Madame de Mornay

“ On lui offrit mesmes, pour sentir s’il pensoit à moy, au cas qu’il me voulust espouzer, de luy faire voir tout mon bien à la vérité, tant par mon contract de mariage que celuy des partaiges de la succession de feu monsieur de la Borde, mon père ; mais il fit responce que, quand il voudroit en estre esclarcy, il ne s’en adresseroit que à moy mesmes, et que le bien estoit la dernière chose à quoy on devoit penser en mariage ; la principale estoit les mœurs de ceux avec qui l’on avoit à passer sa vie, et surtout la craincte de Dieu et la bonne réputation. ”

“ « C’est toy qui m’as retiré du ventre, qui m’as donné assurance dès que je sucey les mammelles, qui es mon Dieu dès les entrailles de ma mère, » mais qui vient bien à croistre et à multiplier quand nous venons à considérer le siècle où Dieu nous a fait naître, ténébreux en ce qui est de son service, s’il en fut jamais, et auquel, touteffois, il a fait reluire son Evangile et nous a daigné illuminer, confus en ce qui est de l’estat du monde et plein de dangers et de traverses, et esquelz touteffois il nous fait traverser miraculeusement. ”

“ Monsieur le Prince d’Orange partit du Païs bas avec son armée composée d’Allemans et François, et passa par la Picardie et Champaigne, puis vinrent joindre le duc des Deux-Pontz sur la frontière d’Allemagne. Et en ce temps, Dieu nous donna Susanne de Pas, nostre fille aisnée, et l’unicque de feu Monsieur de Feuquères ; j’acouchay d’elle à Sedan, le 29e Décembre 68, et fut son parrain monsr Doncher, et madamoyselle sa femme fut sa maraine. ”

“ Mesmes, pour le regard de ceux de la Religion, qu’ils vivroient selon les édictz précédens, seroient capables de toutes charges et dignitez, dont ilz convinrent en termes assez tolérables. Mais monsieur du Plessis, comme je luy ay ouy dire, n’entra point en opinion qu’ilz entrassent en propos de paix à bon escient, jusques à ce qu’ilz vinssent à s’ouvrir sur le contentement particulier des chefs, tout le reste n’estant qu’un accident esmeu d’ailleurs dont la substance résidoit en ce seul poinct. ”

“ Ceux entre les anciens qui ont esté tenus les plus sages ont confessé ung seul Dieu, créateur du Ciel et de la Terre, et ils ont recognu que c’est luy qui conduit et gouverne toutes choses par sa Providence ; mais le peuple de Dieu passe plus oultre, assuré de l’amour que Dieu luy porte en Jésus-Christ son Filz, et non-seulement à son Eglize en général, laquelle il ayme comme son épouse, mais à ung chacun de ses membres en particulier. Car il reconnoist un Dieu tout-puissant, tout sage et tout bon, dont il apprend à se fier en sa puissante bonté et à dépendre de sa volonté très-sage. ”

“ Dieu voulut que, sur l’heure qu’il vouloit monter à cheval avec sa trouppe [172] , les douleurs me prirent et j’accouchay la mesme nuict d’une fille, et deux heures après il partit ; elle fut baptisée et nommée Sara, mais elle ne vescut que trois mois, [elle est enterrée à Nérac [173] .] Son parrain fut messire de Bouquetot, Seigneur du Brueil de Normandie, parent de M. du Plessis et descendu d’une fille de Mornay, gentilhomme de valeur, religion et preudhomie ”

“ Tant qu’il luy fit parler de demeurer avec luy, et que là sa conscience et sa religion luy demeureroient libres, mesmes que, durant les troubles, il demeureroit en ses maisons sans porter les armes. M. du Plessis l’en remercya et s’en excusa. Ceux qui le tenoient prisonnier le goustoient aussy et se fioient fort en luy, et le laissoient aller promener seul. Bien est vray qu’au commencement ils y faisoient prendre garde ; mais il leur dit que résoluement il vouloit savoir comment il estoit avec eux ; s’il estoit sur sa foy, qu’il aymeroit mieux estre mort que de l’avoir rompue ”

“ Sa lettre est en somme : qu’il a à louer Dieu, non tant d’estre deffaict d’un tel ennemy, que de l’estre sans en avoir souillé sa main, ny son âme ; qu’il ne faut que pour cela, il pense avoir la paix, parce que sans doute l’horreur de ce coup animera le peuple, et armera le duc de Maine ; que le Roy de quattre mois n’osera se servir de luy pour ne se monstrer moins catholique, et que mesmes, il luy est à souhaiter que le duc de Maine ait du courage, afin que le Roy ait plus de matière et de nécessité de l’appeller à son service ”

“ Cette extraordinaire conversion des faux maux qu’on appelle en vrays biens nous fait apprendre que rien ne nous peut faire mal quand nous sommes à Dieu. Réciproquement aussy, que toutes les bénédictions mondaines ne nous sont que malédictions si nous nous destournons de sa crainte. ”

“ Mais l’en ayant trouvé fort eslongné et congnoissant la bonne réputation en laquelle il estoit, je pensay que ceste hantise estoit à cause du voisinage ; et puis j’avois pris plaisir, depuis que je m’estois retirée à Sedan, pour passer plus doulcement ma solitude, en l’arithmétique, en la painture et en autres estudes dont quelquefois nous devisions ensemble, de sorte que je feus bien ayse qu’il continuast à me venir voir, et en peu de temps, l’affectionnay autant que pas un de mes frères, combien que je ne pensasse point à mariage. ”

“ Nous cheminons par le milieu des vices ; il nous a détournés de leurs allèchemens, il nous en a mesmes violemment arrachés. C’est une marque qu’il nous ayme et qu’il se veut servir de nous ; il nous a osté des biens qui nous ostoient sans doute à luy, destourné des honneurs mondains qui nous reculoient de luy ; c’est signe qu’il ne nous veut pas perdre, signe qu’il nous veut garder au contraire pour lui. Il nous a mesmes envoyé du mal, mais dont nous avons receu du bien ; des exilz où nous avons appris à rechercher nostre vraye patrie ; des pertes, qui nous ont enseigné d’acquérir au Ciel ”

“ Estoient entre ceux ausquelz monsieur du Plessis demanda leur avis, monsieur de Rohan, messieurs de Chastillon, de Clermont, marquis de Galerande, vidame de Chartres, de la Force, de Montloué, de Montaterre, du Brueil d’Auge, de Parabère, de Chouppes, de St Malo, conte de St Aignan, de Vardes, et plusieurs autres personnages de qualité. Les pria touteffois M. du Plessis de ne l’accompagner point au Louvre, mais de s’y rendre chacun à part, parce qu’il ne vouloit pas se faire assister de ses amys contre un prisonnier, qui avoit les mains liées. ”

“ En mariage faisant donnoit le Roy à César, monsieur son filz naturel et de madame la duchesse de Beaufort, la duché de Vendosme, auquel il fit consentir Madame, sa sœur unique. Où est à noter qu’encore que ce duché fust un principal membre de la maison de Navarre, de laquelle monsieur du Plessis estoit surintendant, il ne luy en parla jamais, et n’y intervint aucunement ; doustant S. M. qu’il ne luy fist, selon sa fidélité, quelque remonstrance au contraire. ”

“ Je luy dis que je n’avois loysir de l’ouïr, car je pensois que les soldatz me suivissent, qu’il y avoit apparence que Dieu se vouloit servir de luy pour me sauver la vie, autrement que je pensois estre morte. Il dessent en bas et trouve ses soldatz auxquelz il assura de m’avoir vue chez madlle d’Esprunes qui avoit ung filz évesque de Senlis, qu’ilz estoient bons catholiques et congneus de tous pour telz. Les soldats luy répliquèrent fort bien qu’ilz ne demandoient pas de ceux là, mais de moy. ”

“ D’autres de ses amys aussy le vinrent assister, par le moïen desquelz il secourut M. de Chavigny à Chinon ; et pour le regard de Saumur, quoy qu’il vist tous les gouverneurs et les voisins désarmer les habitans, il n’y voulut rien innover pour ne leur monstrer signe de crainte ou de foiblesse. Et fut ceste pauvre ville, au milieu des appréhensions de toutes les voisines, la retraicte de toutes les princesses et dames de qualité qui estoient paravant à Tours. ”

“ Mais monsieur le Duc d’Alençon continuant ses desseingz, sous l’aile duquel plusieurs Seigneurs de la Religion commenceoient à se réchauffer, il se résolut, à l’instance particulière de M. de la Noue [68] , de repasser en France. ”

“ Or, avons-nous à espérer, comme il est Dieu de nous, qu’il le sera aussy de nos enfans, car sa promesse y est ; mais comme il les saura bien conduire au but de leur élection par sa miséricorde, ne faut pas que, de nostre part, nous laissions de les acheminer par le soin paternel de leur instruction, les rendant héritiers de la connoyssance, et debteurs de la reconnoissance de tant de grâces que nous avons receu de luy, et par conséquent embraséz de son amour, touchéz de sa crainte, dépendans de sa providence, assuréz en la fermeté de ses promesses ”

“ Dieu le préserva et n’eut qu’un coup de lance qui n’estoit rien parce que l’ennemy ne vint à la charge qu’au trot. Estant pris, un de la ditte compaignie le voulut tuer, mais le dit de la Borde l’en empescha. Il lui demanda sa bourse qu’il luy bailla, et y avoit environ trente quattre doubles ducatz, et deux lettres de moy, l’une inscrite à M. du Plessis, l’autre à M. de Boinville, (qui est le nom d’une terre en Beausse,) et le pria de les garder, disant que c’estoient lettres d’une maîtresse. ”

“ Luy pesoit aussy d’avoir à mener et tenir des forces aux champs, qui mangeassent le peuple pour son subject ; bien consentit il à notre filz d’entreprendre par pétard ou escalade sur la maison de St Phal, en tirant serment, de luy et des capitaines qui l’assistoient, de ne le tuer point, ains de le luy amener prisonnier, en tant que faire se pourroit ; mais le dit de St Phal eut advis de Saumur à temps pour s’en retirer, parceque, pour cacher son dessein, il estoit contrainct de prendre un grand tour. ”

“ Le roi de Navarre envoya M. de Chassincourt exprès en Flandres pour en avoir l’advis de messieurs de la Noüe et du Plessis, lequel se trouve encore par escrit. C’estoit, que quelque mauvais traictement qu’on leur fist, qu’une paix tolérable valoit mieux qu’une guerre pour avantageuse qu’elle fust, que M. de Guise ne pouvoit rien promettre à ceux de la Religion qu’en fraude ; s’il avoit rien à traicter, qu’il devoit s’adresser à luy tout droict, et non à autres, qui ne pouvoit estre que pour les distraire. ”

“ Estant en cette voûte, au haut du grenier, j’oyois de si estranges crys d’hommes, femmes et enfants qu’on massacroit par les rues, et ayant lessé ma fille en bas, j’entray en telle perplexité et quasi désespoir que, sans la crainte que j’avois d’offenser Dieu, j’eusse aymé plus tost me précipiter que de tomber vive entre les mains de ceste populace et de voir ma fille massacrée que je craignois plus que ma mort. ”

“ Auquel temps aussy nous nasquit Philippes de Mornay, nostre filz aisné, le 20e de juillet en la ville d’Anvers, en la Camaerstrate, au logis d’un nommé Landmeter, coronel de la jeunesse de la ville, et furent ses parains messire Françoys de la Noüe et Artus de Vaudrey, Seigneur de Mouy, sa marraine damoiselle Marie de Nassau, fille aisnée de monseigneur le Prince d’Orange. ”

“ Sur l’establissement de l’Édict du Béarn estoient intervenues quelques difficultez, sur lesquelles le Parlement avoit député un conseiller vers S. M. Estoit aussy venu de l’autre part l’Evêque d’Oléron. Ces différens, remis par S. M. à monsieur du Plessis et à monsieur de Calignon, chancelier de Navarre, furent aussy terminez au contentement de toutes parties, et non sans en scavoir les Eglizes de Béarn un grand gré à monsieur du Plessis, par les lettres que les dittes Eglizes, le Lieutenant Général au Pays et le Parlement luy en ont escript. ”

“ Aucuns creurent qu’on les mandoit, nomméement les ministres, pour une conférence théologale, moyennant laquelle S. M. se voulust résoudre au faict de la religion. Mais la résolution en estoit prise sur les considérations humaines, sans consulter les Escritures divines, et les Evesques [262] n’y furent appelez que pour donner quelque forme et cérémonie à ceste prestendue conversion. Comme de faict, un des plus grandz, escrivant à l’Evesque de Chartres pour le convier à venir, lui mandoit qu’il ne se mist en pene de théologie. ”

“ Sur l’instance très ardente que l’Évesque de Modène, Nonce du Pape, luy faisoit à toutes ses audiences, de luy faire raison de ce qu’un sien serviteur, de telle qualité et de tel nom en son service, avoit ozé escrire contre l’Églize Romaine, le Pape mesme en ayant faict troys depesches au Roy dont la dernière, au temps de la conférence prétendue de Fontainebleau, fut apportée par le sr d’Alincourt, en laquelle parlant de mons du Plessis l’appeloit son ennemi, et S. M. estant en ceste résolution d’un faict qui sembloit inopiné, prit occasion de parvenir à ceste fin. ”

“ « Qui vous eust dit il y a deux ans qu’on eust presché l’Evangile au Mans ? — Mais à vous, Sire, dit-il, qu’on l’eust presché en la sale du Roy de France ? »
Aucuns lors pressoient fort S. M. de réunir son patrimoine au domaine de la couronne, ce qu’aussy il empescha, mesmes en considération de Madame, sa sœur unique. Il luy remonstra, faisant cela, que son patrimoine deviendroit inaliénable comme le domaine de France ; s’il n’avoit point d’enfans, que Madame sa sœur en seroit frustrée ; s’il n’avoit que des filles, qu’elles n’auroient rien ny en l’un, ny en l’autre ”

“ Ce fut luy qui, le jour de la bataille St Denis, après les charges, fut recongnoistre l’ennemy, et sur l’assurance qu’il donna à monseigneur le Prince et monsr l’Amiral qu’il s’estoit retiré dans Paris avec son canon, le logis de St Denis et de nostre armée fut gardé. En tout le voyage de Lorraine, j’ay ouy remarquer à plusieurs que nostre armée avoit esté si bien logée que l’ennemy n’avoit seu enlever aucun logis, ny battre aucune trouppe ; mais aussy faut il recongnoistre. Dieu luy faisant la grâce de bénir évidemment son industrie en sa charge ”

“ Ceux qui faisoient profession des armes conseilloient la voye des armes, non pour appel dont ilz étoient tous d’avis que St Phal s’estoit rendu indigne, mais par quelque violence que ce fust qui désormais luy estoit licite. Ceux qui faisoient profession de la justice préféroient celle de la justice en un faict qui ne tenoit rien de l’honneur, assassinat et partant crime, à traicter par conséquent criminellement, et où sans doubte il y auroit plus d’exemple. ”

“ Le cheval se sentant délivré de luy s’arresta court, et eust moyen de le reprendre, en se résolvant touteffois à la mort, car il ne voyoit aucune yssue à cause du susdit ruisseau assez large, ny autre apparence que d’estre attrapé là par ceux qui le poursuivoient de sy près. En ceste extrémité, il prie Dieu, puis se remet à renouer son harnois, et enfin mène son cheval en lieu facile pour reprendre son chemin, et voyant son chapeau en ce champ qui luy estoit tombé descend jour le reprendre, parce qu’il ne voyoit plus personne. ”

“ Et les fondemens d’icelle estoient que le pays ne pouvoit se défendre tout seul, et que contre l’Hespagnol, il ne pouvoit estre secouru que des François. M. du Plessis, connoissant partie le naturel de feu monseigneur d’Alençon et partie la malice et imprudence de ses conseillers, et surtout la haine contre la religion, jugeoit leurs conseils et intentions incompatibles, et souvent disoit à feu monsr le Prince d’Orange, s’il s’en pouvoit passer, que c’estoit le meilleur ; s’il ne pouvoit, qu’il l’eust pour ayde, plus tost que comme maistre ”

“ La somme estoit qu’il s’estoit trouvé sur le bord d’un tel précipice, par les monopoles des siens propres qu’il particularisoit, qu’il n’avoit peu s’en échapper par là ; que d’ailleurs aussy, il n’avoit pas esté assisté de ceux de la religion comme il eust esté requis, mais que son cœur demeuroit tousjours de mesme envers la Religion et ceux qui en faisoient profession, et qu’il espéroit que Dieu luy feroit miséricorde. ”

“ Sa responce fut que la paix estoit chose tant désirée de tous les bons et de tant de peuple qui souffroit, que volontiers il ne s’ingéreroit pas d’en traicter s’il n’y voyoit clair, mesme veu les choses passées, qu’il n’y avoit aucun les voyant ensemble, quand ilz ne parleroient que de la chasse, qui ne les jugeast assemblés pour la paix. Cependant, s’il n’en réussissoit rien, qu’ilz n’avoient faute de mésdisans pour leur en donner la coulpe, à luy singulièrement en haine de la Religion afin de le charger de la malédiction du peuple ”

“ Et disoit seulement S. M. estre marrie qu’à ceste occasion il ne peut pas l’approcher sy près de luy qu’il eust désiré. Sa Majesté donq luy en fit tenir propos par monsieur de la Force, capitaine de ses gardes, gentilhomme fort accomply et fort son amy, auquel il fit responce qu’il n’avoit rien faict sans considération et avoit préveu tout ce qui luy en pouvoit avenir, mais que le Roy lui estoit témoin qu’il avoit tousjours ainsy vescu, ordonnant sa vie par ordre, au service de Dieu premièrement, puis de son Roy et de ses amys ”