Marie de Gournay

“ Et s’il est permis de rire en passant, le quolibet ne sera pas hors de saison, nous apprenant; qu’il n’est rien plus semblable au chat sur une fenestre, que la chatte. L’homme & la femme sont tellement uns, que si l’homme est plus que la femme, la femme est plus que l’homme. ”

“ Cela n’est pas corriger la Langue, de par tous les Dieux, c’est corriger l’ediffice de l’homme & son Ouurier ; qui ne l’a pas creé, pour estre plustost graue que tendre aux occasions. Le temps à venir pourra-t’il croire, que le nostre ait esté capable d’enfanter des sottises de si haute game, & qu’il ait porté des monstres que la Nature effarouche ? ”

“ Estoit jadis Alcipe esclave de l’Amour.
Bruslé des yeux de Marthe il coula tout en cendre:
Et faut, cendre inquiete, en ton aspect comprendre:
Qu’un miserable esprit blessé par un bel œil
N’a jamais de repos s’il te manque au cercueil. ”

“ Ce seroit peu d’aduertir cette espece de monde, qu’ils ne voyent goutte à telle ou telle chose dont ils le meslent de discourir, si l’on ne leur faisoit comprendre en suitte ; que quiconque parle de ce qu’il n’entend pas, n’entend rien hors de là. ”

“ Et le mal est, que depuis qu’vn Ioyeux s’aduise mesmement à la Cour, de faire vne piece de risée, pour impertinente qu’elle soit, ce n’est pas merueille si cinq cens testes de ce Climat, qui croyent qu’il y a de la suffisance à draper, suiuent sa piste : ces gens-là n’estans pas d’ailleurs, si fins communément, qu’ils puissent discerner s’il les meine par le nez ou non, soit pour quelque sien interest, ou pour faire parler de luy. Nous adiousterons vn traict de Xenophon apres celuy des Essais. ”

“ C’est en la vertu certes, Madame, qu’il faut que les personnes de vostre rang cherchent la vraye hautesse & la Couronne des Couronnes: d’autant qu’ils ont puissance & non droit de violer les loix & l’equité, & qu’ils trouvent autant de peril & plus de honte que les autres hommes à faire ce coup. Aussi nous apprend un grand Roy luy mesme, que toute la gloire de la fille du Roy est par dedans. ”

“ Personnage veritablement à qui la qualité, l’esprit, les Lettres, & l’habitude des Cours, prestoient autant de moyen de practiquer les Loix de la bien-sceance, & de cognoistre & parler la Langue pertinemment, que ces gens en peuuent auoir. Que s’il est plus hardy que moy en debittant cette marchandise ; se faut-il estonner qu’il ait plus d’asseurance qu’vne femme sur le papier, puis qu’il en auoit aux combats, plus que n’en ont communément les hommes ? Les voicy au mesme ordre qu’il les presante par colomnes, selon la coustume des Dictionnaires : pource qu’ils font part du sien des Rymes. ”

“ Qui croira cependant, que ceux qui se veulent eslever & fortifier de la foiblesse d’autruy, se puissent eslever ou fortifier de leur propre force? Et le bon est, qu’ils pensent estre quittes de leur effronterie à vilipender ce sexe, usants d’une effronterie pareille à se loüer & se dorer eux mesmes, je dis par fois en particulier comme en general, voire à quelque tort que ce soit: comme si la verité de leur vanterie recevoit mesure & qualité de son impudence. ”

“ Que dis-je, il ne suffit pas à quelques gens de leur preferer le sexe masculin, s’ils ne les confinoient encores d’un arrest irrefragable & necessaire à la quenoüille, ouy mesme à la quenouille seule. Mais ce qui les peut consoler contre ce mespris, c’est qu’il ne se faict que par ceux d’entre les hommes ausquels elles voudroient moins ressembler: personnes à donner vray semblance aux reproches qu’on pourroit vosmir sur le sexe feminin, s’ils en estoient, & qui sentent en leur cœur ne se pouvoir recommander que par le credit de l’autre. ”

“ Et quand les hommes desroberoient à ce sexe en plusieurs lieux, part aux meilleurs advantages; l’inegalité des forces corporelles plus que des spirituelles, ou du merite, peut facilement estre cause du larrecin & de sa souffrance: forces corporelles, qui sont vertus si basses, que la beste en tient plus par dessus l’homme, que l’homme par dessus la femme. Et si ce mesme Historiographe Latin nous apprend, qu’où la force regne, l’equité, la probité, la modestie mesme, sont les attributs du vainqueur ”

“ Il luy semble, dit il, & si ne sçait pourquoy, qu’il se trouve rarement des femmes dignes de commander aux hommes. N’est ce pas les mettre en particulier à l’egale contrebalance des hommes, & confesser, que s’il ne les y met en general il craint d’avoir tort: bien qu’il peust excuser sa restrinction, sur la pauvre & disgraciée nourriture de ce sexe. N’oubliant pas au reste d’alleguer & relever en autre lieu de son mesme livre, cette authorité que Platon leur depart en sa Republique: & qu’Anthistenes nioit toute difference au talent & en la vertu des deux sexes. ”

“ Mais certes il faut le courage requis à cet effort aussi grand & puissant que vostre Royauté, pour grande & puissante qu’elle soit: les Roys estant battus de ce malheur, que la peste infernale des flatteurs qui se glissent dans les Palais, leur rend la vertu & la clair voyance sa guide & sa nourrice, d’un accez infiniment plus difficile qu’aux inferieurs. ”

“ Si lon croioit que l’Escripture luy commendast de ceder à l’homme, comme indigne de le contrecarrer, voyez l’absurdité qui suivroit: la femme se treuveroit digne d’estre faicte à l’image du Createur, de jouyr de la tressaincte Eucaristie, des mysteres de la Redemption, du Paradis & de la vision voire possession de Dieu, non pas des advantages et privileges de l’homme: seroit ce pas declarer l’homme plus precieux & relevé que telles choses, & partant commettre le plus grief des blasphemes? ”

“ Je n’enregistre point les faicts privez, de crainte qu’ils semblent, non advantages & dons du sexe, ains boüillons d’une vigueur privée & specialle. Mais celuy de Judith merite place en ce lieu, parce qu’il est bien vray, que son dessein tombant au cœur d’une jeune dame, entre tant d’hommes lasches & faillis de cœur, à tel besoing, en si haulte & si difficile entreprise, & pour tel fruict, que le salut d’un Peuple & d’une Cité fidelle à Dieu: semble plustost estre une inspiration & prerogative divine vers les femmes, qu’un traict purement voluntaire. ”

“ Ce que Theodoret releue si volontiers en l’Oraison de la Foy, ce me semble ; qu’il paroist bien que l’opinion fauorable au sexe luy estoit fort plausible. Apres tous ces tesmoignages de Socrates, sur le faict des dames ; on void assez que s’il lache quelque mot au Sympose de Xenophon contre leur prudence, à compairaison de celle des hommes, il les regarde selon l’ignorance & l’inexperience où elles sont nourries, ou bien au pis aller en general, laissant lieu frequent & spatieux aux exceptions : à quoy les deuiseurs dont est question ne s’entendent point. ”

“ Plutarque au Traicté des vertueux faicts des femmes maintient; que la vertu de l’homme & de la femme est mesme chose. Seneque d’autre part publie aux Consolations; qu’il faut croire que la Nature n’a point traicté les dames ingratement, ou restrainct & racourcy leurs vertus & leurs esprits, plus que les vertus & les esprits des hommes: mais qu’elle les a doüées de pareille vigueur & de pareille faculté à toute chose honeste & loüable. ”

“ D’autant qu’ils ont ouy trompetter par les ruës, que les femmes manquent de dignité, manquent aussi de suffisance, voire du temperament & des organes pour arriver à cette-cy, leur eloquence triomphe à prescher ces maximes: & tant plus opulemment, de ce que, dignité, suffisance, organes & temperament sont beaux mots: n’ayans pas appris d’autre part, que la premiere qualité d’un mal habill’homme, c’est de cautionner les choses soubs la foy populaire & par ouyr dire. ”

“ Quel honneur faict aux femmes aussi, ce songe survenu chez Pilate; s’addressant à l’une d’elles privativement à tous les hommes, & en telle & si haulte occasion. Et si les hommes se vantent, que Jesus-Christ soit nay de leur sexe, on respond, qu’il le failloit par necessaire bien sceance, ne se pouvant pas sans scandale, mesler jeune & à toutes les heures du jour & de la nuict parmy les presses, aux fins de convertir, secourir & sauver le genre humain, s’il eust esté du sexe des femmes: notamment en face de la malignité des Juifs. Que si quelqu’un au reste est si fade ”

“ Et partant concedans ceste faculté de distribution aux femmes, on void à clair qu’ils ne les ont interdites de distribuer les autres Sacremens, que pour maintenir tousjours plus entiere l’auctorité des hommes; soit pour estre de leur sexe, soit afin qu’à droit ou à tort, la paix fust plus asseurée entre les deux sexes, par la foiblesse & ravallement de l’un. ”

“ Les dames en verité se consolent, que ces descrieurs de leur merite ne se peuvent prouver habiles gens, si tous ces esprits le sont: & qu’un homme fin ne dira pas, encores qu’il le creust, que le merite & passedroit du sexe feminin tire court, pres celuy du masculin; jusques à ce que par arrest il ait faict declarer tous ceux là buffles, affin d’infirmer leur tesmoignage si contraire à tel decry. ”

“ D’ailleurs, l’advantage qu’ont les hommes par son incarnation en leur sexe; (s’ils en peuvent tirer un advantage, veu cette necessité remarquée) est compensé par sa conception tres precieuse au corps d’une femme, par l’entiere perfection de cette femme, unique à porter nom de parfaicte entre toutes les creatures purement humaines, depuis la cheute de nos premiers parens, & par son assumption unique en suject humain aussi.
Finalement si l’Escripture a declaré le mary, chef de la femme, la plus grande sottise que l’homme peust faire, c’est de prendre cela pour passedroict de dignité. ”

“ Que si quelqu’vn au reste est si fade ; d’imaginer masculin ou feminin en Dieu, bien que son nom semble sonner le masculin, ny consequemment besoin d’acception d’vn sexe plustost que de l’autre, pour honnorer l’incarnation de son fils ”

“ Que si les dames arrivent moins souvent que les hommes, aux degrez d’excellence, c’est merveille que le deffaut de bonne instruction, voire l’affluence de la mauvaise expresse & professoire ne face pis, les gardant d’y pouvoir arriver du tout. Se trouve til plus de difference des hommes à elles que d’elles à elles mesmes, selon l’institution qu’elles ont prinse, selon qu’elles sont eslevées en ville ou village, ou selon les Nations? ”

“ Mais quoy, s’ils prennent droict d’estre galans & suffisans hommes, de ce qu’ils se declarent tels cõme par Edict; pourquoy n’abestiront ils les femmes par le contrepied d’vn autre Edict? Et si ie iuge bien, soit de la dignité, soit de la capacité des dames, 10 ie ne pretends pas à cette heure de le prouuer par raisons, puisque les opiniastres les pouroient debattre, ny par exemples, d’autant qu’ils sont trop cõmuns; ains seulement par l’aucthorité de Dieu mesme, des arcsboutans de son Eglise & de ces grands hommes qui ont seruy de lumiere à l’Vniuers. ”