Giovanni Pietro Maffei

“ Il y a au païs de la Chine vne Isle nommee Santian, loin enuiron quarantecinq lieuës de la terre ferme, là où les marchans Portugois se rendent ordinairement pour traffiquer & negotier auec les Chinois, car il est defendu à vn estranger sur peine de la vie d’entrer dedans le païs & Royaume de la Chine. Là le bon Xauier s’achemina, pour traicter aussi de son affaire, & s’appester pour son voyage, qu’il auoit resolu, quelque danger & terreur qui se presentast deuant luy puis qu’il y alloit de l’honneur de Dieu & du salut des ames. ”

“ La vie & les œuures de François Xauier ont esté si exemplaires, qu’il me semble estre bien fort necessaire de les mettre en euidence, & faire veoir à tout le monde la gloire de nostre Seigneur & createur. ”

“ Ne doubtés aucunement, que Xauier par la vertu diuine, n’ait resuscité le ieune homme trespassé. En ce mesme païs aussi vne bonne femme Chrestienne le pria fort de venir chez elle, veoir son enfant qui estoit decedé, ce qu’il feit, & d’arriuee il forma le signe de la croix sur le corps du defunct, faisant sa priere à Dieu, deuotement à deux genoux, & soudain l’enfant se leua sain & sauf, sans aucun mal. A ceste chose tant estrange les Chrestiens qui estoyent presens crierent miracle, mais il les requit fort instamment de tenir ce faict secret, & n’en dire mot à personne. ”

“ Au demeurant c’est la coustume fort religieuse & pleine de pieté des gens de guerre du païs, de se confesser tous, le iour qu’ils doiuent marcher, ou faire faction, & se rendre à l’Eglise de bon matin, laissant à la porte leur picques, harquebouses & iauelines, & apres auoir deuotement receu le precieux Corps de nostre Seigneur, sortir par vn’autre Porte, reprenãt leurs armes, croyant fermement, ce qui est vray, que ce sainct acte leur seruira de bon heur, pour plus vaillamment, & allegrement combattre. ”

“ Que croirons nous du ieune homme que vous aués resuscité en la coste de Commorin ? A ceste demande Xauier soudain rougit, & embrassant le sieur Diego, luy dit ensoubzriant : bon Dieu, suis-ie homme à vostre aduis pour resusciter les morts ? Hé, poure pecheur que ie suis ! l’on m’auoit amené vn ieune homme pour mort, & luy ayant commandé au nom de Dieu de se leuer, il se leua, ce que les assistans soudain prindrent pour miracle. ”

“ Toutes les Isles des nations adoreront Dieu, & feront marcher le triomphe des victoires de Iesus Christ, d’vne mer à vne autre, instruisans en sa loy des peuples qui n’en n’auoyent onques ouy parler, nommés par Esaie, l’Afrique & les Indes Orientales, en la parolle Hebraique Tharsis. ”

“ IL y a vn autre College de la compaignie en la ville de Cocin, loin de Goa enuiron cent cinquante liëues, là où il n’y a pas tant de personnes, qu’en celuy duquel nous auõs parlé, si est ce qu’ils s’occupent tous aux mesmes offices, & exercices de pieté. Et iaçoit que l’on tienne ceste ville pour fort paisible, si n’est elle pas du tout sans dãgers, & trauerses. ”

“ Reuenant de Iapon à Malaca, qui est vne traicte de plus de cinq cens lieuës, il aborda au port de la Chine, & passant de la Nau de Duarte Gamma, en celle de Diego Pereria, le cogneur en grande perplexité d’esprit, d’autant qu’ayant laissé la ville de Malaca assiegee de l’ennemy, il n’auoit rien entendu depuis de l’issue, & comme le tout estoit passé, qui le rendoit fort curieux d’en scauoir des nouuelles de ces Chinois, & mesmes il faisoit bonne prouision de toutes sortes d’armes, auec les Pilotes, pour le secours de Malaca. ”

“ Maintenant puis que par son conseil & conduicte, il y a plusieurs colleges de ceste Congregation, dressés en ces païs estranges, desquels comme de certains seminaires, sont issus beaucoup de grans personnages, qui sont entrés bien auant és Prouinces, les plus esloignees du costé de leuant, pour y annoncer Iesus Christ & son Euangile : il m’a semblé raisonnable, & fort à propos, de parler de chacun d’iceux en particulier. ”

“ Que les Prophetes en annonçeant plusieurs siecles au paravant, tout ce qui par apres de point en poinct succederoit, non en vn lieu, mais en tous les quartiers du monde habitables, n’ont onques renuoyé les hommes menacés de quelque malheur, à appaiser vn astre, comme la cause de son desarroi, & malencontre, mais bien ont ils conuié chacun à recognoistre le Dieu viuant, qui leur auoit eclairé en l’entendement par sa prouoyãce, sans qu’ils eussent onques estudié en Astrologie, & faict toucher d’vne certitude infaillible le cours des choses cõcernantes nostre Salut. ”

“ Ce pendant que Xauier estoit en la coste de Commorin enseignãt le Catechisme, & instruisant ses auditeurs en la religion Chrestienne, il obseruoit l’ordre qui s’ensuit. Le matin apres auoir dict ses heures, il s’en alloit auec vn enfant, portant vne croix, parmy les ruës de la ville, s’enquerant s’il y auoit quelque malade, ou quelqu’vn qui fust trespassé, & s’il y auoit point d’enfans, ou d’autres desia aages, qui voulussent estre baptisez. ”

“ L’autre estant fort noble & riche (car pour estre le prestre du païs, il en tiroit vn grãd reuenu par les decimes & primices qu’il receuoit) si tost qu’il se fut rendu à Iesus Christ, quitta tous ses biens & commodités, à fin que plus librement il en amenast d’autres à la cognoissance de la verité, en quoy il s’employoit à bon escient, & sans s’espargner aucunement, comme font aussi presque ordinairement tous les nouueaux Chrestiens, de quelque estat ou condition qu’ils soyent. ”

“ Quelques iours apres les deux Mores receurẽt le sainct baptesme, & furent cõuertis à la vraye foy de nostre sauueur Iesus Christ. Ce faict icy fut tenu & remarqué soigneusement de tous & partout, pour admirable.
D’auantage c’est chose bien aueree, que Xauier auoit le don de prophetie, car il annonça & predit beaucoup de choses qui auindrent apres, & en asseura d’autres qui se faisoyent bien loin, ce qu’humainement il ne pouuoit, ny sçauoir, ny presager. ”

“ Mais vn vieillard honorable, & de grande autorité entre eux se leua, & dict, Messieurs, il ne vous faut pas tant fier au partement du Viceroy Constantin, que vous n’ayés deuant les yeux, que ceux de la Compagnie du nom de Iesus demeureront tousiours icy, qui n’auront pas moins d’autorité à l’endroit des autres Viceroys qui viendront apres, qu’ils ont eu auec cestuy-cy, parquoy nous serions beaucoup mieux de quitter nos abominables Idolatries, & nous asseruir au grand Dieu viuant, en nous faisant tous Chrestiens. ”

“ Car des le iour qu’il s’embarqua, il se monstra si diligent, si courtois & debonnaire, enuers les malades & souffreteux, tant de son vaisseau, que de l’isle de Mozambique, là où la flotte passa l’hyuer, & les secourut auec telle gayeté, & bonne grace, que chacun l’estima des lors homme de si grande saincteté & perfection, que ceux qui se trouuerent presens à ce voyage, ne scauroyent assés hautement à leur aduis, parler de ses belles actions. ”

“ Auec tout cecy d’vne fort heureuse suitte, nostre Seigneur y assiste par sa puissance extraordinaire, & faict des miracles si euidens de toutes sortes, en confirmation de ce que ses Ambassadeurs, & Vicaires annoncent & preschent, que la face des Eglises de Iapon, & autres des plus esloignees, ressemble presque de tout point à celle de la primitiue Eglise. ”

“ Le soir, quand il estoit tems d’heberger, il arriuoit au logis tout mouillé, & transi de faim & de froid, sans trouuer aucun allegement, ou soulas humain, vray est qu’il n’auoit pas faute de consolations diuines. Au reste l’accueil qu’on luy faisoit es villes & bourgades, où il passoit, c’estoyent belles iniures & outrages, & bien souuent les petis enfans le chamailloyēt à coups de pierres parmi les rues, sans que pour toutes ces difficultez de si mauuaise digestion, il cessast onques d’annoncer l’Euangile. ”

“ Apres qu’il eut demeuré enterré à Malaca quelques mois, il fut transporté à Goa, mais ce ne fut pas sans vn bon heur pour les mariniers, car s’estans trouués plusieurs fois en grand peril de se perdre, parmi les orages & tempestes de la mer, qui rõpirent le gouernail du nauire, & la heurterent contre les rochers, sans s’en prendre garde, ils se recommãderent au secours de celuy duquel ils auoient le coprs auec eux, & vindrent à port en bonne santé. ”

“ Que s’il luy faloit voyager par terre, de peur de faillir le chemin, il suyuoit de pleine course les gens du païs qui alloyent à cheual, mais à beau bied nud, pour passer à gue les grosses riuieres, qui en ceste saison de l’annee ordinairement se desbordent. Ce trauail estoit de sorte, que le poure Xauier auoit les pieds tous enflés de neige & de froidure, & puis ayant en vn fardeau sur soy, les accoustremens pour dire la Messe, & les chemins estāt bien fort glissans, & comme vitrés de verglas, il tomboit chaque coup à terre. ”

“ Et de faict l’annee passee, la ville fut assiegee par les Mores qu’on appelle Iaïs, & le plat païs par eux fut pillé & rauagé. Depuis suruint apres la guerre vne peste si furieuse, que la plus part du peuple en mourut, & fut la ville presque toute desnuee d’habitans.
Vne autrefois citant Xauier en vn port de la Chine, appellé Chincho, il dit à certains Portugois qui estoyent auec luy. ”

“ En ces maladies il n’vsoit d’autres medecines que celles qu’il auoit en sa chambre, qui estoyent des liures : & n’employoit pour son sommeil que le tems qui luy restoit des occupations ordinaires, qui pouuoit estre deux ou trois heures, mais de maniere, qu’il s’endormoit tousiours en faisant quelque chose, & vaincu par necessité. ”

“ Quant à sa maniere de viure, il estoit merueilleusement austere, car il ne mangeoit presque iamais de chair, si ce n’estoit pour complaire aucune fois à ceux qui le conuioyẽt en leurs maisons, & si passoit deux & trois iours bien souuent auec vn morceau de pain. Quant au vin il n’en vsoit que comme point, & s’en abstenoit, de façon qu’il en donna aux poures vn vaisseau, auec tous les presens que le Viceroy Martin Sosa luy auoit enuoyé, comme estoit aussi sa coustume, quelque part qu’il fust, de distribuer aux poures, tous les dons qu’on luy faisoit. ”

“ Si quelque semblable chose se presebtoit, alors leuant les yeux & les mains au Ciel, comme s’il eust voulu prescher, il prononçoit fort deuotement & à haute voix le symbole des Apostres, & les dix commandemens de la Loy, ce qui soudain luy attiroit vne grande multitude de peuple. Si sa priere estoit pour vn malade, il la finissoit par quelque Euangile, mais quand c’estoit pour vn mort, il recitoit tousiours à la fin quelques Pseaumes funebres, ou disoit mesmes les nocturnes pour les trespassés. ”

“ Et combien que ces Percs achetent bien cherement, & auec le danger de leur vie, & vne infinité de trauaux ceste reputatiõ qu’ils ont de s’acquiter sainctement de leur charge, si ne se contentent ils pourtant de travailler en vn endroit, mais quelque part que l’esperance reluit d’y pouuoir auancer la besongne celeste qu’ils ont en main, ils ne plaignent labeur aucũ, quoy qu’il leur deust couster la vie. ”

“ Ioinct que les Seigneurs, & lieutenans des Roys qui sont es terres & domaines de leurs Souuerains, non pas tousiours les mesmes, mais surrogés les vns aux autres, selon qu’il plaist à leurs Maistres, ne voudroyent pour leur honneur vendre des bourdes à leurs Princes, ausquels neantmoins ils ont tous en diuers tems, d’vn mesme pays, d’vn mesme stile donné les auertissemens tous tels que ceux qui sont icy couchés par escrit. ”

“ N’ayés peur mon amy, car nous y verrons encores Antoine Pereria, qui nous attend, à voile desployee, il y a desia trois iours, auquel Xauier donna aduertissement de sa venue, par lettres des le gouffre de Sincapon, distant de Malaca plus de quarante cinq lieuës, là où arriués qu’ils furent, ils trouuerent & la ville paisible, & Antoine Pereria qui les attẽdoit depuis trois iours, tout prest à singler en mer, & les passer es Indes. ”

“ Et de faict le Roy a si bien fondé ce College, qu’estant renté seulement de sa premiere institution, pour l’entretenement & nourriture de cent personnes : le nombre à puis apres esté redoublé, & y est vne grande quantité d’hommes de ceste profession instituee en toutes sciences, & bonnes lettres. ”

“ Or tout cecy m’a faict souuenir d’vn souhait, ou pronostic de ce bien auisé & docte Pere, sainct Augustin, escriuant à vn sien amy la response d’vne difficulté à luy proposeec, sur la predication qui doit estre faicte es terres incogneuës, deuant la consommation du mõde, Le fils de Dieu, dit-il, ne viendra point deuant que l’Euangile ne soit presché par tout le monde. ”

“ Or leur labeur, & la peine que ces gens de bien prennent leur doit estre d’autant plus agreables, que le profit en est excellent, car depuis qu’ils sont instalés à Goa, ils ont conuerti presque toute l’Isle, & si ont rangé à l’Eglise Catholique deux autres cõtrees toutes voisines, Diuar & Coran. Aussi leur fut ce vn bien grand contentement l’an 1557. quand le viceroy Constantin, dressant vne armee contre les Barbares, il feit monstre de trois mille soldas, qui auoyent receu le sainct baptesme, par leur ministere, & diligence. ”