auons dit retenir les autres. ”

“ Ne trouuons doncques pas estrange, si les hommes les preuoyent, & se munissent à l’encontre. Noz menaces ont esté les messagers de nos complots, ainsi que l’esclair est du tonnerre : nous leur auons fait voir & toucher nos apprests. ”

“ Aux autres ne faut monstrer aucun signe, ny faire demonstration quelconque, de deffiance. Car ce n’est autre chose qu’allumer & nourrir vne contraire deffiance, en leurs cœurs, & les faire ennemis maugré qu’ils en ayent. Celuy est nostre ennemy, que nous tenons pour nostre ennemy. ”

“ Il ne faut douter que la pluspart ne se retire, & que l’estranger ne refuse de combatre si le Frãçois ne luy fait le chemin, & ouure la meslee : de sorte que le Roy ne peut estre que mal seruy. La force de l’estrãger est auiourd’huy vne fresle asseurance. Le païs leur est incogneu, qui n’est pas petit desauantage. Le Suisse ne vaut rien qu’à se défendre. ”

“ Quant aux Seigneurs, il leur est biẽ aduis qu’on leur doit beaucoup de retour, & que sans eux tout se fut mal-porté. Ce qu’ils font sonner, & retẽtir si haut que ceux qui entendent combien cela poise, en ont le cœur nauré, & plein de mauuais augure. ”

“ Touchant la caption elle est toute apparente, & l’aduis dessusdit totalement repugnant à la iustice, à Dieu, auteur d’icelle & à l’autorité & deuoir du Roy. Car tout ainsi que la medecine tend à la guerison, ainsi fait la iustice à la gloire de Dieu, & à l’amendemẽt des hommes, & non pas à la cruauté & au sang, à l’iniure, ou à contraindre nature & violer & peruertir l’humanité. ”