Marguerite d'Angoulême

“ A dire vray, dist Parlamente, il est impossible que la victoire de nous mesmes se face par nous mesmes sans un merveilleux orgueil, qui est le vice que chacun doibt le plus craindre, car il s'engendre de la mort et ruine de tous les autres. ”

“ C'est chose esmerveillable, mes Dames, de penser aux effects de ce puissant dieu d'amour, qui, ostant toute crainte aux femmes, leur apprend à faire toute peine aux hommes pour parvenir à leur intention. ”

“ Et quant à la mort, que vous dictes cruelle, il me semble, puis qu'elle est nécessaire, que la plus briefve est la meilleure, car l'on sçait bien que ce passage-là est inévitable; mais je tiens heureux ceux qui ne demeurent point longuement aux fauxbourgs, et qui de la felicité qui se peut seule nommer en ce monde félicité volent soudain à celle qui est eternelle. — Qu'appellez-vous les fauxbourgs de la mort? dist Simontault. ”

“ Ainsi voit-on, mes Dames, qu'une extremité d'amour amene un autre malheur. — Voilà qui me plaist bien, dist Simontault, quand l'amour est si egale que, l'un mourant, l'aultre ne veult plus vivre; et, si Dieu m'eust fait la grace d'en trouver une telle, je croy que jamais homme n'eust aimé plus parfaictement que moy. — Si
ay-je ceste opinion, dist Parlamente, que amour ne vous eust pas tant aveuglé que vous n'eussiez mieux lié vostre bras qu'il ne feist : car le temps est passé que les hommes oublient leur vie pour les dames. ”

“ Je croy, dist Emarsuitte, qu'il n'y a femme au monde qui prenne plaisir à la mort d'un homme, encor qu'il fust son ennemy. Toutesfois, si les hommes se veulent tuer d'eux-mesmes, les dames ne les en peuvent pas garder. ”

“ Croyez, mes Dames, qu'il y a bien peu de mariz que patience et amour de la femme ne puissent gaigner à la longue, ou ils seront plus durs que pierres, que l'eau foible et molle, par longueur de temps, vient à caver. ”

“ Nous voyons bien communément, mes Dames, cela advenir à ceux qui prennent plaisir d'user de telles finesses. Si le gentil-homme n'eust voulu manger aux despens d'autruy, il n'eust pas beu aux siens un si vilain bruvage. Il est vray que mon compte n'est pas trop net; mais vous m'avez baillé congé de dire la vérité, laquelle j'ay dicte pour monstrer que, quand un trompeur est trompé, il n'y a nul qui en soit marry. — L'on dit volontiers, dist Hircan, que les paroles ne sont jamais puantes; mais ceux par qui elles sont dictes n'en sont quittes à si bon marché qu'ils ne le sentent bien. ”

“ Ha! dist Dagoucin, je vous supplie d'oster ceste opinion de vostre teste, pource que tant plus la drogue est precieuse, et moins se doit esventer, pour la malice de ceux qui ne se prennent qu'aux signes exterieurs, lesquels en bonne et mauvaise amitié sont tous pareils. Parquoy les fault aussi bien cacher quand l'amour est vertueuse que si elle estoit au contraire, pour ne tomber au mauvais jugement de ceux qui ne peuvent croire qu'un homme puisse aimer une dame par honneur, et leur semble que s'ils sont subjects à leurs plaisirs, que chacun est semblable à eux. ”

“ Je croy qu'elle ne daigneroit toucher à mon infidele et miserable cueur, car la vie deshonorée et la mémoire de ma perte, par ma faulte, est plus importable que dix mille morts. Helas! m'amie, si quelqu'un, par malheur ou malice, vous eust osé tuer, promptement j'eusse mis la main à l'espée pour vous venger. C'est donc raison que je ne pardonne à ce meurtrier, qui est cause de vostre mort par un acte qui est plus meschant que de vous donner un coup d'espée. Si je sçavois un plus meschant bourreau que moy-mesmes, je le
prierois d'executer vostre traistre amy. ”

“ Ainsi vivant, quant au corps, de vie bestiale, et, quant à l'esprit, de vie angelique, passoit son temps en lectures, contemplations, prieres et oraisons, ayant un esprit joyeux et contant dedans un corps amaigry et demy mort. ”

“ Premierement, Dieu luy commande, son serment l'y oblige, et puis la nature qui est saoule n'est point subjette à tentation ou désir comme est la necessité. Mais l'amour libre que l'on porte à s'amie de laquelle l'on n'a point la jouissance ny autre contentement que le veoir et le parler, et bien souvent mauvaise response, quand elle est si loyale et ferme que pour nulle aventure qui puisse avenir on ne la veult changer, je dy que c'est une chasteté non seulement loüable, mais miraculeuse. — Ce n'est point miracle, dist Oisille, car où le cueur s'adonne il n'est rien impossible au corps. ”

“ Ce seigneur s'en vint à sa femme et luy dist l'entreprinse que le Roy avoit faicte, et que, de luy, il aimoit autant mourir que d'accomplir ce qu'il avoit promis : car, tout ainsi que par colere n'y a homme vivant qu'il n'osast bien assaillir, aussi sans occasion par un guet à pens aimeroit mieux mourir que de faire un meurdre, si l'honneur ne l'y contraignoit; et pareillement sans une extreme force d'amour, qui est l'aveuglement des hommes vertueux, il aimeroit mieux mourir que rompre son mariage à l'appétit d'autruy. ”

“ Qui me faict vous prier, mes Dames, de demander à toute heure à Dieu son sainct Esprit, par lequel vostre cueur soit tant enflammé en l'amour de Dieu que vous n'ayez point de peine, à la mort, de laisser ce que vous aimez trop en ce monde. — Puis que l'amour estoit si honneste, dist Hircan, comme vous nous la peignez, pourquoy la failloit-il tenir secrette?
— Pource, dict Parlamente, que la malice des hommes est telle que jamais ne pensent que grand
amour soit joinct à honnesteté : car ils jugent les hommes et les femmes vertueux selon leurs passions ”

“ Je n'entends point, dist Oisille, seulement parler de ceux qui par la grace de Dieu sont tous transmuez en luy, mais des plus grossiers esprits que l'on voye ça bas entre les hommes ; et, si vous y prenez garde, vous trouverez ceux qui ont mis leur cueur et affection à chercher la perfection des sciences non seulement avoir oublié la volupté de la chair, mais les choses qui luy sont les plus nécessaires, comme le boire et le manger : car, tant que l'ame est par affection dedans son corps, la chair demeure comme insensible ”

“ Il me semble, dist Parlamente, que l'un ny l'autre n'est louable, et que les personnes qui se soumettent à la volonté de Dieu ne regardent ny à la gloire, ny à l'avarice, ny à la volupté, mais pour une amour vertueuse, et du consentement des parties, desirent de vivre en l'estat de mariage, comme Dieu et nature l'ordonnent. Et combien qu'il ne soit aucun estat sans tribulation, si ay-je veu ceux-là vivre sans repentence. Et nous ne sommes pas si malheureux en ceste compagnie que nul de tous les mariez ne soit de ce nombre-là. ”

“ Regardez, mes Dames, si en une maison si honorable que celle-là ils n'ont point eu peur de declarer leur follie, qu'ils peuvent faire aux pauvres lieux où ordinairement ils vont faire leurs questes, où les occasions leurs sont présentées si faciles que c'est miracle quand ils en eschappent sans scandale. Qui me faict vous prier, mes Dames, de tourner vostre mauvaise estime en compassion, et pensez que celuy qui peut aveugler les cordeliers n'espargne pas les dames quand il les tient à propos. — Vrayement, dist Oisille, voilà un bien meschant cordelier! ”

“ J'en sçay un si veritable, dist Dagoucin, que vous prendrez plaisir à l'ouïr. Je vous diray, mes Dames, ce qui plus facilement rompt une bonne amitié : c'est quand la seureté de l'amitié commence à donner lieu au soupçon, car, ainsi que croire l'amy est le plus grand honneur qu'on luy puisse faire, aussi se douter de luy est
le plus grand deshonneur, pource que par cela on l'estime autre que l'on ne veult qu'il soit, qui est cause de rompre beaucoup de bonnes amitiez et rendre les amis ennemis, comme vous verrez par le compte que je vous vay faire. ”