Jean Vauquelin de La Fresnaye

“ Et, des l'age premier, on prend une habitude D'aymer ou de haïr les Muses et l'estude. De nature tu n'es robuste ni puissant, Pour des armes porter le faix rude et pesant ; Ains tu as vn esprit qui, tenant de Mercure Et du chantre Apollon, des lettres aura cure. Peut-estre ton puisné, plus fort et vigoureux, Suiura de nos ayeux ce mestier rigoureux. L'estude ne t'est plus une dure contrainte, Ce t'est une coutume, ainsy que t'est la crainte De Dieu, vers qui tousjours tu dois avoir recours : Car vain sera d'ailleurs en tout temps le secours. ”

“ L'amour ne fut jamais dans une ame craintive ;
Mais puisque les Destins, Rois de l'eternité, Eux mesme ont faict les noeuds de ta captivité, Choisissant la beauté (1) qui passe de naissance De fortune et d'honneur les deesses de France, Adore ta prison, et fay voir en croissant L'effect des voeux sacrez que tu fis en naissant. Tu verras de bonheur ta jeunesse suivie, Fuyant les voluptez sepulchres de la vie ; Les travaux glorieux t'en donneront assez, Les prenant seulement quand ils seront passez. Si tu dis ton secret, tu donnes ta franchise, Et ne peux mettre à fin nulle haute entreprise. ”

“ « Floreste, voy les feux d'un veritable amour, Qui ne me permet pas de mourir, ni de vivre : Je ne vis qu'en l'espoir de me voir de retour Et je meurs de regret que je ne te puis suivre : Mais ou vivant, ou mort, plus rien je ne ressens, Estant prest à laisser l'object de tous mes sens.
» Adieu, chastes regards, source des beaux desirs, Adieu, bouche de feu de mille fleurs semee, Adieu, doux entretiens, adieu, tant de plaisirs, Dont mon ame en l'aymant si long-temps fut charmee, On peut bien à mes yeux ces delices oster, Mais toutes dans l'esprit je les veux emporter. ”

“ Henri IV.
Si de ce que tu sçais tu retardes l'usage, Tout ce que tu promets sera pour ton dommage. Les lettres et les arts ne sont que d'ornement ; Il faut sur l'action mettre ton fondement. Ces lumieres d'esprit, ces esclairs de nature, Qui contentent la Cour, où tu prends nourriture, En un age plus meur peut-estre s'esteindront, Ou, n'en usant pas bien, ta fortune perdront. ”

“ Et voir combien le Temps, Roy des choses mortelles, Donne et desrobe aux arts de richesses nouvelles : En la Foy seulement je hay la nouveauté ; Plus elle est pleine d'ans, plus elle a de beauté. Mais il faut, croyant bien, adorer et se taire, Defendant à nos sens d'esplucher ce mystere. Tu peux en tous endroicts, et lorsque tu le veux, Invoquer l'Eternel, et luy faire des voeux : Pour ceux qui vivent bien, le monde n'est qu'un temple. Mais tu luy dois ta vie, au peuple ton exemple ; Le Chef peut sur la foy comme il faict sur les moeurs. ”

“ Quand la nuit, embrassant la terre de ses aisles, Sema de nouveaux feux dans le ciel esclaircy, Je senty dans mon coeur mille flammes nouvelles, Et le repos commun augmenta mon soucy.
Puis quand l'aube du jour, de roses couronnee, Eut de lys et d'oeillets embelly le matin, J'allay passer au bois la seconde journee, Gravant sur les rochers les loys de mon destin.
Et si je m'en souviens, j'escrivys ce langage « Plustost dans l'Océan on cueillera des fleurs, Plustost ces bois seront en esté sans feuillage, Que je laysse d'aymer celle pour qui je meurs. » ”

“ TANDIS que ce grand Roy, dont la gloire surmonte Tout ce que des grands Rois nostre siecle raconte, Faisoit vivre les siens en un age doré, Des peuples estrangers justement adoré, Et d'un sceptre innocent commandant à la France, Sur tous les coeurs du monde estendoit sa puissance : Parmy tant de bonheur nos esprits ravissant, Un soin quant et le jour malgré nous renaissant Rendoit à nos plaisirs nos craintes comparables, Songeant que nos beaux jours n'estoient gueres durables, Et que ce grand soleil nostre nuict empeschant, Auroit dedans le ciel sa fin à son couchant. ”

“ Sire, il est temps de prendre garde Que vostre nom est immortel, Mais que la mort ne se retarde, Et que l'arrest du ciel est tel Pour ceux qui portent des couronnes Comme pour les bergers des bois : Vivant donc pour tant de personnes, Vivez pour vous aucunes fois.
D'un air offusqué de nuage, Pour tousjours le maistre des dieux Ne veut pas couvrir son visage, Et cacher son oeil à nos yeux. Luy mesme d'un soin charitable Ayant ordonnez les destins, Se va mettre au rang à la table Et recommence ses festins. ”

“ Ces parolles d'amour qu'Amour t'a revelees, Plus pures que les lis qui croissent es vallees, Sont lis pris sur un mont où personne n'atteint, Qui ne perdront jamais la couleur de leur teint ; Car aux jardins du ciel ils ont eu leur naissance, Et plantez en la terre à l'honneur de la France D'une immortelle main, la mere des Amours Les va d'une eau de Meurthe arrouser tous les jours. Escrire encore après ces parolles divines, C'est bien auprès des lis approcher les espines. Si ce qu'on peut de mieux c'est de les imiter, Puisqu'il est impossible, il ne faut plus chanter. ”

“ Toutes ses palmes fortunees Luy viendront deuant les annees Et le rendront si triomphant, Que long-temps la paix et la guerre Des plus grands princes de la terre Ne dependront que d'un enfant.
Quand la jeunesse et les delices, Des Amours les douces nourrices, Ioindront la force à la beauté, De ses traits les ames blessees Le feront roy de leurs pensees Et tyran de leur liberté.
Les beautez les plus rigoureuses Alors se verront amoureuses, Et ses yeux, aimables vainqueurs, Aux regards ne pourront suffire, Estant seul partout son empire Le feu des esprits et des coeurs. ”

“ Sous un sceptre si doux, l'Europe renaissante, Comme dessous Traian, redevint florissante ; Paris, roy des cités, sa pompe reprenoit ; Aux lieux inhabitez le peuple revenoit ; Et chacun en repos, d'esperance certaine, Attendoit doucement la moisson de sa peine. Du Senat et des loix la vieille majesté Mettoit de jour en jour l'empire en seureté ; L'ocean estoit libre, et ses portes ouvertes Recevoient les vaisseaux sans pillage et sans pertes ; La terre, de longtemps amassant des trésors, Les offroit aux passans et les jettoit dehors. On voyoit à nos voeux toutes choses propices. ”

“ Belle, tu te la feins par les yeux du penser, Et telle que tu veux, tu la crois embrasser. L'autre, qui n'a plus rien de tout son patrimoine, Contraire à ton humeur, s'est allé faire moine, Et desireux de voir quelque monde nouveau, Va presenter à Dieu les restes du bordeau. Mais, afin d'achever de vous conter ma vie, Je suis nay libre en tout, elle est toute asseruie ; Et tandis que j'escris, voilà trente mestiers De tailleurs, de tanneurs, de pauvres savetiers, Qui me font quitter l'oeuure où mon humeur m'appelle Et ne sont en proces que pour une allumelle ”

“ Ses vertus qu'on admire, Franches de son empire, Ont tousjours leur printemps. Qui peut vivre en la conquerant, Il doit mourir en l'adorant.
Quand Flore est couronnee Des thresors de l'annee, Elle a moins de beautez Et Ceres de richesse Que n'a ceste Deesse D'amours de tous costez. Le doux feu qui sort de ses yeux Faict les tourmens delicieux.
Cet esprit tout pudique, Plein d'une flamme unique, Ayme par iugement : Les voeux et le seruice Du fameux Andronice Luy plaisent seulement. La voyant, tout ennuy se pert ; Tout plaisir croist quand on la sert. ”

“ Clorice brusle aussi d'une flamme secrette : Son jeusne coeur souspire attaint du mesme traict ; Et sa chaste pensee, où l'amour se retraite, Garde du beau pasteur l'agreable portrait.
Sa parole, ses yeux, sa façon gratieuse, Ont de charmes si forts enchanté ses esprits Que n'estant plus de rien que de luy curieuse, Toute autre affection elle tient à mespris.
Comme elle fust soudain l'idole de son ame, Il est incontinent son plus aymé soucy.
Trop heureuse fortune en ceste douce flame Et trop heureux amants, s'ils demeuroient ainsy. ”

“ A tout autre qu'à toi ces flames amoureuses, Qui bruslent chastement les ames genereuses, Ne me deplaisent point ; alors que deux beaux yeux, Elevant dans le ciel leurs desseings glorieux, Pour voir par la vertu leur foy recompensee, Leur font abandonner toute basse pensee, Et, dessous ceste ardeur, ne recerchent si non Que d'élever leur gloire, et d'accroistre le nom De la beauté qui tient leur liberté captive. ”

“ Sans faire le devot que ton coeur soit entier, Autant que peut porter la loy de ton metier : Dieu ne s'achete point par de grands sacrifices, Ny pour luy consacrer de pompeux edifices ; Il aime beaucoup mieux les esprits innocents, Que les autels couverts de chandelle et d'encens. Hay les sectes de part, mais aime tous les hommes, Sans te reduire aux loix des climats où nous sommes ; Que l'Arabe, le Scythe, et ces fronts bazannez Qui sous un autre ciel que le nostre sont nez,
Ne soyent tenus de toy pour des peuples barbares ”

“ La nuict survient trop tost, qui forcez les separe, Mais le corps seulement ; car le Ciel ne peut pas, Pour toutes les rigueurs que contre eux il prepare, Ces deux coeurs separer qu'en l'oubly du trespas.
POUR UN ADIEU. STANCES.
QUAND Alidor se vid resolu de cercher Dessous un nouveau ciel une gloire nouvelle, Et que l'heure approcha qu'il falloit detacher Les chaisnes qui tenoient un esprit si fidelle, Il sentit à l'instant qu'il n'est point de trespas, Que d'avoir veu Floreste et de ne la veoir pas. ”

“ STANCES. (1601) .
MESSAGER des Dieux et des Parques, Qui fondent le sort des Monarques, I'annonce l'arrest des Destins, Et l'heur d'un Prince je recite Qui doit obscurcir le merite Des Traians et des Constantins.
Tel que l'astre aux flammes dorees Sortant des plaines azurees, Ce jeune Apollon reluira ; Le Printemps couronné de roses Ne montre tant de belles choses Que son enfance en produira.
Ces ans par qui tout se commence Poussez d'une forte semence, Seront pleins d'esprits et d'ardeur ; Ce soleil n'aura point d'aurore, Car le ciel voudra qu'on l'adore Premier qu'il montre sa grandeur. ”

“ Et comme oyseaux blessez ils s'élevent en haut, Et puis tout à la fois la force leur defaut. Il ne peut qu'une mere en enfans trop feconde, N'en mette de boiteux ou de bossus au monde : Entre tant de rymeurs, que la langue a tous faits, On ne doit s'ebahir s'il en est d'imparfaits : Par le trop d'ornements sa gloire est oppressee, Comme par trop d'espis la moisson est versee. Les Muses ont perdu toute leur chasteté, Et comme on voit en tout nostre siecle effronté, A ceste heure chacun met la main sous leur robe, Entre dedans leur temple et leurs secrets derobe. ”

“ Je m'estois retiré dans un lieu solitaire, Sans plus craindre le mal ny desirer le bien : Resolu de n'aimer jamais rien que moy-mesme, Au contraire, je sens qu'au prix de ce que j'ayme, Depuis que je suis né je n'aimay jamais rien.
De moy-mesme et des miens j'ay perdu la memoire ; De ma seule prison mon ame faict sa gloire, Estant à ceste fois tellement asseruy Que j'ay pour mon amour les amours delaissees, Et comme enseuely dans mes tristes pensees, Mes souspirs seulement tesmoignent que je vy. ”

“ Estre à la fin contraint d'espouser sa putain, Pour laisser à son bien un heritier certain. Toute terre a ses loix, chacun a sa deuise, On ne peut trop payer la bonne marchandise ; Mais quand on ne peut plus defaire le marché, Il s'en faut prevaloir ou le tenir caché. Tant de grands embarquez dans ce mesme navire, Font que quand on est mal on ne s'en faict que rire. Si les martyrs sont saincts pour avoir enduré, Un homme qui pour rien n'a jamais murmuré, Merite bien d'avoir sa feste solemnelle, Et luy faut tous les jours une grosse chandelle. ”

“ L'email des chiffres d'or dans les chambres n'esclaire, Ny des marbres divers la luisante clairté, Et n'ont rien qui ne soit pour la nécessité ; Non plus que ces guerriers vestus d'armes pesantes, Qui les pourraient avoir et bonnes et luisantes : Mais voulant aux combats seulement s'asseurer, Ont soin de se couvrir et non de se parer. Les derniers qui vouloyent s'eloigner de ces vices, Ont assis Apollon au throsne des delices, Mais de trop de liens contraint sa majesté. Luy qui comme un grand Dieu n'a rien de limité, Qui dessus tous les arts estendant son empire. ”

“ Que mesme le menteur te fasse veritable : Le vice enseigne plus, quand on peut l'eviter, Que ne faict la vertu, ne pouvant l'imiter. Comme en voyant les mers, dont l'Europe est bornee, Ayant sans nul regret la France abandonnée, Et l'assiete et le cours des fleuves et des lieux Seulement en passant arresteront tes yeux ”

“ Mais ce coeur desdaigneux qui me donne la loy Et qui me voit captif dans ma prison derniere, Vous verra, malgré luy, vous-mesme prisonniere ; Car je veux en allant vous porter quant et moy.
Rien ne peut empescher que, vous ayant laissee, Vous ne soyez tousjours reyne de ma pensée ; Mes yeux perdront tous seuls la clarté de leur jour, Car les feux de l'esprit ne se peuvent esteindre ; L'absence est le miroir des choses qu'il veut feindre Et peut nuire aux amants, mais non pas à l'amour. ”

“ Là le ciel amoureux et tousjours odorant Va de tous ses thresors la terre bien-heurant, Et dans ce paradis, le palais des delices, L'Amour a mille appas et n'a nulles malices ; Des Zephires tous seuls cet air est agité, Et quiconque se plainct c'est de la volupté. Les eaux et les forests sont toutes parfumees, Et de baulme et d'encens les terres sont semees. ”

“ Dy plus communement les choses moins vulgaires, C'est où l'art est plus beau quand il ne paroit gueres. Je hay les vains discours gravement prononcez. Ces theatres d'un jour que le peuple a dressez, Et ces colosses creux, tous remplis de fascines, Ressemblent à ces gens qui, d'accens et de mines, Semblent porter la masse et la peau du lion, Et toute leur valeur n'est qu'en opinion. ”