André de Bourdeille

“ Il me vient en pensement ceste illustre et grande lumiere et resplendeur de l'Italie, qui non seulement est la gloire et l'appareil special des dames royales, mais encor des roys mesmes, qu'est ceste excellente dame Jelianne de Jérusalem et de Sicille,
de laquelle les rayons si clairs de sa race genereuse et de ses braves ancestres, comme de ses belles, grandes et magnifiques gloires, sont gaignées par son brave et genereux courage ”

“ Si je regarde seulement vos visages et vos yeux tous pleins de menaces, les ennemis sont à vous, et me semble d'en voir des rivieres de sang, et ensemble plusieurs roys, et le corps du senat, foulez aux pieds, et estendus par terre, et les autres nageans et flottans à grands monceaux dans leur sang espandu de toutes parts. ”

“ Bien est il vray que ce grand empereur Charlemagne et roy de France, de son vivant prist grand plaisir faire et dresser des courts grandes et plenières, tant des pairs, ducs, comtes, paladins, barons et chevaliers de France, que des dames leurs femmes et damoiselles leurs filles, et plusieurs autres de toutes contrées, pour tenir compagnie et court, ainsi que disent les vieux romans de ce temps, à l'impératrice et reyne, pour voir les belles joustes, tournois, magnificences qui s'y fais oient très superbes par une grande troupe de chevaliers errans venans de toutes parts. ”

“ Voyez quelle vengeance ! Puis assemblarent tous les sindics de toutes les villes de Sicile, pour juger Charles, prince de Salerne, en en suivant la maniere de faire du roy Charles son père quand il jugea Conradin ; et tous, d'un commun
accord, le jugearent et le condamnarent à avoir la teste tranchée, comme son père avoit condamné Conradin. ”

“ Lorsque Pompée a tenu vos bandes à destroit, desquelles la vertu estoit empeschée à se remuer, de combien de sang souilla et saoula-t-il son espée et ses armes ?
Toutesfois, je vous prie, soldats nouveaux ; de cecy : que nul de vous veuille frapper le derriere de l'ennemy. Celuy qui prendra la fuite devant vous, je veux qu'il soit tenu bourgeois et citoyen de nostre ville ; mais, tant que les armes seront au vent, et qu'on vous fera teste, nulle image de pitié vous soit représentée ; non pas vos peres rencontrez face à face vous esmeuvent. ”

“ Mais, soit fait le tout selon la volonté de Dieu, avec qui je vay me marier pour tout jamais, et non avec d'autres. » Comme elle dit elle le fit ; et mena une si bonne et saincte vie, tellement esloignée du monde, qu'elle a laissé aux dames, et grandes et petites, un bel exemple pour l'imiter. Il y pourroit avoir aucuns qui pourroient dire : « Dieu mercy qu'elle ne peut espouser le roy Charles ; car, si cela s'eut peu faire, elle eut bien renvoyé loin les dures conditions du veufvage, et eut repris les douceurs du mariage. » Cela se pourroit présumer. ”

“ Certes, leurs beautez et bonnes graces se pouvoient dire esgales, si madame de Guise ne l'eust un peu emporté ; aussi se contenta elle de la passer en cela, et non point en gloire et superbité ; car c'estoit la plus douce, la meilleure, humble et affable princesse que l'on eust sceu voir, encore qu'en sa façon elle se monstrast altiere et brave, la nature l'avoit fait telle, tant en sa beauté et belle taille, qu'en son grave port et belle majesté, si bien qu'à la voir on eust toujours apprehendé de l'aborder ”

“ En ces trois processions, qui sont les bien fort solemnelles, certes on n'y remarquoit que toute beauté, toute bonne grace, tout beau port, tout beau marcher et toute braveté, si que les voyans en demeuroient tous ravis. ”

“ Recommandez moy à mon pere et à ma mere, et dites luy que je fais ce qu'il a fait d'autres fois, et que je m'en vais voir le monde, et chercher guerre au royaume de Naples. Il ne me verra jamais que je ne soye plus honneste homme que ne suis, n'y ne serois, si je voulois le croire, et me faire tenir cher dans une boëte pleine de cotton comme un relique. ”

“ Discourant de ce mesme propos sur une grande princesse de par le monde, et soubstenant son party, disoit que ces belles et grandes dames et princesses, de mesme humeur en amour, devoient ressembler le soleil, qui respand de sa lueur et de ses rayons à un chacun de tout le monde, si bien qu'un chacun s'en ressent. Tout de mesmes doibvent faire ces grandes et belles, en prodiguant de leurs beautez et de leurs grâces à ceux qui en bruslent ”

“ Je croy que vous ne voudriez commencer en moy, qui vous suis tres humble serviteur. » Aussi, combien qu'il luy eust beaucoup nuy, elle ne luy rendit la pareille ny vengeance. Il est vray que lors qu'on l'eut tué, et qu'on luy vint annoncer, elle estant malade, elle dict seulement : « Je suis bien marrie que je ne suis bien guerie pour de joye solemniser sa mort. » Mais aussi elle avoit cela de bon, que, quand on se fust humilié à elle pour rechercher pardon et sa grace, elle remettoit et pardonnoit tout, à la mode de la generosité du lion, qui jamais ne faict mal à celuy qui s'humilie. ”

“ Touchant à son cousin, le fils du prince de Tarante, qui mourut par trop extenué, elle n'en peut mais, puis qu'on ne sçauroit engarder aucun qui ne s'enyvre de son vin propre : et apres, qu'en peut mais le vin, s'il a donné la venue à son maistre et beuveur ? Il ne l'en faut blasmer, sinon le maistre qui le boit. Je ne doute pas que la grande beauté de ceste belle Reyne, sa grâce, sa majesté, ses façons, ses doux attraits et plaisans allechemens, embrassades et attouchemens, ne fissent efforcer ce jeune homme à faire plus que ne pouvoit nature ; mais cet effort venoit de luy, et non d'elle ”

“ Car, estant très belle princesse (aussi le Roy la prit pour sa beauté et vertu) , et jeune, delicate et très aimable, elle ne s'addonnoit à autre chose qu'à servir Dieu, aller aux dévotions, visiter continuellement les hospitaux, panser les malades, ensevelir les morts, n'y obmettant rien des bonnes et sainctes oeuvres qu'observoient en cela les sainctes, devotes et bonnes dames, princesses et reynes du temps passé de la primitive Eglise. Après la mort du Roy son mary, elle en a fait tous jours de mesme, employant ce temps à le pleurer et regretter, et à prier Dieu pour son ame ”

“ Vivez encor les miens, ne vous pouvant survivre, Sans aucuns longs travaux, ny peines, ny détours.
L'ONCLE.
Puis donc que le voulez, je m'en vay donc contraindre A ce vivre fascheux ; mais ce n'est pour autant Que par fournir mes jours à vous tellement plaindre, Que je vis seulement vous seule en regrettant.
LA NIEPCE.
Pour Dieu, mon très-cher oncle, achevez vostre plainte ; J'en sens en moy troubler ma joye et mon repos ; Pour vous voir si dolent, j'en sens mon ame atteinte. Ce n'est ce que demande un corps icy enclos. ”

“ Ainsi les beaux boutons de roses bien souvent sont emportez du vent comme les mesmes roses espanouïes : aussi les jeunesses ravies ainsi sont plus à regretter cent fois que les vieillesses, qui ont assez paru au monde, et le dommage en est plus grand ; comme il fust quasi de mesme qu'elles de madame Magdelaine de France leur soeur, laquelle n'eut grand loisir de jouïr heureusement de la chose du monde qu'elle avoit le plus affectée, qu'estoit d'estre reyne, tant elle avoit le coeur grand et hault. ”

“ Car, selon Dieu, ceste loy est commune et rigoureuse aussi bien au mary qu'à la femme. Davantage, s'il l'eust trouvée en cas pareil, qu'en eust il faict ? Je m'en rapporte aux gens jaloux et chatouilleux en cela : encor qu'il ne fust point roy absolu, n'y ayant grade ny authorité, sinon pour l'amour d'elle, il ne faut point doubter qu'il ne l'eust faict mourir : et voylà pourquoy elle fit bien de luy faire pâtir la loy que, par advanture, et sans doubte infaillible, il luy eust faict pâtir, qu'est la cause qu'elle usa de son pouvoir royal, estant reyne de soy, et bien absolue. ”

“ Ceux qui ont veu tels superbes appareils comme moy sçavent qu'en dire : et qu'il faille maintenant qu'elle soit frustrée de tout cela, que despuis sept ans elle n'a bougé recluse de ce chasteau austere et mal plaisant, ou pourtant elle prend sa patience, tant elle a de vertu, de sçavoir se commander, qui est une des grandes, à ce qu'ont dit plusieurs philosophes. ”

“ Invoquez donc pour moy la divine puissance, Le ciel, les bons demons, des astres l'influence, Que je sorte bien tost de ce fascheux séjour, Et que j'aille revoir encor vostre beau jour.
MADAME DE BOURDEILLE.
En cela ne se peut contenter vostre envie ; Car vous estes escrit dans le livre de vie Dès le commencement que le monde fut fait. Ce qui est arresté ne peut estre refait.
BRANTOME.
Pourquoy ne puis-je aller contre ceste ordonnance En me donnant la mort ? Ma propre violence Me peut faire jouyr bien tost de vos beaux yeux. Je ne fais que languir, le mourir est mon mieux. ”

“ Et quand bien toutes ces raisons ne seroient, et qui est le juge, tant doux soit il, qui n'eust condamné ce malheureux d'avoir violé sa foy à la plus belle reyne, princesse et dame du monde de ce temps là, et luy avoir faussé compagnie, et s'estre desrobé pour aller habiter avec un autre qui ne la valloit pas en la moindre partie de son corps ? Miserable qu'il estoit ! c'estoit tout ainsi qu'un, qui, pour estaindre sa soif, delaisse la nette et claire fontaine, pour aller boire dans une mare sale, boueuse et toute vilaine. ”

“ C'est le mesme jour aujourd'huy qui nous rendra nos dieux, nos femmes, nos enfans, nos familles, nos biens et les ames de nos amis, et vous rendra manans, habitans et concitoyens de nostre ville, et desormais francs de toute guerre et de tout mal. C'est le mesme jour encore qui, avec le destin, sera tesmoing, et prouvera lequel aura pris plus justement les armes. Celuy qui sera vaincu en ceste journée aura
le tort, et faira cognoistre si vous avez couru sus à votre patrie à feu et à sang par juste cause. ”

“ Aussi ce grand roy de Naples, Alphonse, qui estoit subtil à aimer les beautez des dames, il disoit que la beauté est la signifiance de la bonté, et des douces et bonnes moeurs, comme la belle fleur l'est d'un bon fruict : et, pour ce, ne faut douter que si nostre Reyne ne fust esté composée de sa grand beauté, ains de toute laideur, qu'elle ne fust esté tres mauvaise, veu les grands subjects qu'on lui en a donné. ”

“ Il faut que le tout vienne de l'humeur de l'homme, de la force, de son effect, et surtout de son ardente convoitise. Et quand bien tout cela ne seroit, et comment pouvoit-il mieux mourir sinon en bien servant sa reyne et sa dame, et luy monstrant l'ardente affection qu'il luy portoit, puisqu'il n'espargnoit point sa peine, ses forces, sa violence, et que pour la bien contenter, et luy donner du plaisir, il mouroit pour l'amour d'elle, et dans le camp amoureux de son lict, où il avoit si vaillamment combattu, et exposé pour l'amour d'elle et si liberallement sa vie ? ”

“ Ce n'est pas tout : car estant en la procession, marchant à son grand rang, le visage tout descouvert, pour ne priver le monde en une si bonne feste de sa belle lumiere, parust plus belle encore en tenant et portant
en la main sa palme (comme font nos reynes de tout temps) d'une royale majesté, d'une grace moitié altiere et moitié douce, et d'une façon peu commune, mais differente de toutes les autres ; que qui ne l'eust jamais veue ny cognue eust bien dit : « Voylà une princesse qui en tout va par dessus le commun de toutes les autres du monde. » ”

“ Elle luy fit response : « Madame de Dampierre, je la vous donne de bon coeur, n'ayant accepté ce don du Roy mon frere, que je n'ay demandé, mais il me l'a donné de son bon gré, pour ruiner la France, car j'en suis, et ayme tous ceux qui en sont comme moy : ils auront de moy plus de courtoisie que d'un autre qui eut eu le don ; et telle qu'ils la voudront de moy et me la demanderont, je leur donneray. » Comme
de vray, ceux qui eurent affaire avec elle, n'y trouvarent que toute courtoisie, toute douceur et bonté. ”

“ Luy a on trouvé tant d'argent caché, et aux banques d'Italie, comme l'on crioit tant : tant s'en faut, qu'après sa mort on ne luy a trouvé un seul sol : et, ainsi que j'ay ouy dire à aucuns de ses financiers et aucunes de ses dames, qu'elle s'est trouvée, apres sa mort, endebtée de huit cent mille escus, les gages de ses dames, gentils hommes et officiers de sa maison, deubs d'une année, et son revenu d'un an mangé ; si bien que, quelques mois avant mourir, ses financiers luy remonstrarent cette nécessité, et elle en rioit et disoit qu'il falloit louer Dieu du tout, et trouver de quoy vivre. ”

“ Il y en a eu un qui avoit faict son tumbeau en vers latins, dont la substance estoit telle : Nature avoit produit cette reyne pour estre veue de tout le monde ; aussi a elle esté veue en grande admiration pour sa beauté et ses vertus, tant qu'elle a vescu : mais l'Angleterre, y portant envie, la mit sur un eschaffaut, pour estre veue en derision, qui pourtant a esté bien trompée, car telle veue luy a tourné à loüange et admiration envers le monde, et gloire et grace envers Dieu. ”

“ Apres, le herault d'armes, dict Bretagne, appella tous les princes, officiers d'icelle dame, c'est assavoir, le chevalier d'honneur, le grand maistre d'hostel et autres, pour, eux tous et un chacun d'eulx, accomplir leurs offices envers ledict corps, ce qu'ilz firent moult piteusement, et jettans larmes de leurs yeux. Et, ce faict, le prénommé roy d'armes cria par trois fois à haulte voix moult piteusement : La tres chrestienne reyne de France, duchesse de Bretagne, nostre dame souveraine, est morte ; et puis un chascun s'en alla. Le corps demeura ensepulturé. ”

“ Son entrée fut belle, non tant pour les magnificences et sumptuositez qu'on luy fist et dressa, mais pour veoir entrer en triumphe la plus belle et accomplie reyne du monde, montée sur une belle hacquenée blanche, harnachée fort superbement, et elle vestue toute d'orangé et de clinquant, si sumptueusement que rien plus ; laquelle le monde ne se pouvoit assez saouler de voir, la regarder, l'admirer et l'exalter jusques au ciel. ”

“ Il se rencontrera devant vous une certaine jeunesse de Grece, qui ne sçait que c'est de guerre, ny porter armes, ny aucun ordre de battaille, avec une confusion de langages d'un divers amas d'estrangers que c'est pitié, et ausquels leur semble que leurs crys et hurlemens soient dangers. Tant s'en faut, que, lorsque les trompettes sonnent, et les trouppes s'esbranslent pour aller au combat, tremblent de peur, et songent à fuitte. Peu de gens combattront contre vous autres, et demesleront ceste guerre civile. ”