Luís Fróis

“ Mais le temps pendant voicy le diable, lequel ces aueugléz appellent le Dieu Tigrin, qui prent logis dedans son corps, & par sa bouche se prent à crier, & à se plaindre de ce que tous ses seruiteurs luy auroient esté enleués ; chose qui le tourmentoit fort, d’autant qu’il estoit contrainct de se seruir soy mesme, & s’en resentoit d’autant plus par ce, que l’inconuenient luy estoit aduenu en son absence, & cependant, qu’il n’estoit en sa case, ains se pourmenoit ça, & là parmy les montaignes. Car il se faisoit fort, que s’il eut esté present, n’eust iamais souffert telle escorne. ”

“ Et quand aux menasses de saccager l’Eglise, & de nous faire mourir, nous estions bien marris de n’auoir qu’vne seule vie pour l’offrir à Dieu, veu que si chacun de nous en auoit cent mille, il les offriroit toutes volontiers à sa diuine maiesté. Adiousta aussi le pere Cabral que la poursuite que son excellence faisoit de faire abandonner la foy à son fils, pouuoit proceder de deux raisons, ou pour ce qu’il luy sembloit que la loy de Dieu fust vile, & abiecte, ou faulse, & non de Dieu, mais bien du diable. ”

“ En apres l’asseura de iamais n’auoir ouy chose semblable : Que toutesfois il estoit bien vray que Dom Sebastien auoit promis à Simon toute faueur, & amitié, aduenant que les choses allassent mal pour luy, si comme encor faisoit le Roy, & semblablement son Altesse. Au reste que la loy de Dieu portoit expressement que les subiets pretassent toute obeyssance à leurs Princes, & Roys en toutes les choses, qui ne contreuiendroient à ceste mesme loy. Ce que l’experience auoit tousiours monstré au pays du Iappon. ”

“ Au demourant qu’il estimoit, qu’il y alloit de son honneur de defendre l’Eglise qu’il auoit vne fois prise soubs sa protection, & sauvegarde, de sorte que quoy que Cicacata luy appartint & ne luy fust beaucoup inferieur en extraction, & noblesse de race, si est-ce qu’il se declareroit son ouuert ennemy, aduenant qu’il brassast, derechef la ruine de l’Eglise, mesmes que si son propre fils (lequel pour le present à le gouuernement du Royaume) entreprenoit le mesme, ne luy feroit aucune grace, ni pardon : ains se pourroit asseurer de perdre la teste. ”

“ Ne voyez vous pas que si vous ne vous retirez a bonne heure de ceste loy Chrestiene, que non seulement vous ferez perte de toutes vos grandeurs, & preeminences, ains encores mettrez au hazard vostre propre vie ? A quoy Simon respondit franchement, d’vne contenance asseurée : Ie ne fais grand estat d’estre gendre du Roy, ny d’auoir tant de rentes, n’y d’estre fils adoptif de Cicacata, ny de marcher accompaigné de tant de mille hommes de guerre, ny finablement d’estre seigneur du royaume de Bungo : Ie desie seulement viure Chrestien. ”

“ De tout cecy estoient bien certiorez la Royne & Cicacata, & neantmoins ne cessoicnt aucunement de fleschir & alterer le courage du Roy & du Prince, & si furent tant importuns, que le Roy pour ne monstrer de faire peu de cas d’iceux fut contrainct & necessité d’enuoyer dire à Simon que s’il estoit possible il dissimulast la foy & religion qu’il auoit professée pour quelque peu de iours à fin que son pere appaisast sa cholere, & que au demourant il luy donneroit sa fille, laquelle peu de temps apres à sa propre requeste & solicitation se feroit Chrestienne aussi bien que luy. ”

“ Et entre les autrechoses qu’il profera pour demonstrer l’allegresse qu’il sentoit en son cœur, dit, que pour accomplissement total de fa felicité, il desireroit (si c’estoit le bon plaisir de Dieu) que bien tost la mort luy serrast les yeux, auant que son ame fust souillee d’aucun péché. Le pere Cabral luy fit present d’vn fort beau chapelet d’os de cheual marin, lequel il cherist & prise beaucoup, & soudain le mit en son col, donnant celuy qu’il auoit au parauant, à vn des trois, qui s’estoient baptisez auec luy. ”

“ Premierement, Que nostre profession estoit de prescher la vraye loy de Dieu auec paroles & œuures, n’espargnans en cest affaire ny le sang ny la vie, & n’ayans autre but que le salut des ames principalement, & puis aussi la conseruation & entretenement des peuples en l’obeyssance & amour qu’ils doibuent à leurs seigneurs, les enfans à leurs peres, & les seruiteurs à leurs maistres. ”

“ Pour vray, mes treschers freres, les iuentions, & cautelles de l’ennemy ont est, admirables tendentes aux fins d’abbatre, & culbuter ceste colomne, & par mesme moyen bouleuerser tout, ce que par l’espace de trente ans auoit esté basty, & edifié en la cité de Bungo. Mais la prouidence de Dieu nostre Seigneur n’a point esté moindre pour la conseruation de ses esleuz ny sa puissance pour recueillir de tresgrands biens de si grands maux, consideré qu’auec ceste occasion l’energie & efficace de la grace diuine s’est bien fort descouuerte. ”

“ Ce ieune prince est grand amy & familier de Simon comme celuy lequel à cause de l’adoption desia mentionnee luy est cousin germain & encores beau frere à raison du futur mariage auec sa sœur. Or craignant Simon plus d’estre banny & dechassé, que de perdre la vie pour euiter vn si grand inconuenient, il s’aduisa de ce beau traict. C’est qu’il signifia par homme expres à Dom Sebastien, qu’il auroit grand desir de luy pouuoir parler, & puis que cela ne se pouuoit bonnement faire en son logis, tascheroit de l’aller trouuer en autre lieu tel qu’il aduiseroit. ”

“ Le mesme iour nous receusmes aduertissement de Simon, de cest heureux & souhetté succes, & du bon traictement qu’il receuoit de son Pere, ne plus ne moins qu’au parauant : Chose qui l’occasionnoit de rendre graces infinies à Dieu qui l’auoit deliuré, & aux Peres, & à tous les Chrestiens pour tous les accidens qu’ils auoient voluntiers & gayement souffers & tolerez pour son regard & occasion. Bien que quant à soy, il lyu desplaisoit fort de n’auoir esté digne de la couronne du martyre qu’il souhaittoit, auec bonne deuotion. ”

“ Car la premiere responce leut seruit de seconde, sinon qu’on y adiousta, que quant aux promesses, que Cicacata faisoit de bastir l’Eglise, donner rentes, & faire conuertir beaucoup de gens, son excellence pouuoit auoir entendu qu’ayant les peres de la Compaigne abandonné leurs propres patries pour venir en pays si loingtain, ils n’auoient autre dessein, que de faire vn contrechange des choses temporelles aux choses eternelles, & de ne tenir comte aucun, ny faire estime de chose aucune que de Dieu, & de son S.seruice. ”

“ Et d'autant plus que de telles maisons que celle qu'il vous a pleu nous dresser en ceste ville de Paris, sortent ordinairement ceux, lesquels apres une longue preuue de leur vie, doctrine, & dexterité à ayder les ames, se treuuent dignes d'une si haute & excelente entrepinse, que de voyager par toute l'estendue du monde, pour lamplification du royaume de Dieu. ”

“ Ce qu’entendant Nabunangua dit, qu’encore luy estoit de mesme aduis, de façon, que iaçoit que toutesfois & quantes que les peres le visitoient, il les receut auecques grande humanité, neantmoins du depuis il leur monstra plus grande amitié, & leur fit plus grand honneur, que iamais il n’auoit fait. Car l’estans allez les Peres salüer le premier iout de l’an, encores que la sale fut pleine de Seigneurs les plus remarquez du Royaume, qui l’attendoient pour luy donner les bonnes festes, neantmoins dés aussi tost ils furent par luy conduicts iusques en la sale, & placez au lieu le plus honorable. ”

“ NOus auons receu grand’consolation en nostre S des lettres de vostre R. & du bon nombre des ouuriers que vous nous auez enuoye ceste annee, & auec ce nous nous sommes tous renouueles, & auons prins plus grand cœur & courage pour trauailler en ceste haulte & louable entreprinse de la conuersion des payens. Les nouuelles de ces contrees de Meaco sont la grace à Dieu asses bonnes, Ie les escriuis au Pere François Cabral afin qu’il en fist part a vostre R. comme ie croy qu’il fera, consideré qu’il y a de fort grande consolation pour vn chacun. ”

“ Plaise à nostre bon Dieu, que si son corps est affligé, l’esprit pour le moins en soit garenty, & sauué. Et quant à la sœur de la Royne, elle n’a esté sans punition, car il y a trois iours que le feu brusla, & consuma tout son palais, sans q’une milliace d’hommes qui y accoururent, y peussent donner ordre : tant seulement eschapperent ce furieux embrasement certains edifices, que Dom Sebastien ia Chrestien y auoit dressé, nonobstant q’uils fussent conioincts au corps dudict palais, qui fut bruslé. ”

“ Car ce sont gens superbes & hautains, & tels qu’ils se reputoient pour dieux de la terre, & maintenant sont enseignez d’vn ieune homme de 20.ans ou enuiron, quoy que par my eux il en y ayt quelques vns de soixante, & outre ce d’vn maintien, & presence venerable, de façon que tous les subiects de ce seigneur sont par la grace de Dieu desia Chrestiens sans aucun destourbier des Bonzes, ny des idoles, ny d’autre chose gentilesque. ”

“ Ayant Simon receu ceste responce d’vn cceur genereux, & sans crainte, il escriuit vne autre lettre à son pere, luy descouurant ouuertement qu’il estoit Chrestien, comme desia auparauant il luy auoit declairé, & qu’il perseuereroit en ceste foy iusquces à la mort. Au reste qu’il fist de luy ce qu’il voudroit, ou qu’il le fist mourir, ou bien qu’il le renuoyast à Meaco, ou s’il le chassoit de sa maison, il se rendroit en la Compagnie des peres. ”

“ Toutesfois voyant le besoing i’en tiendray propos à ma femme & le luy bailleray en charge. S’estant donc retiré en sa maison, il en confera auec sa femme, laquelle estoit vne princesse de fort noble maison, laquelle feit ceste response à son marry : Il me semble chose fort estrange, qu’attendu que les peres doibuent ceste nuict endurer le martyre & que vous mesmes estes totalement resolut de leur tenir çompagnie, me vueillez persuader de demeurer à garder leur argent priuee du sainct martyre. ”

“ Les nouuelles des nostres sont, que par la grace de Dieu nous sommes tous en bon estat. La Chrestienté du Meaco prend vn accroissement admirable, de sorte, que despuis quatre moys ença ont esté baptizez en la forteresse de Sangua mil & cinq cens personnes, si bien que desia tous les suiets de ceste seigneurie ont receu nostre religion. ”

“ Ce qui fut tout mis dans deux coffres, desquels en voulusmes bailler en garde vn a vn gentil-homme, à fin que nostre mort aduenant, il le rendist au pere Iean Baptiste, qui fait sa residence à Funay, ou si luy encores mouroit, à quiconque seroit superieur de nostre Compaignie en l’Isle du Iappon. Mais le bon gentil-homme ne le voulut accepter, disant : Mon pere, si vous estes en danger, asseurez vous que ie courray la mesme fortune, puis que soustiens la mesme querelle, & ainsi tousiours vostre coffre l’esgarera. ”

“ Et parce que tant son fils aisné, que les autres seigneurs, qui estoient Gentils ne nous-voulurent oncques permettre de luy assister à l’heure de sa mort pour le secourir en vne extremité si grande, ie ne puis vous en particularizer dauantage. Vne chose sçayie bien, qu’il est mort Chrestien, & auec la croix, qu’il portoit sur soy continuellement. Et combien que les Bonzes, qui y furent appellez s’essayassent de le faire tourner arriere, neantmoins il ne voulut entendre leurs diabolicques persuasions, aydé sans, point de doute de la faueur particuliere du benoist sainct Esprit. ”

“ Mais ie me confie que les seruiteurs de Dieu auront le dessus, & quant à moy i’ay bonne esperance qu’auec mes mains ie ietteray par terre, & brusleray tous ces monasteres & pagodes de ces pauures & miserables abuseurs, afin que par ce moyen i’apporte au diable plus grand peine & tourment, & plus grand confusion à sa superbe & arrogance. Et venant par deça vostre reuerence sans doubte aucune le seigneur Dieu nous ouurira quelque chemin pour mettre afin ceste entreprinse & culbuté que sera le chef ne sera difficile de bouleuerser les membres & le reste de tous les Pagodes de tout le Iappon. ”

“ Le nouueau Roy & les plus puissans gentilshommes, nous dresserent incontinent vne furieuse persecution, faisant mettre en pieces les croix, qui auoient esté dressees, commandans à ces nouueaux Chrestiens soubs peine de la vie, de reprendre leurs premieres erres, & retourner au paganisme. Ce que la plus grand part d’iceux fist assez promptement, n’estans encores bien affermis, ains comme nouuelles plantes non gueres bien cultiuees par faute de bons ouuriers. ”

“ En eschange de ceste affliction nostre bon Dieu nous consola par le moyen de l’heureuse reduction de toute ceste ville de Maguza, ou presque tous les habitans ont receu le baptesme, & ceux, qui ne l’ont voulu receuoir ont esté chassez hors auecques perte de tous leurs reuenus, parce que combien, que le seigneur de ceste Isle eust esté fait Chrestien il y a ia six ans, neantmoins iusques à maintenant il y auoit tousiours eu grand nombre de Gentils, retenans en leur entier leurs temples, & Mosques. ”

“ Quant à nous autres ne fismes faute d’auoir encor’recours à nos armes spirituelles, offrans prieres, oraisons, ieusnes, & tous autres sacrifices de l’Eglise, le requerant de vouloir departir à Simon grace & force de cœur, à fin qu’il peust persecuter ferme & constant en la sainte foy. ”