Marie de Gournay

“ Et le mal est, que depuis qu’vn Ioyeux s’aduise mesmement à la Cour, de faire vne piece de risée, pour impertinente qu’elle soit, ce n’est pas merueille si cinq cens testes de ce Climat, qui croyent qu’il y a de la suffisance à draper, suiuent sa piste : ces gens-là n’estans pas d’ailleurs, si fins communément, qu’ils puissent discerner s’il les meine par le nez ou non, soit pour quelque sien interest, ou pour faire parler de luy. Nous adiousterons vn traict de Xenophon apres celuy des Essais. ”

“ Les arbres ne veulent pas estre comtez pour rien en cét endroict : arbrisseau, sauuageon, aulneau, chesneau, fresneau, charmeau, ormeau, coudreau. D’autre part il est vray, que la façon d’vne fleur rapportant au bassin caue, l’a faict nommer baßinet, & que la beauté d’vne herbe est cause qu’on l’a baptisée du nom d’amourettes : de mesme que la saison de Pasques où croist vne autre fleur, la fait nommer pasquerette : & le preau qui la porte est diminutif de pré : de plus, on cognoist la febuelotte aussi communément que la febue. ”

“ Personnage veritablement à qui la qualité, l’esprit, les Lettres, & l’habitude des Cours, prestoient autant de moyen de practiquer les Loix de la bien-sceance, & de cognoistre & parler la Langue pertinemment, que ces gens en peuuent auoir. Que s’il est plus hardy que moy en debittant cette marchandise ; se faut-il estonner qu’il ait plus d’asseurance qu’vne femme sur le papier, puis qu’il en auoit aux combats, plus que n’en ont communément les hommes ? Les voicy au mesme ordre qu’il les presante par colomnes, selon la coustume des Dictionnaires : pource qu’ils font part du sien des Rymes. ”

“ Cela n’est-ce pas se mocquer ? n’est-ce pas fouler aux pieds la pudeur publique, la Nature, & desaduoüer nostre Estre en quelque sorte ; puisque la vie n’est pas plus naturelle à l’homme que la parolle, portée aussi loin que la dexterité, la grace & le besoin du parlant se peuuent estendre ? ”

“ Toutesfois quand ce reproche seroit aussi vray qu’il est faux, & si faux que ie les ay peu faire ouyr de la bouche d’vn Prince mesme bien parlant, outre que ie les ay leus, & feray voir frequemment si l’on veut en des Liures Imprimez depuis deux & trois années, & nottez, Liures du mestier exprés de parler des temps, c’est à dire, d’Astrologie ; ie croirois commettre vne sottise, d’auoir honte qu’on me reputast mere de l’vn & de l’autre ; & de cent apres, s’ils auoient vn semblable rapport que ces deux cy à la cadence de tant d’autres, ausquels nostre Langue applique le neuf de la diminution. ”

“ Ce seroit peu d’aduertir cette espece de monde, qu’ils ne voyent goutte à telle ou telle chose dont ils le meslent de discourir, si l’on ne leur faisoit comprendre en suitte ; que quiconque parle de ce qu’il n’entend pas, n’entend rien hors de là. ”

“ Quiquonque se gouuerne par la sottise de son voisin, estoit digne de naistre plus sot que luy : c’est pourquoy ie m’en abstiendray si ie puis. Sans doute aussi, ie n’aurois pas moins bonne grace en vne restriction si bien fondée, que ces douïllettes, qui n’osent manger, de peur d’effacer le rouge d’Espagne qui farde leurs tendres lévres. Eh quoy ! lors que les Essais nous content des nouuelles de la garderobe & du bassin de leur Autheur, cela est-il plus delicat qu’vne traisnée de Diminutifs ? ”

“ Dit-on pas encores, ce vin est verdelet, cette iouë vermeillette : ce garçon est ioliet est propret, est foiblet, est doucet, est bellot : cette fille de mesme, est bellotte, &c. ce visage est longuet ou rondelet : ce musequin est ioly, ce bouïllon ou ce temps est froidelet, est chaudelet ? Or ces deux-cy de fortune ont esté des plus drapez, ainsi que i’ay sceu, par cette suffisance nouuelle, comme inuentez par moy. ”

“ Nostre Musique n’oseroit-elle quitter le hault ton par fois ? Nous faudra-t’il attisser encores les pieds d’vne Dame d’vne moisson de perles, d’une ondée de frisons, & des fleurs exquises du blanc & du vermillon d’Espagne ; pource que nous en ajoliuons sa teste & son visage ? ou ses pieds auront-ils meilleure grace auec de tels attours, que dans vne simple paire de patins ? Les Liures comme les Dames ont des pieds : c’est à dire des parties qui ne sont faictes que pour assister les autres : mon Traicté des Diminutifs est de ce genre. ”

“ Quiconque n’ose faire vne demarche de soy-mesme, retombe en l’enfantillage de son maillot, affin de meriter, qu’on luy recoiffe le beguin. Et nous dirons plus, puisque ce lieu le permet ; que par tout où l’vsage n’est point dirrectement contre l’Analogie (comme il est particulierement en aucuns de nos verbes, qu’il a charpantez à la poste) il est pour elle : & qu’elle doibt, non pas le suyure ou luy ceder, mais l’amplifier hardiment, lors qu’elle ne trouue rien qui s’y oppose, que l’inaccoustumance & la timidité d’innouer, quand l’innouation est vtile. ”

“ Les autres m’ont drapée de ce que mon loisir s’amusoit à si peu de cas : appellans peu de cas pour l’homme, si de telles sottises meritent response, la cognoissance des choses dont il vse tous les iours, & par lesquelles il montre la differance d’entre luy & les bestes, & d’entre luy-mesme & ses compagnons, ainsi nommé-ie, le langage & ses circonstances. ”

“ Les gens d’importance, tels qu’il estoit, ne sont pas obligez de demeurer tousiours bandez sur les discours serieux, ou sur les grandes affaires : mais tandis que les autres personnes se vont relascher de leurs occupations à diuers ieux, de cartes, detz, dances & autres de cét air, ceux-cy se relaschent volontiers auec les Muses, comme en ce lieu. ”

“ Car si c’est folie, comme ce l’est infailliblement, de pretendre corriger toutes les folies du monde, combien plus l’est-ce, d’aspirer à corriger les sagesses ; & tout ce qui est authorisé d’vsage, vtile à quelque chose, & nuisible à rien, s’appelle iustement de ce nom. Ie sens bien que i’ay fort grossi ce Cahyer, en ramassant aucuns des Diminutifs qui estoient eschappez, à Monsieur de la Nouë, & à ma premiere impression : quoy que la portion du glenneur reste encore apres nous. ”

“ Quoy que i’aye estallé tout du long les Diminutifs de ce genereux Caualier, ie ne lairray pas d’estendre tout du long aussi presantement, ceux de ma premiere Impression, bien qu’il y en ait aucuns des siens, comme i’ay dit, si communs que ie n’auois peu les obmettre : telles redites d’entreluy & moy ne peuuent estre fort importunes, nommément à ces esprits de haute leçon, qui prennent la quantité des miens pour suiet de passe-temps à rire. ”

“ Apres tout les plus honnestes personnes aussi, proferent à tous coups, se marier par amourettes, aller aueuglettes, dire par épaulettes, mener au tabourinet : ils n’espargnent point vne fine-minette, vne humeur enfantine, vne camuzon, vne menon, vne pauure petiotte, vn peton, vne menotte : nomment en suitte leur incarnadin & leur camelotin, aussi volontiers que leur incarnat & leur camelot : ny les Dames n’obmettent pas, le crespon, qui sonne éuidemment, crespe leger, ou leur vertugadin & leur collerette, Diminutifs de vertugade & de colet. ”

“ Mais certainement, puis que toutes sortes de dictions ainsi recueillies en bloc, tomberoient au mesme inconuenient ; si le plaisant reproche qu’on me faict en cecy a lieu, il ne faut plus escrire de Dictionnaires, ny aucun Liure de Grammaire : & c’est merueille que les autres Escrits de ce genre-là, particulierement sur les Diminutifs, comme ie feray voir à cette heure, n’ayent peu reueiller, iusques icy, la Sapience critique de ces personnes : & que le mien seul leur ayt appris que le bel esprit n’estoit pas encore arriué chez eux, quand ils les traictoient de silence par le passé. ”

“ Laissons aux garses corporelles le soin de preferer les aioliuemens du corps, aux ornemens de la Vertu, & resignons aux spirituelles, ainsi dois-ie appeller les ames qui se coiffent de ces visions de scrupules par suffisance poupine ”

“ Iob apres nous parle de dormir in lectulo : & dit qu’il veut mourir, in nidulo suo. Et l’on peut aisément iuger si les Grecs abondent en vne telle gentillesse, puis que le graue Epicurus mesme, appelloit, Colotarion, le Philosophe Colotes son fauory. Comme encores Plutarque nous en apprendra tantost d’autres, de ces genereux Lacedemoniens. Ouy mesmes ces graues Latins desquels la Langue est mere de la nostre, & partant son plus iuste exemplaire, (sans plus parler de la Grecque pour cette heure,) ont inuenté les Diminutifs doubles, blandulus blandiculus, ocellus ocellulus. ”

“ Ce que les vns font pour se percher à caualier sur le faiste de la reputation des esprits d’importance, les autres, pour seruir à la mode des vielleux vn plat de leur mestier aux bonnes tables qu’ils veulent resioüir, affin d’attraper vn autre plat de souppe grasse. ”

“ D’ailleurs, il est vray, que des plus hautes & polies Dames de la Cour, appelloient n’agueres, leur trongnette, vne fort belle peinture de ieune fille, rangée en leur cabinet où ie me trouuay.
Qui plus est, il y a des Diminutifs si fiers & si superbes, qu’ils surpassent leurs Primitifs vrays & certains toutefois. ”

“ En somme, qu’ils fulminent contre moy tout leur saoul : i’ose maintenir qu’il n’y a teste saine en France, qui reiettast aux occasions vn seul exemple des Diminutifs que i’ay couchez en ce Recueil, ou qui ne tint pour songes de gens esueillez, les exceptions qu’vn autre en voudroit faire. ”